و ما زال الفرز مستمر …. إفرز اصدقاؤك ما بين الدعشوش و المخبول

13 Dec 2016

و ما زال الفرز مستمر …. إفرز اصدقاؤك ما بين الدعشوش و المخبول

——————————————————————

ما إن أعلنت الدوله المصريه عن طريق رأس السلطه التنفيذيه … الرئيس السيسي عن ملابسات الحادث الارهابي الا و طفحت في وشنا ماسوره مجارى من التشكيك و التريقه و الانكار ….. و وجدنا البعض قد استدعى من داخله مخزونه الاستراتيجي و تقمص شخصيه الخبير الاستراتيجي اللوزعي و خبير الادله الجنائيه و الـ DNA و عالم الطب و التشريح و تلاقيه بيكلمك و لا كأنه الخبير كولومبو و يحاول بإستماته انه يفنيد البيان الرسمي و تصريح رأس الدوله و يخليك تشك في كل حاجه …. بس طبعا الكلام ده مش صدفه و لا زيطه في الزحمه … الموضوع ليه أصول و جذور و ترتيب لازم نتكلم عليها لان احنا بنتكلم على دم شهداء ماتت و هم بيصلوا لربنا و بقي خارج عن نطاق المنطق و لازم نفوق شويه.

اولا الخواجه اللى بره و اللى بيدور الناس دي اللى دارس نفسيتهم كويس …. و بيدور بعضهم بالدولار و معظمهم بالزمبلك … عارف كويس هو بيعمل اييه … و كل مره بيعرف يحركهم كويس جدا و بالريموت من غير ما يحسوا ….. لكن اللى بدأ يجننه …. ان ماسورة المجارى دي كانت ليها تأثير كبير بالشارع المصرى على الارض …. لكن مع الوقت اصبحت الناس دي بالفعل مجرد بكابورت،  معظم الشعب بقي بيبعد عنه لان ريحته وحشه …. لكن سايبه مكانه لغاية دلوقتي … و هو فاهم كويس جدا ان الشعب قرب خلاص يوصل لمرحله انه حيقوم عليهم و يسلك البلاعه عشان يخفي البكابورت ده اللى طافح علينا بقاله خمس سنين.

اولا تأصيل الامور مهم جدا …. فحضرتك حقك تختلف مع السلطه او النظام زي ما انت عايز … و حقكك تختلف مع الاشخاص و الاحزاب و الكيانات … لكن لما الامر يتعلق بخطر على الدوله و الوطن …. و لما يحدث حادث ارهابي و تيجي تبيع و تتاجر بدم الناس عشان تحمى و تلغوش على الارهاب ، اما لانك ارهابي محتمل و فيه دعشوش صغير جواك مستني ياخد فرصته ، او علشان امراضك النفسيه و مركبات نقصك بصفتك فاشل في حياتك و خياراتك كلها كانت غلط بالرغم من انك متعلم و ذو شأن اجتامعي و احساسك بضئالتك لما تلاقي المواطن البسيط فاهم عنك …. يبقي معلش…. اركن بقي حضرتك على جنب لان في الوقت ده اللون الرمادي ماينفعش …. و انت رسبت في الامتحان … و ماتستحقش تبقي مواطن طبيعى.

 ثانيا …. اللعبه كلها ان الخواجه اللى بعت لفرنسا و المانيا و بلجيكا و تركيا و امريكا قبلهم …. له هدف واحد بس و هو المفتاح الوحيد لمصر … انه يقسم و يحرك الشارع زي ما نجح في كل الدول اللى حوالينا و زي ما كان ناجح من خمس سنين فاتو عندنا …. لكن اللى مجننه انه و طوال الثلاث سنوات اللى فاتت …. عمل كل حاجه و اي حاجه ممكن تتخيلوها عشان  يحقق هدفه و بدأ بالفعل يستنفذ كل خياراته …. فلا نفع معانا حصار و ضغط اقتصادي و لا ارهاب و لا حرب شرسه على الوعي الجمعي من الاشاعات و الاعلام المضلل و الفتنه الطائفيه و غيرها من الاساليب اللى مخيبتش في اي مكان استعملها ضده …. لكن معانا مفيش فايده

و لان اوراق القطيع اللى على الارض اللى بيلعب بيها زي ما هي متغيرتش …. فحب يكرر نفس سيناريو حادث القديسين من ست سنوات مضت …. فبعتلنا الحاج شفيق بنفس الاسلوب …. تفجير كنيسه و قتل اكبر عدد من المصليين ….و حادث القديسين ده لازم نتكلم فيه شويه لاننا حنفهم منه حاجات كتييييير من اللى حصلت و بتحصل دلوقتي لان المدبر و المحرض و المنفذ على الارض واحد .

 اللى كان موجود في حادث القديسين في الشارع  وقتها …. كان اكيد شاف بعنيه ازاي اربع افراد فقط بيخدم على كل واحد فيهم 10 افراد حواليهم …. قدروا يقنعوا الاف الناس اللى نزلت على صوت الانفجار انهم مانزلوش علشان فيه قنبله انفجرت و قتلت ناس داخله تصلي في عيدها …. لأ …. انتم نزلتم لان المسيحيين دبحوا شيخ الجامع اللى كان واقف يصلي في منتصف الليل و قطعوا المصاحف و حرقوها …..  و لازم يكون فيه انتقام و هجوم على المستشفي التابع للكنيسه و حمايه الجامع …. و ازاي لاول مره نجد قنابل مولوتوف بتترمى من جانب المسيحيين على الجامع و نلاقي بيترد عليهم بكام قنبلة مولوتوف بتترمى على عربيات المسيحيين في الشارع و محلاتهم .

القصه هنا انهم قدروا يستغلوا احتقان الشارع السياسي و الاجتماعي في تفريغ غضبه ضد بعض …. و قدروا ينسوك الشهداء اللى متقطعين حتت و المصابيين اللى بيصرخوا من الالم و اللى انفجرت فيهم قنبله بعمل ارهابي جباااااان و خسيس في دور عبادتهم …. و خلوك متسألش … شيخ جامع ايه اللى موجود الساعه 12 بالليل و بيصلي ايه بالظبط  ؟؟ … و أصلا الجامع بيبقي مقفول بالليل ؟ …. و اللى بيقولك ان الشيخ اتدبح انت شايفه لسه جاي قدامك اصلا  …… يعني اكيد زيك ماشافش حاجه …. و بعدين الاهم … هو مين الناس اللى محضره و استخدمت قنابل الملوتوف اللى لاول مره نشوفها و ماكناش نعرفها خالص قبل كده ….. دي من واحد واقف وسط ناس كانت بتصلي في عيدها ….. و دي  و من واحد جاي من بيته و معاه في جيبه كام واحده عشان يرد بيها عليهم ؟؟؟؟….. لان الهدف اللى كان حيتبني عليه بعد كده … ترسيخ مبدأ احنا و هم …. و ان كل واحد يرسخ في ذهنه … ان احنا كنا رايحين نصلي و اتفجرنا و جم يكملوا علينا و هم بيقولوا الله اكبر …. و احنا كنا بنحمى الجامع و ناخد حق الشيخ الوهمى اللى اتدبح جوه الجامع و هم بيقولوا بالروح و الدم نفديك يا صليب …… 

انا اسف اني فكرتكم بالحادث الاليم ده …. بس دايما و ابدا الالم بيعلمنا و يفوقنا …..  لان ده نفس المشهد اللى المفروض انه كان يحصل اول امبارح …. و ده كان باين جدا من المناظر اللى ظهرت قدام الكنيسه بعد الانفجار … و الدعوات المكثفه من سايتات الاخوان بالنزول لمؤازرة المسيحيين في مصابهم … و الدعوات العلنيه منهم ان يكون الهتاف يسقط حكم العسكر … و فين السكر يا سيسي  !!!!! …. تخيل يا مؤمن ان الاخوان الارهابيين اللى بيوصفوا المسيحيين بالكفر و بينادوهم بالصليبيين الموجوب قتلهم … نازلين ياخدوا بخاطرهم !!!!! …. و طبعا كان استغلال الحدث  و التركيز على الاعصاب المنفلته على اشده … فتم ضرب الاعلاميين ( مع اني مش طايقهم ) و التخديم على اعلاميين النوشتاء و الجماعه الارهابيه زي شبكة رصد.

و لما اتفاجئوا ان ماحصلش حاجه لان الوعى الجمعي نجح في اقصي اختبار ممكن مواجهته  ….و ان شقاهم راح هدر …. و لان دائما و ابدا مفيش ابتكار ….. كان تركيزهم رهيب على اخواتنا المسيحيين بنشر العديد من البوستات على اوسع نطاق اللى بيحقروا فيه من شهداؤهم … اما بعدم الترحم عليهم … او بالشماته و اظهار الفرحه … او بنشر صور لجثث متقطعه ملهاش علاقه خالص بالحادث الارهابي …. و ده عشان يزيد الضغط و يحصل الانفجار اللى مستنيينه … و لما فشلوا …..   تم اللعب على نفس الاشاعه الهبله بتاعتهم  وهو اتهام الدوله المصريه انها بتقتل شعبها  زي ما كان الجيش بيقتل جنوده، و زي ما كان الشرطه بتقتل افرادها …. و لما الارهابي اتعرف و اتجاب اللى معاه و اللى هو كادر ارهابي من جماعه الاخوان … جن جنونهم … لان العالم القذر كان مش مقتنع قبل كده ان كل الارهاب اللى احنا فيه ده ملهوش علاقه بالاخوان الكيوت الحلوين ….. و لان و لأول مره حيكون فيه عنصر صريح منهم في جريمه ارهابيه واضحه و كله بالادله و البراهين ….. فكانت الحمله المحمومه من كل خرفانهم انهم يطلعوا يشككوا في الموضوع من اصله … و طلع كل واحد يفتي و يقول انه مش ممكن … و قعد يفند و يتكلم و هو ( اسف في التعبير …. حمار) لانه بيفتي فيما لا يعلم و لا يفقه .

و عشان تتأكد من الكلام ده …. شوف اي واحد صاحبك و ادخل على صفحته على بوستات 2013 ….. حتلاقي نفس اللى كان بيقول اللى رمى الاطفال من السطوح ماحصلش … و لما شافه في الفيديو قال متفبرك … و بعدين قال حصل فعلا لكن ده حزب وطني … بعدين قال البرىء اتعدم و منهم لله

هو نفس اللى بيدافع عن الارهابيه ساميه شنن …. و بيقول الحريه لخالتو ساميه …. هو اللى كان بيقول انا بحذرك يا سيسي و حنفجر مصر … و بعدين حنحرقكم في سيناء … و بعدين يقول الجيش بيقتل نفسه … و لما طلع ولايا سيناء يقولوا احنا اللى بنحارب … قالك القوه المفرطه و العنف يؤدي الى عنف …

و هو نفس اللى كان مشير بوستات باسم الارهابي شفيق اللى فجر نفسه امبارح و بيقول عليه شاب ثورى اتمسك و الحريه للجدعان ….. اي ارهابي هو بالنسبه ليه جدع و شاب كيوت و حبوب

و هو نفسه اللى بيقول المعايده على المسيحيين حرام …. و كان في نفس ذات الوقت بيدعوا للنزول عشان ياخد بخاطرهم …. هو اللى بيطالب بسقوط مصر و بيشتم سلسفين جدودها … و يرجع يقولك انا بشتمها و بكرهها و نفسي تدمر و اهاجر منها ….. و هو اللى بقاله يومين بياكل و يمصمص في لحم اخوه اللى استشهد غدر و هو بيصلي لربنا في دور عبادته ……  يأخي خاللي عندك دم …. و لا بلاش دي …. لان كل اللى عمل كده مش بني آدم اصلا .

اصل العلاقه بين اليساريين الكولجيه و الاشتراكيين الثوريين  و بين التيار الديني الارهابي … عامله زي علاقة العاهره بالقواد بالظبط … الاتنين ميستغنوش عن بعض … يبينوا ليك انهم مش طايقين بعض … لكن تلاقي القواد يقولك دي بنت حلال و جدعه و سيبها تاكل عيش … و العاهره تقولك ده ابن حلال و رفيق مهنه و بيحميني و بيحمي وجودي .

و مع ان في كل دول العالم و في اوقات المحن الصعبه زي اللى احنا فيها … و ساعة اي تهديد ارهابي … تلاقي الشعب بالكامل واقف بيدعم دولته ايا كان اتجاهه … و لا يهاجمها و لا يطعنها من الداخل ….. لكن الخبراء و ترع المفهوميه المتدفقه و بلاليص النباهه  اللى شككوا و مش قادرين يمسكوا الأورجازم الثورى الاستراتيجي بتاعهم … مش فاهمين إن حادث ارهابي زي ده العالم كله مركز عليه … ولما يطلع رأس الدوله يقول معلومات … فده كلام موزون بميزان من دهب و لا يحتمل التقويل 

قعد يقولك عرفوا منين …..  و هو اصلا وشه واضح و كان ليه ملف محترم في امن الدوله …..  يعني اتعرف على طول … و اصلا  مناخير أهله  دي DNA   لوحدها و مش متكرره كتير …. و الشغل الفني اللى اتعمل كان على اعلي مستوى …. و اتجاب اخوه من بيتهم في ساعتها و اتعمله دي ان ايه  و تم المقارنه ما بينهم و طلع انه متطابق ….. و لان ترع المفهوميه اللى بتفتي تتسم بالجهل الشديد … فهي متعرفش ان جهاز ال DNA  بقي دلوقتي جهاز جوه شنطه متنقله اكبر شويه من شنطة اللاب توب … و بيشتغل بالبطاريه و بيتوصل باللاب توب و بيديك النتيجه في وقت ما بين 25 دقيقه الى 60 دقيقه على الاكثر ….. لكن الفتايين طالعين يكدبوا و يردوا على نفسهم و يقولك دي بتاخد 3 اسابيع  ….. و كلام اخت الارهابي اللى نفت انه يكون هو …. اكيد عندهم اصدق من الجثه ذات نفسها و اصدق من اجهزة الدوله و ال DNA ….. لان الارهابي دايما بيحن لتصديق الارهابي اللى زيه .

 و عامة احنا مش حنناقش الكلام الخايب ده … المهم عندنا انك تعرف اصحابك و تفرز … و تعرف انت مصاحب مين … و بيضمر جواه ايه … و انه بيكره بلده و بيكرهك و بيكره نفسه … و لو جتله الفرصه … حيحرقك حي و يقف يتفرج عليك بكل تشفي …. و ان جواه شيطان بيقوله ان ماحدش بيفهم في الدنيا دي كلها غيره … و انه عشان يبقي صح فلازم يهد البلد و يجيب عاليها واطيها على دماغ شعبها عشان يبقي هو صح و يثبت وجهة نظرة الفااااااشله و اللى بتثبت فشلها يوم بعد يوم … و ان المسيحي ده كائن عايش معانا … المفروض يحارب جنبنا العدو في الحرب بس لما يموت جنبي و هو بيدافع عن بيتي معايا ….. هو حيخش النار و حطلعله لساني ….. و اهو نستريح منه .

مينا و محمد حاربوا في 73 و ماتوا جنب بعض … و نحتسبهم شهداء عند الله …. و الان بنحارب ارهاب اللى بيقتل مننا مينا و محمد و فاطمه و ميري ….  و اكتر من 5000 الاف شهيد من جيش و شرطه و قضاه  و نساء و اطفال و رجال و شيوخ على مدار 6 سنوات ماضيه …..  نحتسبهم شهداء و لا نذكيهم عند الله … ربنا يرحم شهداؤنا

 الوعي و التماسك و اللى بينجح فيه المصريين كل مره بنجاح فائق …. هو لوغاريتم الشعب المصري العظيم ….. احنا ناجحين اننا نحبط الاحباط و نتحدي التحدي … و حننتصر في حربنا على كل القوى اللى بتحاربنا

لمتابعة تعليقاتكم