21 Jun 2014
بجد عيب …
——-
لحظة واحدة بس ، وقبل ماتفهم كلامى غلط ، أنا مش باقول عيب على اللى فى الصورة .. لإن الصورة دى فجأة إنتشرت زى ما بيقولوا بالعربى .. “إنتشار النار فى الهشيم” على كثير من الصفحات والجروبات ، وحتى جريدة اليوم السابع عملت عليها إستقصاء ، وكل اللى عنده كلمة دخل يعلق عليها فى كل المواقع والصفحات .. منهم اللى علق بــ أدب ومنهم اللى تبرأ من المنظر ، ومنهم اللى سب ولعن فى سنسفيل الشعب المصرى وجدود جدوده ، وكأن من ينتقدون هذا المنظر ليسوا من الشعب المصرى ، وكلهم تحوّلوا بقدرة قادر إلى أولاد ، ذوات وعمرهم ما عملوا الحاجات الوحشة دى !!!
إرحمونا يرحمكم الله … وأى حد قبل ما يقعد يتفلحس وينتقد وينظّر .. ويقعد يشتم فى خلق الله ، على إعتبار إنه هو أحسن من الكل ياريت بس يقول لنا كدة:
– هل فكر سيادته إييه هو حجم الكثافة السكانية للمنطقة اللى موجود فيها الصندوق ده !؟
– هل الصندوق ده كافى لتغطية إحتياجات المنطقة وإلا ﻷ !؟
– ياترى سيارة القمامة بتعدى تفضى الصندوق ده كام مرة فى اليوم !؟
– ياترى سيادته سمع حاجة عن النبّاشين ، وإلّا الناس دى مجرّد إشاعة فى مصر !!؟؟
– ياترى لو سيادته كان من سكان المنطقة ونزل لقى الصندوق مليان ، هــ يرجع بكيس الزبالة بتاعه للبيت ، وإلّا هــ يأكل الزبالة ويمزمز فيها وهو بيتمشى علشان ياحرام مايوسّخش الأرض !!؟؟
– هل سيادته سأل نفسه ، لييه شكل الصندوق غريب كدة ومش زى الشكل المعتاد !!؟؟
إرحمونا يرحكم الله …
بالتأكيد هناك عادات و أساليب معيشية ، وأخلاقيات سيئة عند الكثير مننا ، وبعضنا ينقصه التحضر فى المعاملات اليومية ، وانا بنفسى رأيت الكثير من التصرفات المخزية عند البعض لدرجة توصل إن شخص يرمى كيس القمامة من الدور التاسع تكاسلاً .. !! .. ويحاول ينشن علشان يجيبه فى صندوق القمامة بدلاً من إنه يهز طوله وينزل السلم علشان يرمى المخلفات بتاعته ، فتكون النتيجة إن الكيس يسقط فى وسط الطريق الرئيسى الملئ بالسيارات ، واللى ممكن يترتب عليه حادثة قد تودى بحياة أى أحد لا قدر الله .. وهذا طبعاً مرفوض تماماً وسوف نفرد مقالاً فى وقت لاحق عن مثل هذة التصرفات !!
لكن ليس معنى ذلك أن يأتى كل من هب ودب ، ويفضل ينتقد ويشتم فى الشعب ، ويلقى باللوم على الأخرين بإعتبار إن كل واحد من هؤلاء النقاد هو الوحيد اللى بيعمل الصح والباقيين ولاد ستين !!
أنا لست أبداً ضد النقد .. وصفحتنا هذه تنتقد العديد من الصور الخاطئة ، وستظل كذلك .. لكن يجب أن يكون النقد قائماً دائما على أسس موضوعية ..
يعنى حاجة زى الصورة دى ممكن يكون جزء من المشكلة فى الناس .. لكن الجزء الأكبر من المشكلة زى ما قولنا فى البداية ، فى اللى حط صندوق زبالة وهو مش مقدر صح حجم الزبالة للكثافة السكانية اللى فى المنطقة .. ده غير ان سيارة القمامة مش بــ تمر عدد مرات كافية علشان تفضى الصندوق !!! ….
يعنى من الأخر كدة ، منظومة غلط ودراسة غير كافية وتنفيذ قاصر … فــ بلاش بقى نبقى زى عجايز الفرح اللى بتولول وبس .. من غير ما نشوف المشكلة صح .. أو نحاول على اﻷقل ، نحط حلول للغلط اللى بنشوفه قدامنا .. !!!!
إرحمونا يرحمكم الله ….