وجع القلب فى معركة الشهداء

07 May 2021

 وجع القلب فى معركة الشهداء !!

الشهادة بتنادى صاحبها ..

———————————

بص في عنينا ..

نقدر على الدنيا ولا تقدر علينا ..

روحنا في إيدينا ..

ناسنا وترابنا وأرضنا بتتحامى فينا ..

الإختيار2

معركة الواحات اللى إمتدت 3 ساعات كاملة .. كانت واحدة من الأحداث الفارقة فى معركة مصر مع الإرهاب .. .. .. معركة البقاء اللى خاضتها الدولة المصرية طوال السنوات الماضية مع منتخب العالم للإرهاب فى شكل موجات لا متناهية من العناصر والكوادر والفرق الإرهابية المدعومة والممولة بشكل لا محدود من الدول والأجهزة والتنظيمات اللى كانت بتستخدم العناصر والفرق دى كذراع عسكرى لإسقاط مصر والمنطقة كلها فى هوة الفوضى …

صحيح إن مصر قدرت تعبر من قلب الأزمة منتصرة .. لكن بما إنها كانت معركة بقاء بالفعل .. فالنصر فيها ماكانش سهل .. وثمنه ماكانش بسيط ..

الثمن كان مئات بل ألاف من الأرواح الطاهرة الشرفية .. والدماء الزكية اللى سالت علشان فى النهاية إحنا نعيش .. ومصر تكمل مسيرتها

الناس اللى دفعت أرواحها عن طيب خاطر ، ثمن لحياة وطن بأكمله .. ماكانتش منتظرة أى مقابل .. ولا كان لها هدف غير إننا نحيا فى أمان .. وإن بلدنا تفضل وتعيش وتستمر …. وعلشان كدة إستحقوا إنهم يكونوا من الشهداء .. ونحتسبهم عند الله كذلك

التاريخ البشرى .. و تاريخ الأمم العظيمة .. بيقول إنه مافيش أمة قامت وإنتصرت وتعاظمت .. ألا وكان ده بسبب تضحيات رجال من العظماء اللى صدقوا الوعد وحملوا على أكتافهم ، نصرة بلادهم ودينهم ومبادئهم الوطنية .. اللى بتضع مصلحة الوطن على رأس أولوياتهم .. و قبل أى شيئ أخر .. حتى ولو كان ده على حسابهم وعلى حساب حياتهم

و صدقونى .. لو أى دولة فى العالم كانت واجهت اللى مصر واجهته فى الـسنوات الماضية .. كانت إنهارت وتفككت وسقطت فى هوة سحيقة مافيش منها رجوع .. لكن مصر حباها الله برجال .. قال عنهم الرسول صلى الله عليه وسلم إنهم فى رباط إلى يوم القيامة … وعلشان كدة .. ستظل مصر باقية بسواعد ابنائها ورجالها الأبطال .. فى رباط …. إلى أن يرث الله الأرض و من عليها

حفظ الله مصر بأبنائها العظماء …

و رحم الله شهداء الواحات الأبرار وكل شهداء الوطن الأبطال 🙏

لمتابعة تعليقاتكم