25 May 2014
عزيزي المواطن عزرا بن عميتاي الرساله الثانيه – كذبة 60 سنة حكم عسكري
—————————————————————————
ضحكوا عليك و خلوك تكره جيش بلدك …. و خلوك تكره المؤسسه الناجحه الوحيده اللى شايلاك و شايله فشلك لسنين طويله.
ضحكوا عليك لما قالولك ان سبب فشلك ( و اكرر فشلك ) في الحياه المدنيه و السياسيه هو الجيش عشان تكرهه.
ضحكوا عليك لما قالولك ان سبب فساد نخبتك المدنيه هو الجيش عشان تكرهه.
ضحكوا عليك لما قالولك ان سبب فشل نخبتك السياسيه و جشعهم و انتهازيتهم السياسيه هو الجيش عشان تكرهه.
ضحكوا عليك لما قالولك ان سبب فساد رجال اعمال و تدخلهم في السياسه هو الجيش عشان تكرهه.
ضحكوا عليك لما اقنعوك بكذبة 60 سنة حكم عسكري عشان يضربوا عصفورين بحجر واحد ….. عشان يبعدوا عنك فكره فشلك كمدني و متحاسبش نفسك و تصلح من احوالك و كمان تسقط فشلك علي المؤسسه الناجحه اللى شايلاك و شايله بلدك فتكرهها و تحاول تسقطها و تبقي فاشله زيك.
يا عزرا الحكم العسكري يعني حكومة عسكريه و وزراء عسكريين و قوانين عسكريه مش مدنيه ( زي اللى موجود دلوقتي في تايلاند او اللى كان موجود في بعض الدول الافريقيه )…… يعني انت كمدني ملكش وجود اساسا و ملكش اي حقوق …..
طب تعرف تاريخيا ده كان موجود في مصر و لا لأ . طب علشان مهم جدا تأصيل الامور و ضبط المصطلحات اللى عمال ترددها زي البغبغان و انت بتنفذ ما يريده و يتمناه اعداء وطنك احب اعرفك حاجه عن تاريخ بلدك.
مصر اتشكلت فيها اول وزاره عسكريه في 7 سبتمبر 52 بعد وزارة على ماهر باشا بقيادة اللواء محمد نجيب …. و مرورا باحد عشر وزارة كان يرأسها عسكريين في عهد عبد الناصر تم تشكيل اول وزارة مدنيه بقيادة د/ عزيز صدقي في 17 يناير 1972 في عهد السادات بعد ثورة التصحيح و تم اطلاق الاحزاب المدنيه.
و حريحك و أعتبر ان ال 20 سنة دول كانوا حكم عسكري مع ان مصر كان فيها دستور مدني و قوانين مدنيه ……
تخيل بقي ان في ظل الـ 11 حكومه عسكريه دي ….. مصر بنت السد العالي و مصانع الحديد و الصلب و النحاس و الالومنيوم و مناجم الفوسفات و تم اقرار قوانين الاصلاح الزراعي و قوانين التامينات الاجتماعيه و قوانين العمل و مجانية التعليم و القطاع العام بكل خدماته (العدالة الاجتماعيه اللى فلقتنا بيها) و كان العصر الذهبي للصانع و الفلاح و الطبقه الوسطي و كان العصر الذهبي للازهر اللى تواجد على الارض في دول العالم كافة سواء شرقا او غربا او في افريقيا و قادت مصر و دعمت دول العالم في تحررها من الاستعمار.
و طبعا قبل ما تسخن و تقولي النكسه و انت فرحان ….. حقولك الجيش اعترف باخطاؤه بعد العدوان بثلاث ايام فقط و صلحها و حارب و انتصر و رجع ارضنا ….. فياريت تتعلم ازاي تتعلم من اخطائك و تنجح زيه.
بس كل ده كان على حساب الحريات و الحياه السياسية و كان ليه سلبياته ……و انا موافقك على ده ……. فالحمد لله من سنة 72 لغاية دلوقتي حكوماتنا كلها مدنيه و الدستور يحمي تكوين الاحزاب ….. و بقينا عايشين حياه سياسية مدنية.
تخيل بقي الوكسه السوده و الجهل اللى انت فيه و الشيزوفرينيا بتاعتك انك بتقول انك ضد الجيش و الحكم العسكري و انت طوال السنين اللى فاتت بتصرخ من الفساد اللى اهدر كل انجازات الـ 11 حكومه عسكريه اللى حكموا مصر….. من تدمير القطاع العام و بيعه و و افساد العداله الاجتماعيه و محاربة الصناعه و الصانع و الفلاح و حتي تحجيم دور الازهر. 🙂 🙂 🙂 🙂
و اوعي تقولي ان السادات و مبارك عشان كانوا عسكريين يبقي ده كان حكم عسكري ….. مهو متبقاش عزرا و كمان جاهل …. لان ده معناه ان المجلس العسكري كان لازم يوافق على اي قانون كان بيقره مجلس الشعب او اي قرار بياخدة مجلس الوزراء و ده مكنش بيحصل و لا موجود اصلا …..
انت بس اللى مكنش ليك وجود سياسي ليه قواعد شعبيه تقدر تفرض فيه وجهة نظرك …….. و سبب فشلك ده حبقي أقلهولك في الرسائل الجايه.
اوعي تفكر اني بطبل لعودة الحكم العسكري مره تانيه ….. لان حتي المؤسسه العسكريه مش عايزه تحكم و لا عايزه من اصله تخش في السياسه و تتعامل مع طبقة سياسيين فاشلين و فاسدين …..
و حتي مش عايزه تتعامل مع اي جهه مدنيه حتي في اكلها و شربها ….. لانها لا تحتمل التعامل مع الفشل الاداري المدني.
عزيزي عزرا …. يا ريت ميضحكش عليك و تعمل على ما يتمناه عدو بلدك ….. و تنفذ ليه اللى هو مش عارف يعمله …….
اختلف على اسلوب الحكم و على طريقة ادارة الحكم ….. لكن تختلف على الدولة و مقوماتها و اعمدتها اللى منها الجيش غلط يا حبيبي ….. افهم بقي .
جيش الوطن هو شرفه و حمايته و مصدر فخر ليه …… و عمري ما شفت مواطن في اي دولة بيكره جيش بلده بالشكل ده ……. المشكله فيك انت ….. صلح نفسك الاول و انجح يا عزرا و بعدين ابقي اتكلم و ساعتها بس حنسمعلك.
فـــوق يا عزرا !!!!!!!!
لمتابعة تعليقاتكم