7 Jul 2015
دعوة للمقاطعة
أصل صاحبة الجلالة أخدتها الجلالة
———————————-
إنتو إزاى تتهجموا على الناس فى بيوت الدعارة !؟ 🙂 .. هو ده بالضبط لسان حال نقابة الصحفيين ، ممثلةً فى النقيب يحى القلاش وكثير من الصحفيين الغير شرفاء ، المعترضين على قانون الإرهاب بحجة إن ده ضد حرية الصحافة !!
يا سلام .. !!!!
السيد المبجل نقيب الصحفيين طالع فى مداخلة هاتفية على تليفزيون الدولة يقول ” إحنا ضد تقيد الحريات فى نقل الاخبار.. ومش هــ ننتظر المتحدثيين الرسمين لما يطلّعوا بيانات…ولو الخبر غير صحيح…بــ نرجع نصححه أو ننفيه” .. !!! .. يعنى سيادة النقيب شايف كدة إن حرية الصحافة إنهم يقولوا اللى همّ عايزينه ، ويعملوا بلبلة فى البلد ، ويثيروا حالة من الرعب بين المواطنين .. وبعدين يرجعوا يصححوا ويعتذروا !! .. ده إييه طاجن الفتة اللى بالبتنجان ده !!؟؟
فعلا .. كم من الجرائم ترتكب بإسم الحريات !! ..
يا سيادة النقيب .. ياترى موّتوا كام واحد ، وبعدين طلع عايش ما ماتش !!؟؟
ياترى فضحتوا كام سيدة فى شرفها وعرضها وبعدين طلع ده كله كذب !!؟؟
ياترى فيه كام مقال إتفبرك فى كافة الموضوعات والقضايا ، وفى الأخر طلع كل ده فشنك !؟
ياترى فيه كام شائعة تم الترويج لها وبعدين كل ده طلع مش صحيح !!؟؟
ياترى أخبار الــ 100 شهيد بتوع الجيش إييه ؟؟ .. والجيش اللى بيقصف المساجد فى سيناء ، وموكب الرئيس السيسى اللى اتعرض للهجوم ، وقناصة الشرطة اللى بيقتلوا المتظاهرين ، والــ 70 مليار بتوع مبارك ، والخروج الأمن للسيسى بعد التنحى ، وضياع ثروة أبار غاز شرق المتوسط ، و … و …. و ….. و …… !!؟؟
يا ترى مين المسئول عن حالات الرعب والتضليل الإعلامى اللى بتمارسه الصحافة بجميع أشكالها المقروءة والمسموعة والمرئية ، واللى بتمس الأمن القومى وأمن الشعوب !!؟؟
ياترى مين المسئول عن حالة الدعارة الفكرية والعهر الإعلامى من ساعة ما أصبح كبار الصحفيين بيظهروا على الفضائيات كمقدمين برامج زى محمود سعد وخالد صلاح وصرصار الصحافة مجدى الجلاد (على حد وصفه لنفسه) .. لدرجة إنهم أصبحوا اشهر من الفنانين !!؟؟
ياترى هل فيه فى أى دولة فى العالم عندها إنفلات إعلامى زى اللى فى مصر لدرجة إنك تبث أخبار كاذبة بدون التحقق من مصدرها لمجرد الطمع فى المصلحة الشخصية والسبق الصحفى والإعلانات ، حتى لو كان ده على حساب البلد !؟ .. فيه اى دولة بتسمح بده !!؟؟
وإذا كان الصحفى من حقه انه يخاف و يترعب من قانون هو شايف إنه بــ يحد من حريته الداعرة فى ممارسة مهنته اللى بتمس الناس والوطن .. فــ إحنا كمان كشعب من حقنا نترعب ونخاف على بلدنا لما نصحى فى يوم الصبح ، ونسمع إن جيشنا إتهزم إن داعش دخلت مصر ، وإن أولادنا فى سينا كلهم ماتوا !!!
ومن حقنا إننا نرفض الكلام ده برضوا من منطلق خوفنا على الأمن القومى للدولة مش على مصالحنا الشخصية وحرياتنا المزعومة ، والرغبة فى بث السموم فى المجتمع ، أو إننا نبقى سلطة فوق سلطة الدولة !! .. مش كدة وإلا إييه !؟
أصدقاؤنا اصدقاء صفحة كلام فى الصميم ..
علشان كدة .. و رداً على رفض نقابة الصحفيين لقانون الإرهاب ومحاولتهم ليّ يد الدولة وقوفاً ضد رغبة الأغلبية الساحقة للشعب المصري تحت دعاوى حرية الرأي التي تجلّت في أبشع صورها أثناء عمليات سيناء .. فــ إحنا هنا ومن خلال صفحتنا بندعم دعوات المقاطعة اللى تم تبنيها مابين إمبارح والنهاردة من بعض الرموز وبعض الصحفيين الشرفاء .. بــ مقاطعة صحفية، يوم الجمعة القادم – 10 يولية 2015، نمتنع فيه تماماً عن شراء أو قراءة الجرائد المطبوعة، ونمتنع أيضاً عن قراءة وتداول أخبار الجرائد الإلكترونية، علشان البهوات يفهموا إن السلطة الحقيقية فى إيد الشعب ، و أن الشعب وقت اللزوم ، سوف يتصدى بكل قوة لأي محاولة لشيوع الفوضى الإعلامية واللى هى كانت أحد الأسباب الرئيسية لخراب مصر وصولا بمصر إلى يناير 2011 وحتى الآن
لن يفرض علينا أحد ما يريده .. وعلشان كدة أرجوا من الجميع “فضلا وليس أمراً” .. مشاركة المقال بشدة وتبنى حملة المقاطعة بكل قوة .. وياريت نشارك الهاشتاج ده فى كل تعليقاتنا وبوستاتنا سواء على الفيسبوك أو على تويتر
#يوم_المقاطعة_الصحفية_10_يولية_2015
#نقابة_الصحفيين_تدعم_الارهاب
الكاذبون و المدلسون يحاربون لحماية كذبهم و تآمرهم على الوطن
و الجيش يحارب الارهاب .. ولازم الشعب تكون حربه مع امثال هؤلاء .. بمعنى اننا نركز فى انه لازم يكون لنا دور كمدنيين ، ومش لازم نتكل على الجيش في كل حاجه
شييييير وشارك بكل قوة 😊😊
وحفظ الله مصر من خفافيش الظلام