28 Dec 2014
توصيف حالة
————-
الشباب الكوكو ، أبو بنطلون ساقط ، اللى لسة بياخدوا “مثروفهم” من بابا ، وبــ يتّريأوا بينهم وبين بعض على الجيش و بيقولوا عليهم بتوع الــ 50% ، عايز بس أقولكم حاجة ياحيلتها انت وهو:
– ماهو اللى جايبين 95% ، و 100% من حقهم يتريأوا عليكم انتم برضوا !!
– ماهو اللى طفحوا الدم وإعتمدوا على نفسهم وجابوا درجات أقل منكم ودخلوا كلية كويسة ، و هم بيشتغلوا بالليل علشان يصرفوا على أهاليهم من حقهم يبصّوا لكم بكل إحتقار !!
– اللى جاب 50% ودخل كلية عسكرية وبقى ضابط نظامى ، أو حتى جاب 60% وإلا 70% ودخل كلية زيّك زيّه ، وبعدين إتخرّج و بقى ضابط إحتياط ، كان بيقف فى البرد والحر يحميك ، وكان بيضحى بحياته ، وكمان بيموت ، علشان انتم تقعدوا فى أمان فى البيت تتفرجوا على “Arab Idol” ، و على المسرحية الكوميدى بتاعة عادل إمام ، أو تنزلوا تتقابلوا على الــ “Cafee” بالليل ، وتسهروا على الفيسبوك تتريأوا على ده و دى ، و كمان على اللى جايب 50% !!!
– اللى جابوا 50 % دوول ، فيه منهم ناس عملت ماجيستير و دكتوراه ، وبيتكلموا لغة وإتنين أحسن منى ومنكم ، وإجتازوا إختبارات ، وعملوا ديبلومات فى الإقتصاد والعلوم السياسية والعسكرية تحت ضغوط وظروف ، مايقدرش يعملها ويحققها أبو 95% اللى فى كلية إقتصاد وعلوم سياسية !!
لو انتم ماتعرفوش ده يا كوكو انت وهو ، تبقى خيبتكم ثقيلة ، ولو إنتم عارفين ده وبتستعبطوا ، تبقى خيبتكم أكبر ، لأنكم باللى بتعملوه ده _ ومن غير ما تشعروا_ بتلعبوا بالضبط الدور اللى مطلوب منكم إنكم تلعبوه !!
يعنى إنت وهو ، بــ تمثّلوا دور “حــــمــار رغـــم أنــفــه” ..
و واضح إنكم مبسوطين جداً ، .. وعاجبكم أوى دور “الحــمــــــار” !!!