10 Feb 2016
الهري و الهري المضاد … استهداف الوعي الجمعي
————————————————–
اصدقاؤنا اصدقاء صفحة كلام في الصميم ….. المقال ده مقال تفاعلي …. و دي اول مره نطلب من الفانز بتوعنا حاجه … و احنا متأكدين انكم مش حتتأخروا 🙂 🙂 .
من اكتر من خمس سنين و كل يوم بينزل مجموعه من الاشاعات و الاخبار المضروبه …. و بيتم نشرها و التخديم عليها بشكل متناغم و متزامن من فضائيات او جرائد أو شخصيات عامه و صفحات الكترونيه و اكاونتات مرصوده و معروفه و اصبح الناس العاديه تعرفها كويس عشان يشغل حضرتك و يشتتك و يفضل مسيطر و محاصر عقلك و معيشك في هاله من الطاقه السلبيه المدمره للمجتمع او في اي براقه امل لاي اصلاح او تقدم.
واحد يخترع خبر مضروب و ينشره على سايت ملهوش اصل او في سايت جريده مشمومه …. و الكل يخدم و يشير الخبر على انه حقيقه و يتم البناء عليه بأكاذيب اخري …. و يبدأ الهري و الهري المضاد … و اول لما ينام الخبر … يلحقوا نفسهم بخبر تاني … و هكذا 🙂 🙂
و الجميل في الموضوع انهم بعد فتره … ينشروا نفس الخبر بعدها بشهور عديده على انه خبر جديد …. و بيتم التخديم عليه بنفس الطريقه …. و الموضوع ده بيكون ليه سبيبن …. الاول ان يكون مطلوب الترسيخ لفكره الكذبه نفسها … و التاني قياس الوعي الجمعي للمجتمع وصل لفين 🙂 🙂 .
و تعالوا كده افتكروا معانا كام اشاعه و كذبه بيتم نشرها و غيرها اللى بتتنشر هي هي في توقيتات محدده كل سنه …. و المطلوب منكم تفتكروا معانا كده و كل واحد يقولنا على اشاعه تم نشرها و بعد ما الناس سابت اللى في اديها و قعدت تتخانق عليها … طلعت في الاخر اي كلام و خلاص 🙂 🙂 :-
——————————————————————-
فبراير 2011 …. اليوم السابع ينشر مخطط مؤامره بين العادلي و جمال مبارك لفض ميدان التحرير …. حيفتحوا قفص الاسود الجائعه اللى في حديقه الحيوان على المتظاهرين لان عمال الحديقه مش بيروحوا يأكلوهم بسبب الاعتصام 🙂 و الاسود حتطلع تاكل المعتصمين 🙂
العربيه اللادا البيضاء اللون اللى مليانه سلاح و داخله على الشارع اللى انت واقف فيه ايام اللجان الشعبيه 🙂 🙂 و ازاي كنت بتتنفض و تجري من اول الشارع لاخره كل نص ساعه و برده مجاتش لغايه دلوقتي 🙂 🙂
الشرطه الظالمه فتحت السجون و طلعت المساجين بعد ما قتلت الظباط اللى رفضوا يفتحوا السجون.
اللى مات قدام الاقسام و السجون اثناء اقتحامها شهداء.
حيمنعوا الافران انها تشتغل و حيقطعوا المياه و حيجوعوا الشعب.
النشتاء شباب ناجح و واعي و فاهم و عارف بيعمل ايه و محضر البديل المناسب لحكم جمهوريه مصر العربيه …. بس انتوا اسمعوا كلامهم و امشوا وراهم و ملكمش دعوه .
الاخوان مسلمين …. سلميين منظمين و جاهزين و عندهم كوادر جاهزه لحكم مدني 🙂 🙂
مبارك عنده حساب في سويسرا فيه 70 مليار … و الفلوس حترجع و حتتقسم و حتبقي الاشيه معدن 🙂 🙂 …. و في الاخر طلع مصدر الخبر مقال في جريده الجارديان الانجليزيه المملوكه لقطر.
خبراء و علماء من كل حدب و صوب (و بالاخص علماء ناسا 🙂 🙂 ) يستغيثون بالشعب المصري لوقف الحفر في قناة السويس الجديده لانها ستؤدي لانهيار جوانب القناه القديمه بمجرد بدىء الحفر في القناه الجديده و ستختفي القناة القديمه قبل الافتتاح بشهور عديده 🙂 🙂
الحياه البحريه في البحر الابيض و الاحمر ستنتهي لانتقال كائنات البحر الاحمر الى البحر الابيض و العكس مما يؤدي الى خلل بيئى يؤدي الى كارثه بيئيه لا يحمد عقباها في اقل من سنه …. ( ادينا مستنيين 🙂 🙂 )
زياده رواتب الشرطه و الجيش و القضاه …. خبر مكرر بينزل مره كل شهر او شهرين … و بمعدل التكرار النشر و التأكيد عليه …. يصبح مرتب ضابط الجيش او الشرطه او القضاه يتعدي ال 2 مليون جنيه في الشهر ده غير الحوافز و البدلات و الحبشتكنات 🙂 🙂
زياده المعاشات العسكريه … خبر تم نشره اكتر من 25 مره طوال الخمس سنوات الماضيه ….. انتوا مش بتزهقوا 🙂 🙂
عدم نشر او تكذيب زياده المعاشات المدنيه او زياده مرتبات المعلمين و الاطباء و باقي موظفين الدوله.
تأجيل موعد دخول المدارس اسبوعين سواء في اول العام الدراسي او بعد اجازه نصف العام 🙂 🙂
مصر على وشك الافلاس و الاقتصاد في الضياع …. نفس الخبراء هم هم بتوع حفر قناة السويس.
الجيش بيقتل جنوده في سيناء و المخابرات هي اللى بتقوم بالتفجيرات . 🙂 🙂
في اول يوليو 2015 تنظيم داعش الارهابي يستولي على العريش و رفح و يطرد الجيش المصري منها و يستولي على معدات و دبابات و مواقع عسكريه …. مع ان ساعتها الجيش المصري كان واخدهم ورا مصنع الكراسي 🙂 🙂
افتكاسه من العام الماضي ….. مصر ترسل 100 الف جندي مصر الى اليمن تحت ستار اجراء مناورات عسكريه مع السعوديه و الثمن 5 مليار دولار معونات بتروليه …. 🙂 🙂
نفس هم هم الناس بياكدوا ان مصر ترسل نفس ال 100 الف جندي الى سوريا تحت ستار نفس المناورات العسكريه مع السعوديه و الثمن نفس ال 5 مليار دولار المعونات البتروليه … 🙂 🙂
بالرغم من افتتاح اكتر من ستين مشروع عملاق في اقل من سنه بمئات المليارات من الجنيهات في مختلف المجالات بمعدلات تنفيذ تاااريخيه و غير مسبوقه في اي دوله في العالم و في ظل ظروفنا الصعبه دي … لكن السجاده الحمرا كانت شمواه من النور الفاخر من النساجون الشرقيون تمنها 10 مليون يورو ( مش عارف ليه مش دولار 🙂 🙂 )
2013 داعش يجهز نفسه لفتح مصر من الحدود الغربيه …… الخبر بيتكرر كل كام شهر و ادينا دخلنا في 2016 و لسه مستنيين عشان نشوف مين اللى حيفتح التاني 🙂 🙂
فيه ماده في كليه الشرطه اسمها تعذيب و ماده اسمها شتيمه و ردح …. طب و المصحف منا رادد 🙂 🙂
50% من الشعب المصري مصاب بفيرس سي ….. و ده معناه ان كل واحد يعرف 10 من اصحابه او قرايبه اكيد فيه 5 عندهم فيرس سي ….. ( فكروا فيها كده و انتوا احكموا 🙂 🙂 )
مصر اكبر دوله في العالم في الاصابه بالسرطان ….. كذب بين … طب تخيل يا مؤمن بقي ان مصر مش مصنفه حتي من اول عشرين دوله 🙂 🙂
مصر رقم اتنين في العالم في التحرش بالمرأه … احنا شعب متحرشين …. كذب بين …. طب تخيل يا مؤمن ان اكبر ثلاث دوله مش في التحرش و لكن في الاغتصاب هم امريكا و فرنسا و السويد 🙂 🙂
مصر رقم واحد في العالم في التلوث …. كذب بين ….
المجتمع الغربي قائم على الديمقراطيه و عندهم حريه و بيحترموا حقوق الانسان و عندهم حضاره و احترام للانسان حتي للمواطن بتاعهم ……. اهو الكذبه دي بقي حنزلها مقالات مفصله 🙂 🙂
الشرطه بتقوم بخطف الشباب و تخفيهم قصريا … و بعدين تاخدهم و توديهم اوكار ارهابيه … و قوم ايه بقي … تقوم بقتلهم على اساس انهم اراهابيين …. 🙂 🙂 … طب و المصحف منا رادد
الشرطه المصريه مفتريه ماشيه في الشارع بتعتقل الناس عمال على بطال و بتقتلهم داخل السجون ….. تخيل يا مؤمن ان عيد الشرطه المصريه كان تخليدا لذكرى خمسون شهيدا فقط في موقعة الاسماعيليه ضد الاحتلال النجليزي عام 1952 لكن في اقل من خمس سنوات تضحي الشرطه المصريه بـ 155 ضابط و 581 فرد شرطه باجمالي 736 شهيد و الاف المصابين بعاهات مستديمه و بالرغم من نفص الامكانيات و المشاكل المتغلغله فيها زيها زي اي قطاع مصري ( اطباء و مهندسين و موظفين و خلافه ) …. تقوم بواجبها و بتضرب المثل بأنها لا تحمي اي فرد منها بيتم اثبات غلطه او تقصيره …… و تخيل يا مؤمن ان ده مش بنشوفه في اي قطاع تاني في الدوله لكن برده هي وحشه و خلاص 🙂 🙂
فضيحه …… الجيش المصري يقتل السياح المكسيكيين … و مصر تدفع تعويضات بالملايين للحكومه المكسيكيه …. من شهر تعلن الحكومه المكسيكيه تبرئة الجيش المصري و ادانتها للسياح بتوعها لدخولهم منطقة عمليات عسكريه محظوره 🙂 🙂
الزند يصرح إن الفساد فى مصر ماشى بنفس المعدلات العالمية …. اي كلام في البدنجان 🙂 🙂
وزير النقل يصرح إن الطرق فى مصر بتماثل الطرق فى دبى وألمانيا …… ماحصلش
محافظ السويس يصرح ان اسرائيل لو ضربت علينا صواريخ حتترد عليهم بفعل الرياح الشماليه الغربيه …. و بعد الهري المعتاد اتضح ان الراجل كان بيتكلم على الاشعاع و التلوث النووي مش على الصواريخ نفسها 🙂 🙂
القبض على اسلام جاوييش عشان رسوماته ….. اتضح ان الموضوع اصلا مصنفات فنيه و موضوع قانوني مش سياسي و تم الافراج عنه تاني يوم و لا اختفي قصري و لا حاجه 🙂
تطعيمات الاطفال فاسده و الوفيات بالمئات في المستشفيات ….. اي كلام و خلاص 🙂 🙂
الدوله بتنكل و بتقبض و بتقوم بالاحتجاز القصري لكل معارض ….. و تلاقي اللى بيقول كده قاعد على الفيسبوك بقاله خمس سنين بيسبح بحمد الدوله المصريه ليل نهار و بيقل في ادبه و لا اختفي قصري و لا حد جه جنبه اصلا 🙂 🙂
الرئيس السيسي اصوله يهوديه من الام ….. اشاعه من الخمسينات …. عبد الناصر و السادات و مبارك كل امهاتهم يهوديه ….. شوفت الصدف 🙂 …. طب غيروا طيب … مفيش ابداع خالص 🙂 🙂
الشعب المصري شعب جاهل و همجي و فاشل و غير مثقف و لا متحضر و فيه كل العبر ….. تخيل يا مؤمن ان الشعب المصري اللى هو الشعب الوحيد في المنطقه اللى حمي بلده و انقذها و انقذ جيشه و انهي حكم ديني ارهابي في سنه واحده و تقولوا عليه هو الجاهل !!!!! …. طب و المصحف ما فيه اجهل منكم 🙂 🙂
و غيرها كتييييير من الاشاعات اليوميه …. و المطلوب من حضراتكم تفتكروا معانا و تبعتولنا اللى فاكرينه من الاشاعات اللى نزلت و طلعت في الاخر بلح و حماده بالجنزبيل 🙂 🙂 …. صدقونا لو ركزتم شويه … حتكتشفوا اننا عايشين في بحر من الشائعات و الاكاذيب ….. لكن الجميل ان تم رصد ظاهره غاية في الروعه ….. ان الكثير الشعب المصري لما يسمع الخبر يسأل عن مصدره … و تطور الامر الان ان بنشوف تعبيرات الناس لما بتسمع اخبار زي دي … بتضحك بسخريه و بشفقه على اللى بيطلع الخبر … و كان لسان حالهم بيقولوله …. دي اخرتكم و ده فعلا آخركم 🙂 🙂 .
و طبعا فيه ناس حتخش تناقش بعض الاشاعات اللى كاتبينها لان للاسف الاشاعات دي و غيرها من كتر تكرارها اصبحت حقيقه مؤكده و لا مجال لتكذيبها او حتي الاقتراب منها …. لكن عامه بنقولهم وفروا النقاش … لاننا الفتره اللى جايه حننزل سلسله مقالات مفصله لتفنيد الشائعات دي بالادله و البراهين و الاكاذيب اللى للاسف ناس كتير مننا اتربت عليها و اصبحت بالنسبه ليهم حقائق لا تقبل الجدال .
شدوا حيلكم معانا و ورونا حتبعتولنا كام خبر صدقتوه في الاول او على الاقل اختلط عليكم الامر فيه و في الاخر طلع اشاعه
تحياتنا