كشف حساب 2017

02 Jan 2018

كشف حساب 2017

———————

أصدقاؤنا أصدقاء صفحة كلام فى الصميم

عودناكم منذ إنشاء الصفحة ، إننا مع بداية كل سنة ، بــ ننشرلكم كشف حساب عن كل ما تم نشره فى خلال العام من موضوعات ومقالات ، والظروف المحيطة بنشر كل مقال ، وأكثر المقالات اللى حققت تفاعل .. بالإضافة لتنامى حجم الأصدقاء من شهر للتانى … !

وبرغم إن المهمة دى مش سهلة بأى حال من الأحوال .. وبرغم إننا بالفعل كنا الصفحة الوحيدة اللى بتعمل كدة .. لكننا كنا بنعمل ده بإرتياح وسعادة شديدة جداً .. لإحساسنا كفريق عمل إننا بنجدد صداقتنا تانى مع اصدقائنا الأعزاء … بالإضافة لإقتناعنا التام بإننا مع فرض إن اللى بنعمله ده شئ مميز .. فهو مش منة ولا تفضل … لكنه واجب علينا .. لأننا بنقدمه لنخبة النخبة من المتفاعلين على الفيسبوك سواء كان من المصريين ، أو حتى من أصدقائنا من الدول العربية .. بنقدمه لناس واعيين ومثقفين وفاهمين .. أو على الأقل عايزين يفهموا حقيقة اللى بيحصل معانا وحوالينا بكل الملابسات وفى حدود المعلومات المتاحة.

ولأن أصدقائنا كلهم أشخاص مش عاديين … ولأنكم كلكم أصبحتم الظهير الشعبى الحقيقى للدولة المصرية .. وأصبح لكم تأثير كبير على كل اللى حواليكم فى العالم الحقيقى .. وكمان تاثير أكبر داخل نطاق العالم الإفتراضى .. عالم الفيسبوك وكل مواقع السوشيال ميديا .. ساحة الحرب المعنوية وسلاح التشكيك اللى بيتم إستخدامهم بكل قذارة من أجل هدف واحد وهو هدم المجتمع المصرى من الداخل وبالتالى هدم الدولة المصرية .. وسواء أقتنعتم بكلاممنا أو لأ .. لكن صدقونى .. إنتم نجحتم نجاح مبهر .. نجحتم فى خلق جبهة صد .. نجحتم إنكم تحاصروا مساحة الكذب .. نجحتم إنكم تخرسوا ناس كتير ، كان الفيسبوك وتويتر هو ملعبهم الأثير .. نجحتم إنكم تقللوا مساحة التشكيك والهجوم على الدولة .. ومش كدة وبس .. لكن كمان فيه منكم كان بيدخل على صفحات مغرضة وممولة ، وبيشتبك بتعليقات مع أصحاب الصفحة واللجان الأليكترونية اللى بتدافع عن الصفحات دى بأسماء مختلفة .. علشان وتستحملوا فى أحيان كتير الإيذاء اللفظى والمعنوى .. علشان حبيبتنا كلنا مصر ..

وعلشان كدة .. ومن منطلق إحساسنا بمدى أهمية ومسئولية الكلمة والحقيقة المكتوبة ، كان قرارنا بإنشاء الموقع الأرشيفى لصفحة كلام فى الصميم علشان نجمع فيه كل المقالات اللى قمنا بنشرها على مدار 4 سنوات .. كخطوة مبدئية على طريق دعم الدولة المصرية .. وعلشان يكون فى إيدين كل الأصدقاء المعلومة الواضحة والتحليل الموضوعى كسلاح للرد على كل الكاذبين والمشككين والمزيفين والمهاجمين للمسار الجديد للدولة المصرية ، واللى ثبت مع الوقت كذبهم وضعف رؤيتهم ، ورهانهم على الحصان الخسران …. وإحنا طبعا نشرنا رابط الموقع أكثر من مرة .. وإحتفلنا كلنا بتدشين الموقع فى حينه 🙂

إحنا كنا كل سنة بنقدم كشف حساب سنوى .. لكن النهاردة وبكل سعادة وفخر ومن خلال موقعكم الأرشيفى بنقدم كشف حساب كامل منذ إنشاء الصفحة .. وبنعيد نشر الرابط لموقع صفحتكم على الإنترنت كوثيقة معلوماتية تحليلية عن أحداث 4 سنوات من أصعب السنوات اللى مرت على مصر فى تاريخها كله ..

أصدقاؤنا أصدقاء صفحة كلام فى الصميم ..

عدد الأصدقاء على الصفحة تخطى مع نهاية عام 2017 حاجز الــ 81 ألف صديق .. يعنى إحنا أصبح موجود معانا 81 ألف مقاتل بكل تاثيرهم فى محيطهم الإجتماعى والأليكترونى … و يكفيكم فخراً إنكم فعلا أصبحتم الظهير الشعبى للدولة المصرية

كل سنة وحضراتكم طيبين ومصر كلها بأمن وأمان .. ونتمنى إننا نفضل دايما كفريق عمل الصفحة ، عند حسن ظن كل الأصدقاء .. مع بداية سنة جديدة مليئة بالتحديات والمفاجئات .. لكن هــ تكون مصر فيها أقوى بكتير … وموعدنا بإذن الله مع تصاعد أسهم مصر خلال 2018 .. وبداية تسارع وتعاظم عجلة القطار اللى إنطلقت فى 2013 .. وظهور قوى للدولة المصرية على مستوى كل الملفات الإقتصادية والسياسية والعسكرية

والقادم أفضل بإذن الله

لمتابعة تعليقاتكم