فنكوش بيع الجنسية المصرية

4 May 2017

فنكوش بيع الجنسية المصرية

—————————-

طبعا الهرى فى موضوع بيع الجنسية المصرية بقاله كام يوم .. واحنا بنعتذر لأصدقائنا عن التأخر فى الكلام عن الموضوع ده .. والحقيقة اننا ماكناش بالفعل هــ نتكلم فى الموضوع ده من الأصل لأنه موضوع خلصان من اساسه ..

ريحوا نفسكوا وماتناقشوش الكلام ده خالص ….

مافيش حاجة اسمها بيع الجنسية المصرية للى يدفع .. والموضوع ده محسوم .. ولن يتم تمريره لأن المبدأ من الاساس مرفوض مجتمعياً وأمنياً … ومن غير فصال !!

الاستاذ الاعلامى المبجل المشهور إيّاه ، طلع فى البرنامج بتاعه يصوت ويجعر ويقول “واييييييييه يعنى .. وفيها اييييييه … والعالم كله بيعمل كدة وأميريكا بجلالة قدرها بتعمل كدة … وتسوى ايييييه يعنى الجنسية المصرية علشان نرفض منحها لأى حد …. وهو يعنى إللى هياخد الجنسية المصرية هيعمل بيها اييييييه يعنى … ده كتر خيره . .. على الاقل هــ يدفع فلوس” .. الخ الخ الخ من الكلام التافه إللى كله مزايدة ومهيصة على الفاضى!!

شوف يا حبيبى انت وهو

مش مقتنع بإن الجنسية المصرية تسوى ، فــ ده حقك .. لكن حقنا إننا مانقتنعش بوجهة نظرك .. ومش كدة وبس .. لكن ونقولك إنها وجهة نظر غلط كمان … هــ تقوللى امريكا .. هــ اقولك أمريكا اساساً مجتمع قائم على الهجرة .. يعنى المجتمع هناك كدة .. ويبقى السؤال ..

هو إحنا مش من وإحنا صعيرين ، إتربينا على إن اللى بيحكم امريكا من خلف الستار هم اصحاب المصالح و اللوبى الصهيونى المتحكم فى المجالس النيابية وفى الكتلة التصويتية الناخبة وفى معظم شركات السلاح وغيرها من الشركات اللى بتتحكم فى الإقتصاد الأميريكى ؟؟ … طب هو مش كل رئيس أميريكى بييجى ، بيطلع يغازل اللوبى ده ، واول جملة بــ تتقال فى الإنتخابات هو ضمان أمن إسرائيل ؟؟ .. طب هو اللوبى الصهيونى ده إتكون إزاى هناك ولييه اليهود الأميريكان ما هاجروش لدولة الميعاد ؟؟ ..

طب بلاش كدة .. هو التنظيم الدولى للإخوان مكانه فين النهاردة ؟؟ مش فى إنجلترا والمانيا وأميريكا ؟ .. طب مش معظم قادة التنظيم وقيادات الصف الثانى والثالث .. والكثير من قواعد الجماعة ، معاهم جنسية اميريكانى وبريطانى وألمانى !!؟؟ … طب اخبارهم إييه النهاردة هناك .. وواصلين لإييه !!؟؟ .. وما مدى مستوى التمكين اللى وصلوا له فى الدول دى ، واللى بيخلى قيادات الدول دى ترفض إنها تعلنهم جماعة إرهابية برغم إن الأجهزة الأمنية والحكومات عارفين ومتأكدين من مدى قذارتهم !!

طب بلاش كل ده … سؤال تانى .. هى فلسطين ضاعت إزاى !!؟؟ .. مش الموضوع بدأ بشراء الراضى من الفلسطينيين بأسعار كبيرة !!؟

طب بلاش ده و ده … سؤال كمان … هو المأسوف على عمره أبو الأمراس اللى حكم مصر فى غفلة من الزمن ، كان اصدر قانون بتجنيس الفلسطينيين بالجنسية المصرية لييه ؟؟ ومنح الأجانب حق تملك الأراضى فى سيناء لييه ؟؟ .. واللى خلى السيسى يصطدم بالجماعة وهو لسة وزير دفاع ، ويصدر قرار عسكرى يبطل قرار رئيس الجمهورية .. و ده كان أول صدام بين السيسى والإخوان !!

الجنسية المصرية عزيزى المهيصاتى ، وعزيزى اللى مش فاهم .. لا تقدر بمال .. عارف لييه ؟؟ .. لأنها تساوى وطن بأكمله .. تساوى مصر بحالها .. بغض النظر عن تفكيرك المريض ، إنها ماتسواش حاجة …

يوم ما مصر تصدر قرار زى ده ، بــ بيع الجنسية المصرية ، هــ تلاقى الملايين نازلة ساعتها زى الرز .. لأن الهدف مش الجنسية .. والهدف مش هو الهدف القريب .. لكن الهدف هو الهدف البعيد .. الهدف هــ يكون الأرض .. هــ يكون الإندماج فى المجتمع المصرى ، والتمكن من ممارسة الحقوق السياسية بحكم الجنسية … يعنى بعد 20 سنة بس ويمكن اقل ، ماتسألش عن سيناء ، وماتسألش عن الوادى الجديد .. وماتسألش عن أراضى كتيرة فى أماكن حيوية .. وماتسألش عن الجيش والشرطة اللى هم العمود الفقرى لبقاء الدولة … وماتسألش عن مجلس الشعب 🙂 .. لأن ساعتها هــ يتصرف مليارات علشان ناس معينة تدخل المجلس .. بغض النظر عن إذا كنا راضيين عن ادائه دلوقتى وإلا لأ .. بس على الأقل اللى فيه مش خاينين ..

ده البلد بتعانى النهاردة من شلة من الممولين و السبوبجية والمنتفعين شوفناهم على مدار الــ 5 سنوات اللى فاتوا ، واللى كان أخرهم أية حجازى ، وكان كل هدفهم إسقاط الدولة ، أو التمكين … وإحنا هنا بنتكلم مصريين الدم و الجنسية والمولد .. فما بالنا بقى باللى جاى من برة .. هى البلد مش مكفيها اللى فيها لما يجيبولنا من برة كمان =D

وإحنا شوفنا عينة زى الكاتب بلال فضل مثلا واللى كان بــ يقوله ولسة بــ يقوله على مصر !!! .. أو تخيلوا واحدة زى توكل كرمان اللى خربت بلدها اليمن ، وجات تدفع النهاردة فلوس (مش بتاعتها طبعا) علشان تاخد الجنسية المصرية … ياترى يبقى إزاى الحاااااال ؟؟؟

ياريت المغيبين يفوقوا من الغيبوبة اللى هم فيها ويرحمونا من الفتاوى بتاعتهم … أما بالنسبة للمصريين المخلصين اللى خايفين على بلدهم .. فــ ماتقلقوش … مش هــ يحصل

أما اللى مش عاجبه الجنسية المصرية ، وشايف إنها مالهاش قيمة وماتسواش .. فــ مافيش مشاكل خالص … بإمكانك التنازل عنها .. إحنا مش ماسكين فيك 🙂

قانون بيع الجنسية لن يمر تحت أى ظرف من الظروف .. فــ سيبكم من الهرى الكتير .. وماتشغلوش بالكو بالعصافير الطايرة 😉 🙂

إقامة جايز .. لكن جنسية … إنسى 🙂

لمتابعة تعليقاتكم