صلاح الخير .. اللاعب المصرى

05 Jan 2018

صلاح الخير .. اللاعب المصرى

—————————-

فى البداية عايزين نقول مبروك لمصر ولكل المصريين

مبروك حصول محمد صلاح على جائزة أفضل لاعب افريقى لعام 2017

مبروك حصول المنتخب المصرى على جائزة افضل منتخب افريقى لعام 2017

مبروك حصول مدرب المنتخب المصرى هكتور كوبر على جائزة افضل مدرب فى افريقيا لعام 2017 …

والجوائز دى على فكرة مش الجوائز الوحيدة للرياضة المصرية فى هذا العام .. لأن عام 2017 كان عام الرياضة المصرية والألقاب والمداليات بإمتياز .. وخصوصاً على مستوى الألعاب الفردية فى معظم البطولات العالمية فى رياضات السباحة والإسكواش ورفع الأثقال والكراتيه والتايكوندو وسباق الدراجات .. حتى على مستوى أبطال مصر من ذوى القدرات الخاصة … يعنى تحيا مصر بأبنائها .. 🙂

نرجع بقى تانى لموضوع منتخب مصر لكرة القدم والرائع الخلوق محمد صلاح وفوزه بأفضل لاعب افريقى .. واللى أصبح حديث كل بيت مصرى على مختلف إهتماماتهم … محمد صلاح اللى عمره ما نسى أهله وبلدته الصغيرة (قرية نجريج التابعة لمركز بسيون) برغم شهرته .. محمد صلاح اللى إشترى باصات خاصة علشان توصل طلبة المدارس فى بلدته إللى مدارسهم خارج البلد .. محمد صلاح اللى بيصرف على أسر كاملة فى مسقط راسه .. محمد صلاح اللى إتبرع لصندوق تحيا مصر بــ 5 مليون جنيه .. محمد صلاح اللى ماسابش فرصة إلا واعلن فيها تضامنه مع بلده الكبيرة مصر ، وتشجيعه لها و دعمه لكل توجهاتها الحالية … ويمكن هو ده اللى كان السبب فى كم الكره والشتائم اللى طالته هو وعائلته فى الفترة الماضية ، من اصحاب العاهات الفكرية ومؤيدى ((الخط الأحمر)) .. والتشكيك فيه .. والهجوم عليه .. وبالذات ايام مشاكله مع إدارة نادى روما .. لا لشئ .. إلا لأنه بيحب بلده .. ومش بــ ينتمى لأى تيار أو جماعة .. والأهم إنه بــ يحطم تمثال العجوة اللى قام البعض بصنعه للاعب اخر له توجهات كلنا عارفينها 😉

وبالرغم من إن صفحتنا مش بتنساق وراء سفاسف الأمور .. ولا من عادتنا إننا نرد على التفاهات اللى بــ يتم نشرها بين الحين والأخر .. لكن للمكايدة السياسية .. ومن أجل التوعية ضد ما يتم نسجه الأن فى هذا الخصوص .. قررنا إننا نتكلم النهاردة عن اللى بيتقال فى موضوع محمد صلاح … لأن اللى حصل إنه فجأة كدة .. و بقدرة قادر .. تحول محمد صلاح عند الناس اللى ماتتسماش لأيقونة يتم إستغلال نجاحها لضرب الوعى الجمعى للمصريين .. وإستغلاله للهجوم على مصر .. ومايمنعش إنهم بالمرة كدة يرجعوا نجاحه وتفوقه ده كله بإعتبار إنه تتلمذ على إيدين لاعب اخر .. وإنه هو ده سبب النجاح .. وهو اللى سلمه الراية علشان يكمل من بعده .. !! 😄

فى أول تعليق هــ تلاقوا مجموعة تويتات .. أهمها تويتة للصحفى جمال سلطان رئيس تحرير جريدة المصريون .. بيقول فيها إجمالاً إن نجاح محمد صلاح سببه إنه خرج من مصر .. وعلشان كدة نجح .. لأن مصر طاردة للمواهب والكفاءات …. وهى دى البرشامة اللى بيتم تمريرها علشان يتم ضرب فكرة نجاح لاعب مصرى صميم .. وكمان مؤيد للدولة بنظامها الحالى .. وهو ده اللى حارق دمهم .. ده علشان بس تعرفوا كيف تدار الحرب النفسية على الشعب المصرى … وكيف يتم إستخدام اليات البرمجة العصبية والنفسية لضرب الروح المعنوية وهدم مقومات النجاح والرغبة فى تحدى المعوقات داخل نفوس المصريين .. وبالذات عند الأجيال الجديدة من الشباب … وخصوصاً إنه مش هــ يقدر يقنعك إن محمد صلاح لاعب سيئ .. أو يقول حتى إن التصويت كان مدفوع الأجر .. وإن الإنقلاب إشترى افريقيا كلها علشان تصوت لمصر وللاعب المصرى .. لكن يقدر يقول حاجة تانية 😉🙂

طب يا عم جمال سلطان … هو كل أبطال مصر اللى أخدوا جوائز دولية فى كل الرياضات فى 2017 كانوا بيلعبوا فى مصر وإلا برة !؟ 🙂 …..  طب هو مش المدرب الأرجنتينى هكتور كوبر أخد جايزة افضل مدرب فى افريقيا .. ياترى أخدها بمين .. مش بمنتخب مصر وإلا بمنتخب فرنسا !؟ … طب ياترى ميسّى نجح فين .. مش هو بيلعب برضوا فى أسبانيا وإلا فى الأرجنتين … طب رونالدوا البرتغالى بيلعب فى ريال مدريد الأسبانى وإلا فى مركز شباب لشبونة البرتغالى .. طب لويس سواريز بيلعب فى اسبانيا وإلا فى نادى كفر بطاطس فى اورجواى .. طب نيمار نجح مع برشلونة الأسبانى ثم باريس سان جيرمان الفرنسى .. وإلا كنا متابعينه وهو بيلعب فى الوسعاية فى ريوديجانيرو فى البرازيل … طب إبراهيموفيتش السويدى .. طب دروجبة الإيفوارى … وغيرهم وغيرهم كتير .. ياترى كل دوول بقى بلادهم طاردة للكفائات !!!؟؟ … طب بلاش كل دوول … هو عمرو زكى اللى كان أحد نجوم منتخب مصر وافريقيا من 2006 لحد 2010 .. مش راح إحترف فى إنجلترا !؟ … راح وهو نجم من نجوم مصر .. ونجح فى البداية وبعدين فشل فشل ذريع ، ورجع مصر يجر اذيال الخيبة مش كدة …. طب ياترى محمود الخطيب اللى إتكلمت عنه معظم المجلات الرياضية الأجنبية فى عصره .. ياترى نجح فى مصر وإلا برة مصر !!؟ …. إنتم فعلا اصبحتم مثيرين للشفقة .. ولا تعبرون إلا عن القطيع الذى يتابعكم ويردد ما تقولونه بلا وعى أو محاولة حتى مجرد محاولة للتفكير فيه !!!

المبهر بقى فى التويتة التانية لمحمد ناصر بتاع القنوات الإخوانية فى تركيا ، واللى نشر على حسابه صورة للخط الأحمر وهو حاطط إيده على رأس محمد صلاح .. وكاتب تعليق إنه من هنا كانت البداية 🙂 .. ومسك الختام لما يطلع ((الخط الأحمر)) على حسابه الرسمى ويهنئ محمد صلاح ويصفه بأنه نجم العرب وفخرهم .. مش إنه نجم مصر والمصريين .. 😄 …… وإوعوا تفتكروا إن الكلام ده مجرد تصرفات فردية ، أو إنه وليد الصدفة …… أه كان ممكن يبقى صدفة لو صدر من ناس تانية ….. ناس عادية مالهاش توجهات إحنا عارفينها كويس .. لكن  لأ طبعاً .. ده شئ مدروس ومخطط .. و بــ يتم بناء على توجيهات وتكليفات محددة .. هدفها الأول والأخير هو البرمجة العصبية .. وتزييف الوعي وضربه فى مقتل .. وخلق حالة من الجدل للتغطية على الحدث الأصلى اللى هو مثار فخر لكل المصريين ….. المصريين اللى بجد ..

خلوا بالكم يا مصريين من السم اللى بــ يتم تغليفه بغلاف أنيق بيلعب على العقل الباطن وعلى المعنويات .. من اجل ترسيخ قناعات سلبية .. هــ تظهر على المدى البعيد أول ما يتم إستدعائها من العقل الباطن فى توقيتات اخرى ..

مرة اخرى مبروك لمصر ولكل المصريين ..

مبروك لمحمد صلاح

مبروك لمنتخب مصر

مبروك لمدرب منتخب مصر

مبروك لكل الرياضيين المصريين فى كل الرياضات الجماعية والفردية .. واللى رفعوا إسم مصر عالى فى كل المحافل الرياضية فى عام 2017 .. وعقبال كل الأعوام القادمة بإذن الله …

و دايما يا مصر ..

من نصر لنصر .. 🙂 🙂 

لمتابعة تعليقاتكم