15 Feb 2018
في بئر الخيانة سقطوا … و للريموت كنترول سلموا انفسهم
———————————————————
في عام 2010 و اثناء حفلة وداع مسؤول كبير في احد اجهزة الاستخبارات الاسرائيلية… ألقي محاضرة لمودعيه ليتفاخر بإنجازات الجهاز اثناء توليه قيادته قال فيه …. “لقد حققنا نجاحا باهرا في التعامل مع المصريين … لقد حققنا اختراقات مهمه جدا و عديده وعلى كل المستويات و في كل المجالات داخل نسيج المجتمع المصري …. فإذا كان المصريون نجحوا في اقتحام خط بارليف في السبعينات …. فإننا و علي مدار سنين قد نجحنا في بناء خط بارليف جديد لهم داخل القاهره نفسها سيصطدم به المصريين بعد النظام الحالي… سيلتفون في حلقات مفرغه و سيفشلون في فعل ما فعلوه بخطنا الدفاعي في 73 …. سيدورون حوله في حلقات مفرغه و سيتصارعون فيما بينهم حتي يفكك المجتمع و يحل نفسه بنفسه … و لن تنجح اي محاولات لانقاذهم حتي و لو تدخل الجيش بكل قوته “
في عام 2005 تم توقيع اتفاقية تصدير الغاز لاسرائيل …. و اللى كانت من اهم المواضيع اللى كانت بتستخدمها احزاب المعارضة و الحركات السياسية ذريعة لها للهجوم على الدولة المصرية و المتاجرة و المزايدة على الدولة المصرية لكسب المزيد من المؤيدين حولهم …. و مع ان بنود الاتفاقية دي مكانتش متاحة لعوام الناس و محدش منهم اطلع عليها … الا اننا شوفنا عشرات الخبراء الكذابين المدلسين اللى كانوا بيطلعوا في الفضائيات و بيكتبوا في الجرايد و هم بيحلفوا طلاق تلاتة ان مصر بتبيع الغاز لاسرائيل مجانا او بسعر 0.75 دولار للوحده الحرارية الواحدة و بيستشهدوا باتفاقية روسيا مع اوروبا انها بتبيع الوحده الحراريه ب 11 دولار … و شوفنا ازاي كان الاخوان و النوشتاء بيعملوا فاعلياتهم و ينزلوا الشوارع يهيجوا الناس و يقنعوهم ان مصر داعمه للكيان الاسرائيلي …. و ان الدولة المصرية خائنة ….. و بعد 2011 و مع بدء محاكمات وزير البترول و كل من له علاقه بالاتفاقية … تتضح الحقيقة …. ان كل الرموز السياسيه اللى كانت بتتكلم طلعوا كدابين و مدلسين … و بالوثائق الرسمية اللى راحت في المحكمه طلع ان مصر كانت بتبيع الغاز لاسرائيل بـ 2.75 دولار … و ان تكلفة الخط و الانشاءات كانت على حسابهم مش حسابنا …. و ان مصر اصبحت بتتحكم في 60% من الطاقه بتاعة اسرائيل و هو ما يضع مصر في مركز قوة امامها زي ما هو حاصل ما بين روسيا و اوروبا …. و ان الغاز الروسي لو فعلا بـ 11 دولار … الا ان اللى بتاخده روسيا في اديها لا يتجاوز 2 دولار … لان الفرق بيروح في ايجار الارض اللى بيعدي عليه الانابيب بين الدول الاوروبيه لطول المسافه و هو عكس الوضع ما بين مصر و اسرائيل.
في عام 2008 و في مدينة دمياط … تجمع رموز الاخوان و اللى كان المجتمع ساعتها متقبلهم و متعاطف معاهم و بيحترمهم …. ومجموعه النوشتاء المدنيين اللى عرفنا بعد كده انهم راضعين من نفس الخواجه اللى بيدير الاخوان … و معاهم العديد من الشخصيات العامه و ما كان يطلق عليهم وقتها رموزسياسيه و زعماء ( و اللى اكتشفنا بعد كده انهم كلهم شمال ) … قاموا بتهييج الرأي العام في الشارع الدمياطي ضد انشاء مصنع اجريوم للبتروكيماويات ….. و شوفنا رموز الاخوان و هم بيسخنوا الناس على ابواب الجوامع بعد صلاة الجمعه و بيطلعوا معاهم في مظاهرات لغاية موقع المصنع … و بالرغم من تاكيد الحكومه انها ستتخذ كل اجراءات حماية البيئه و انها ستتخذ كل التدابير و المعايير العالميه في انشاء المصنع و اسلوب ادارته ….. الا انه تبارى العديد من الاعلاميين في استضافة الخبراء و الدكاتره اللى اقسموا و حلفوا بالطلاق تلاته ان الحكومه كذابه و ان المصنع ده بالذات دونا عن اي مصنع تاني هيموت الناس و حيدمر البيئه و ان الحكومه بتبيع الموت للشعب في مقابل المكسب المادي…. و استشهدوا ساعتها بمقالات في صحف اجنبيه و تقارير دوليه ان المصنع ده بالذات حيصيب الشعب بامراض الدنيا و الاخره…. و مع ان المصنع ماكانش اتبني لسه … الا انه نزل بعدها العديد من الفيديوهات اللى بتصور طيور و جاموس و معيز نافقه و ناس بتعيط جنبها و بيستعطفوا الناس انهم ينقذوهم من انشاء مصنع الموت ….. حتي نجحوا في تجميد خطة بناء المصنع.
و في عام 2011 و بعد احداث يناير …. اشترت الشركه الوطنيه موبكو حصة اجريوم الكنديه لتعلن انها ستقوم ببناء المصنع باستثمارات مصريه خالصه … ليقوم النوشتاااء و الاخوان مره اخرى بتهيج الناس و يقومون بحصار ميناء دمياط و منع البضائع من الدخول او الخروج من الميناء للضغط على الحكومه لعدم انشاء المصنع ده بالذات …. مع انه يوجد مصنع اخر للبتروكوماويات يبعد 1000 متر فقط من الموقع ده … الا انه كانت الرساله واضحه … المصنع ده بالذات مش حيتعمل…… و ينجحوا للمره الثانيه في ايقاف انشاء المصنع .
عشان تيجي سنة 2015 و تقوم الهيئه الهندسيه للقوات المسلحه بانشاؤه باستثمارات تصل الى 2 مليار دولار و يتم افتتاحه في 2017 ….. و بعدها نكتشف ان لا بقر و طيور ماتت … و لا ناس اتسممت … و ان القصه كلها ان انتاج المصنع ده ازاح قطر من احتكارها لتصنيع الاسمده في المنطقه لتحل محلها مصر …. و انه سيوفر لمصر مئات الملايين من الدولارات سنويا كانت بتستورد بهم مصر الاسمده و كمان حيكون دعامه هاااائله لتنفيذ خطة استصلاح المليون و نصف فدان ده غير دعم الاقتصاد لما يتم تصدير الفائض بالعمله الصعبه …. يعني الهدف الحقيقي من الفيلم الكبير اللى اتعمل ساعتها مكانش ارواح المواطنين و لا الناس الغلابه … لكن كان منع مصر من مزاحمتها الكبار في سوق البتروكيماويات العالمي و خنقها اقتصاديه….
في عام 2014 اعلنت مصر عن البدء في مشروع عملاق لتنفيذ الحلم المصري اللى كان كل الناس بتطالب بيه على مر عشرات السنين و هو تنمية محور قناة السويس و تحويلها لمنطقة جذب صناعي عالمي … و كان بداية المشروع هو ازدواج الممر الملاحي لقناة السويس … و تم البدء في حفر الممر الملاحي المزدوج في عام واحد فقط بشركات مصريه و بتمويل مصري ….. ليفاجىء الشعب المصري العالم بجمع 8 مليار دولار في اقل من اسبوع واحد في سابقه هي الاولي في التاريخ …..
لنرى بعدها عشرات الخبراء المصريين اللى منهم موجود بالفعل في مناصب علميه مرموقه من اول اساتذه جامعات الى وكالة ناسا الامريكيه بذات نفسها و جزء اخر لا نعرفهم … بتتفتح لهم مساحات كبيره على شاشات الفضائيات ….. و تتفتح لهم المراكز العلميه في الخارج ليلقوا المحاضرات و هم بيتباكوا على حال مصر و مصلحتها اللى ضاعت و هم بيحكوا و بياكدوا على خطورة انشاء هذا المشروع على جسم القناة القديم … ولدرجة انهم حلفوا طلاق تلاته ان جسم القناه القديم سينهار و البيئه البحريه و الشعب المرجانيه في شرم الشيخ ستموت …. و ما ذنب النباتات … و طلع علينا نافورة اقتصاديين بيقنعونا باستماته ان الفلوس ضاعت على الشعب و ان البنوك ستفلس و لن تستطيع الالتزام بدفع العوائد ..
و لما الناس قبضت العوائد … بدأو يقنعونا ان المعدات بتدفن نفسها بنفسها في انهيارات الرمال و ان فيه مشاكل ضخمه في تنفيذ المشروع …. و ازاي اذابة الجليد في القطب الشمالي اتحدت مع ذكور القريدس و السلطعون البحري في توسيع مجري ملاحي سيكون بديلا لقناة السويس في اقصى شمال الكره الارضيه … و ازاي القناديل حتنتقم و حتعطل الملاحه في القناه الجديده لما تدخل في رفاصات المراكب ….
وفي 2015 يتم افتتاح القناه الجديده …. ليختفي بعدها الخبراء الجيولوجيين و الاقتصاديين … و يطلع لينا خبراء الملاحه اللى قعدوا يحلفوا ان الخطوط الملاحيه تركت قناة السويس و بقت بتستخدم راس الرجاء الصالح و القناه بتخسر …… و استمر هذا السيرك حتي عام 2017 لنكتشف تحقيق قناة السويس اعلي دخل في تاريخها بالتوازي مع استكمال بناء المناطق الصناعيه …. و نتفاجىء بالسبب الحقيقي لكل هذا السيرك …. مع اعلان تركيا عن مشروع كوبي و بيست من مشروع قناة السويس بالمناطق الصناعيه و اللوجيستيه و تبدأ تسوق ليه لتمويله و اجتذاب الشركات العالميه لنقل مصانعها هناك …. يعني الهدف الحقيقي مكانش عشان فلوس الناس اللى حتضيع و لا لانقاذ قناديل البحر و السلطعون البحري اللى حيموتوا و لا انهيار القناه القديمه … و لكن لخنق مصر و تركيعها اقتصاديا و تنفيذ نفس المشروع لصالح دوله اخرى.
في عام 2013 … و لان مصر ممنوعه من عشرات السنين انها تستنفع اقتصاديا من خيرات البترول و الغاز في البحرين المتوسط و الابيض بقوة القانون الدولي ….. قامت مصر بشكل مفاجىء للجميع بترسيم الحدود البحريه مع قبرص و اللى بدأت اللجان الفنيه العمل فيها منذ عام 2004 ……. و عشان نبقي عارفين … فان الترسيم البحري مش بيبقي فيه تفاوض و لا فتاوي لانها بتخضع لمعايير اتفاقية الامم المتحده لقانون البحار لترسيم الحدود البحريه اللى موقع عليها جميع دول العالم (ما عدا تركيا) …. و مع ان معايير الاتفاقيه دي ملزمه للجميع بقوة القانون الدولي لان معاييرها موحده على الجميع ….. و لتطبيقها بتكون عمليه فنيه معقده جدا و بيشتغل عليها جيش من الخبراء المختلفين سواء الجيولوجيين او البحريين او خبراء المساحه و القانونيين و غيرها من التخصصات المختلفه ….. لكن و زي ما يكون الموضوع بالامر و التليفون ….. طلع علينا ما يسمون انفسهم زعماء سياسيين و نوشتاااء عشان يهدوا الدنيا و يقولوا ان مصر تنازلت عن حقوقها البحريه لاسرائيل و ان الجيش تجار و خونه و بيبيعوا حقوق مصر (مش عارف بكام) …. و واحد منهم رفع قضيه على الحكومه المصريه لوقف الاتفاقيه لحرمان مصر من التنقيب البحري عن الغاز و البترول في مياهنا الاقتصاديه …. و كل ده بالرغم من انهم جميعا لا بيفهموا في المساحه و لا القانون البحري و لا الدولي و لا قالولنا على اي اساس قالوا الكلام ده …. لكن المهم نعمل هيصه و نحاول نضغط على الحكومه انها متكملش الموضوع ده باي ثمن …..
و في عام 2016 قامت مصر بترسيم الحدود البحريه مع المملكه العربيه السعوديه و اللى استتبعها تفعيل مصر للوثائق الدوليه العديده المودعه في الامم المتحده منذ عام 1967 و حتي عام 1990 … التي تنص صراحة على سعودية الجزيرتين …. و مع ان كان فيه لجان فنيه بين الدولتين كانت شغاله منذ عام 2010 و انهت اعمالها اللى كان جزء من نتائجها هو صحة ملكية الجزيرتين للسعوديه ….. الا ان نفس التليفون وصل و اتعمل نفس الفيلم و اتنصب السيرك من ناس لا تعلم و لا تفهم يعني ايه اتفاقية الامم المتحده لقانون البحار و لا اطلعوا على وثائق تاريخيه و لا عرفوا ايه الموضوع بالظبط … بس الجيش خائن و باع الارض ( برضوا مش عارف بكام) و قاموا بوقفات احتجاجيه و تهييج الناس … و شوفنا كلنا ان اللى بيقود الحركات دي هم نفس الناس اللى بتكره الجيش و الوطن و بيعلنوا في كل فرصه امنيتهم ان البلد تتطربق على اللى فيها و ان الجيش يتفكك و البلد تولع … لكن بقدرة قادر … بقوا وطنيين و بيخافوا على الارض 😊 … و نزل على النت ماسورة خرائط مضروبة و وثائق فوتوشوب و فيديوهات ليست في محلها … المهم نهيج الناس و نوقف مصر و نمنعها عن دخولها سوق الغاز و الطاقه العالمي…. و للاسف تتبعهم ناس كتير مهاويس باللايكات على بوستاتهم … مش مهم انا بقول ايه … لكن المهم اللايك و الشير.
و بالتوازي …. و مع دخول ايطاليا بثقلها في التنقيب البحري في حدود مصر البحريه في البحر المتوسط …. اتقتل ريجيني … و شوفنا هم هم نفس الوجوه بنفس ذات نفسهم …. طلعوا على السفاره الايطاليه يعملوا وقفات تضامن و يتصوروا و هم بيعيطوا و بيولعوا الشموع على روحه و هم بيتهموا الدوله المصريه بقتله و تعذيبه … و لقينا بقدرة قادر ام خالد سعيد طالعه على التليفزيونات هناك و هي بتواسي ام ريجيني و بتاكدلها ان اللى قتل خالد سعيد هو اللى قتل ابنها … و يتبعت للبرلمان الايطالي و القنوات الاعلاميه سيل من خطابات و مستندات مزوره لإلصاق التهمه بالدوله المصريه عشان يهيجوا الراي العام الايطالي لقطع العلاقات و ايقاف التعاون المصري الايطالي في التنقيب على الغاز .
و تيجي سنة 2018 و يتم افتتاح حقل ظهر اللى بيعتبر اكبر اكتشاف بحري في البحر المتوسط و اللى نقل مصر بالفعل نقله جبااااره اقتصاديه و سياسيا و تنمويا و غير خريطة المنطقه الجيوسياسيه ….. و هو مجرد اول حقل … يعني لسه بنقول يا هادي ….. فتتضح الحقيقه …. لما شوفنا جنان اسرائيل لما مالقتش حد تمسك في خناقه غير لبنان و تقول مربع 9 بتاعي … و بعدها شوفنا القردغان جن جنونه و نزل قطعه البحريه في البحر المتوسط ليمنع سفن شركة ايني الايطاليه من التنقيب في الجانب القبرصي و يعلن انه غير معترف بالاتفاقيه و يعلن انه عايز حقه في الغاز … و طبعا الجيش المصري قاله كسر حوقك …. لتنتشر البحريه المصريه لحماية مياهها الاقتصاديه و تحرك ايطاليا اسطولها لحمايه سفن ايني….
و يبان لينا نفس الوجوه القميئه لما جتلها التعليمات تقوم بنفس الدور … و اللى اخرها تصريحات المدعوا ابو الفتوح من لندن لما اعترض على اللى بتعمله مصر و طلب مصر بالتواصل مع قردوغان و يتفاوضوا و يرسموا الحدود من تاني ما بينهم و يدوا تركيا اللى هي عايزاه.
و طبعا ماننساش زيارة الرئيس الفرنسي فرانسوا اولاند لما جه مصر في 2015 … لما نفس الوجوه المشبوهة دي و اللى بيسموا نفسهم معارضه و رموز حزبيه لما راحوا زاروه في مقر اقامته … و طلبوا منه ايقاف اتفاقيات التسليح مع مصر و وقف صفقات الرافال و الميستيرال و الجويند … و عدم دعم مصر سياسيا و قدموا ليه مستندات مزوره عن الكمع و الزولم و الإضطهاد و الاعتقالات و ان اللى بيفتح بقه في مصر بيغتصبوه … فسابهم يخلصوا كلامهم و قالهم كلمه واحده … لو اللى بتقولوه صحيح ازاي انتم متسابين تيجوا لغاية عندي و تقولوا الكلام ده بكل الحريه و محدش منعكم او حتي حصلكم حاجه !!!! …. مصر دوله محترمه و لينا معاها علاقات استراتيجيه.
اللى فات ده بعض الامثله من السيرك اللى كان منصوب في مصر …. و اللى اتكلمنا عليه عشرات المرات في مقالات مفصله و اللى حتلاقوها في موقع الصفحه الارشيفي و بخاصه في قسمي “النخبه المصريه” … “الهويه المصريه”.
القصه و ما فيها انه تم زرع احزاب كارتونيه في مصر لا وزن لهم فعليا و لا قيمه لهم … مجموعه من النكرات … البعض منهم مريض بمرض الشهره و التصوير خلف الميكروفون … و الاخر يحركه الدولار … و الباقي ولاؤهم التام للخواجه اللى بيديرهم و مجندهم لضرب مصر و ضرب اي نجاح او نهضه تقوم بيها …. كل واحد فيهم عامل حزب او مسمي نفسه حركه او اي اسم “مجعلص” يوحي بالاهميه …. و الميديا و الاعلام ينفخ فيه و يحسس الناس انه حاجه كبيره و ان جحافل الملايين من الشعب بيمشوا وراه … و يعمل مؤتمرات و لقائات خلف الميكروفونات …. عشان تذيع القنوات و الجرائد الاجنبيه اللى مراسليها هم من نفس اعضاء الاحزاب و الجماعات المشبوهه دي …. فتنشر عنهم الجرائد العالميه المقالات مدفوعة الاجر من قطر و تركيا و جماعه الاخوان الارهابيه … عشان يحسسوك انهم حاجه كبيره و ليهم تأثير رهيب ….. و عمرنا ما ننسي لما كان 3 او 4 شباب صايع و هم قاعدين على قهوه بيخمسوا في سيجاره ملفوفه في التحرير و يفتح اللاب توب ينشر كلمتين بعنوان … “إئتلاف شباب الثوره المتحد يندد و يشجب” …. كنت تلاقي بعدها ال BBC و الجزيره و القنوات العالميه ناشره البيان و بيعملوا معاهم مقابلات …. و يحسسك ان كلمة إئتلاف دي واقف وراها 5 مليون في الشارع …. لكن في الحقيقه بتلاقيهم مختفيين و مش بيظهروا في الشوارع لان الشعب الحقيقي بيكرههم …. بيظهروا بس كل اربع سنوات …. في موسم و مولد سيدي الانتخابات … لان الوقت ده بيعملوا فيه السبوبه اللى حيعيشوا عليها للاربع سنوات الجايه……
نفس الوجوه دول هم اللى هيجوا الناس في احداث يناير … و هم اللى كانوا ظهير سياسي و داعم لكل حركات التخريب اللى حصلت من اول حرق الاقسام لغاية حرق المجمع العلمي … و هم من وصفوا كل من شارك في التخريب بالابطال … و هم من لبسونا في تنظيم ارهابي و اوصلوه للحكم ….. و هم من يسمون الارهابي صاحب قضيه … و الوطني مطبلاتي …. و الجاسوس ناشط و اللى بيبلغ عنه امنجي …. و هم من صفقوا للحفاظ على ارواح الخاطفين و المخطوفين … و هم من يعارضون مواجهة الارهابيين و يطالبون بحقوق الارهابي … و هم من صدعونا باكذوبة الاختفاء القصري … و هم من يسارعون بتنظيم فاعليات على سلالم السفارات الاجنبيه للتعاطف مع اي ضحيه واحده اجنبيه … و نرى السكون المصحوب بابتسامه الشماته في الالاف الشهداء المصريين ضحايا الارهاب اللى هم بيدعموه.
و نفس الكلام و الكذبه دي و اللى للاسف ناس كتيييير لسه مصدقاها …. هى اكذوبة “منظمة العفو الدوليه” …. اللى اعلامنا المبجل بينشروا عنها بيانتها و كأنها بيانات من مجلس الامن …. و اقنعوا الكثير من الشعب انها منظمه دوليه لها وزنها …. و محدش بيقول الحقيقه انها مجرد منظمه اهليه زي الجمعيات الخيريه اللى بتتعمل عندنا في مصر مقرها كان شقة في لندن … يعني عنوانها لندن الدور التاني …. بيتم تمويلها من افراد عاديين محدش يعرفهم …. و ان تقاريرها لا قيمة لها … و ان اي جريده بتطبع تحت بير السلم له مصداقيه عن تقاريرها المشبوهه و المسيسه اللى رائحة الضائن دائما و ابدا تفوح منها …. و اللى دايما بنلاقي منظمة الاخوان الارهابيه تعتمد علي تقاريرها على مدار عشرات السنين بمبدأ “من دقنه و فتله”.
و هو نفس الكلام على منظمة ” هيومن رايتس ووتش” … اللى هي منظمه اهليه تابعه للمجتمع المدني الامريكي … يعني منظمه غير رسميه و لا ليها اي تأثير قانوني ….
و غيرها من المنظمات و الهيئات اللى عامله زي البالونه المنفوخه على الفاضي …. ماهو مش معني ان واحد عمل شركه تحت بير السلم و سماها ” الاكاديميه الالمانيه الفرنسيه للقضاء على الفئران” … اننا نتعامل معها على انها اكاديميه بالفعل و مسؤول عنها ميركل و ماكرون شخصيا .
و اخيرا ….. مصر بتنضف …. لو حضرتك معارض و عندك فكر حقيقي صحيح و قابل للتطبيق و تملك مشروع وطني حقيقي …. الناس حتساندك …. و ساعتها حتقدر تعمل حزب سياسي و تدخل البرلمان و حتحاول تطبق فكرك ده فعليا في اطار شرعي و رسمي و قانوني … لكن لو حضرتك فاشل و مش عندك غير التنظير و محاربة الدوله و نظامها الجمهوري و مؤسساتها الرسميه … مصيرك حيكون مش احسن من النخبه الفاشله العره …. اللى الشعب المصري لفظها و احتقرها … و يوم مناه لما يخلص منهم و هو بيغني و يقول تسلم الايادي.
كم الدول و الكيانات اللى تآمرت على مصر محدش يقدر يتصورها …. و كم الخيانه الداخليه و الناس اللى باعت نفسها بمنتهي الخسه و الحقاره لا يتصورهم احد …. و لكن كل ذلك تحطم على صخرة تماسك الشعب المصري …. لان دائما و ابدا تتحقق كلمة الرسول الكريم “هم و اهلهم في رباط الى يوم القيامه”.
تحياتنا