11 May 2014
الوطن ما بين مطرقة المتأسلمين و نشطاء الليبراليين
—————————————————
الرسول عليه الصلاة و السلام لخص الدين الاسلامي في كلمتين ( انما بعثت لاتمم مكارم الاخلاق).
فالصلاة مثلا هي فرض وعباده و هي وسيله للتعبد الى الله و الوصول بالفرد الى الغايه و هي مكارم الاخلاق لانها تنهي عن الفحشاء و المنكر و البغي.
و لكن للاسف مع ظهور المتأسلمون الجدد و استخدامهم للدين للوصول للحكم…. حولوا الوسيله الى غايه.
فاصبحت الصلاه و الصوم و العبادات هي الغايه . فتراهم يتوضؤون و يصلّون ثم يسبّون و يخونون أوطانهم و يذبحون و يحرقون و يمثلون بالجثث بمنتهي الوحشيه و بدم بارد و بكل فخر و هم يقولون الله اكبر .
و عندما تسالهم اين الوطن منكم و اين الشعب و البلاد و العباد منكم يقولون لك “لا وطن لنا …. اننا نجاهد و نعبد الله و هي ارض الله و لا يوجد اوطان ما دمنا نعبد الله” !!
أما الليبراليين و النشطاء فلم يختلفوا عنهم. فهم يسيرون على نفس المنهج . و لن أتدني في الحوار و أقول سبوبه و تمويلات مع أن الكلام ده مظبوط في راس الهرم بتاعهم لكن دعونا نتكلم علي القاعدة بتاعتهم.
أصبحت للاسف المظاهرات و المعارضه و الجعير و الكلام الحنجوري هي الغايه و ليست مجرد وسيله للوصول الى الغايه الاصليه و هي العمل والنجاح.
طب حضرتك عندك تجربه ناجحه واحده على الارض ؟؟؟ سواء سياسيه او اقتصاديه او علميه ؟؟؟ لأ.
فإذا أشرت الى مصنع جديد يقولوا لك اهم من المصنع نفسه فين المكان اللى حنعتصم فيه … و فين حقوق العمّال اللى لسه مشتغلوش … (ولا حيشتغلوا في سنتهم اصلا).
نصبوا أنفسهم أوصياء على الشعب ….. يتحدثون دائما باسمه …. و يختارون لهم مقدراتهم بحجة انه شعب جاهل و بــ يتم تنويمه مغناطيسي . في حين انه لا يوجد حركة واحده منهم ليها ظهير شعبي واحد أو تواجد في الشارع.
و تيجي تكلم حد فيهم يقولك انا مش عارف أنجح عشان انا مش في السلطه لان فيه فساد و مفيش ديمقراطيه …. وصلني للسلطه و حتشوف النجاح …. (حجة البليد ) و لو موصلتش للحكم يبقي مفيش فايده و يكش تولع البلد….
طب ازاي بس وانتم فشلتم طوال الثلاث سنوات السابقه سواء في اختيارتكم في عصر اللمون في الانتخابات السابقه او في تكوين حزب واحد له رؤيه واضحه واصله للشارع …. كل انجازاتكم حنجوريه في الشوارع و على الفيس و بس …. امال لو حتمسكوا حكم دولة زي مصر حتعملوا فيها ايه .
استقيموا يرحمكم الله …. و جربوا تشتغلوا و تكسبوا ثقة الناس …. و الله العظيم في قصص نجاح كتير في البلد و حديكم مثال صغير :-
إذهبوا الى كليه للعلوم جامعة عين شمس. حتلاقوا شباب زي الورد عامل ابحاث جباره و نفذها فعلا في منطقة الناصريه العشوائيه في انتاج الغاز للمنازل من القمامه باستخدام وحده صغيره بتتركب فوق سطح البيت و تمنها تلاته تعريفه …. بتنتج غاز للبوتجاز و السخان للبيت كله و بنتخلص من القمامه يعني بنحافظ على البيئه لان القمامه دي كانت بتتحرق في الشارع و بنوفر للمواطن و للدوله …..
ليه متلمّوش نفسكم و تدعموا مشروع زي ده و تحاربوا عليه و يتنفذ في شارع بالكامل و الشارع يبقي حي و الحي يبقي مدينه. و يبقي فيه تجربه واحده توحد ربنا نجحتوا فيها و تكسبوا بيها ثقة الناس و تكسبوا ثقتكم بنفسكم .
و علشان يبقى ليكم وزن و قيمه .. و لما تتكلموا حد يسمعكم بدل ما انتم لا قيمه و لا وزن لكم في الشارع ….. و لا احنا بتوع معارضه و خالف تعرف و كلام حنجوري و مظاهرات و خلاص.
مصر محتاجه كل واحد فينا …..