05 Jan 2015
ربنا يعوض علينا عوض الصابرين يا رب
—————————————–
و الله منتوا فاهمين حاجه و حتفضلوا طول عمركم شعب غبى عايز اللى يضربه بالعصايه و الكرباج بدل ما يشغل مخه ….. شعب عاش طول عمره يدور على اللى يستعبده ….. احنا عايشين في تمثيليه كبيره و بــ ينضحك علينا ….. الجيش و الاخوان ايد واحده … اتفقوا علينا هم و نظام مبارك و عملوا علينا التمثيليه دي طول الاربع سنين اللى فاتوا …. اتفقوا مع بعض ان الاخوان يستلموا الحكم سنه …. و اتفقوا مع مرسي انه يفشل بمزاجه عشان يسلم البلد للجيش عشان يبقي الموضوع منطقى … و بعدين يدمروا البلد و يسلموها للامريكان متدمره جاهزه … مهي باينه قوي و منطقيه جدا و اي حد عاقل و بيفهم حيوصل للحقيقه دي … بس للاسف الشعب جاهل و مغيب و متسيطر عليه من الاعلام…..
اللا !!!!! …. طب ايه الحل ؟؟؟؟؟
الحل الوحيد اننا نقاوم و لازم نحارب و نهد فساد الجيش بعزل قياداته و تفكيك مكوناته و مؤسساته اللى عامله زي الاخطبوط و اللى مسيطره على البلدعشان ننقذ مصر من الدمار اللى حيحل عليها قبل ما يسلمها الجيش الخاين للامريكان.
دي آخر النظريات العلميه اللى توصل اليها عباقرة النوشتاء المثقفين المتعلمين اللى المفروض هم النخبه الفكريه المتعلمه للمجتمع المصري …. و بصراحه انا مش حناقشها من المنظور السياسي لان حرام اضيع وقتي و وقتكم في الهبل و العته الفكري ده…. لاننا كده داخلين رسمي على قسم النفسيه و العصبيه و مش محتاجين نقاش سياسي و لكن محتاجين الدكتور احمد عكاشه كبير الاطباء النفسيين يفسر لينا الحاله النفسيه و العقليه اللى وصل ليها الناس دي . 🙂 🙂
انا سمعت الكلام ده اكتر من مره و من اكتر من شخص ينتمي الى الفصيله دي اللى قاربت على الانقراض و تحتاج انها تتعزل و تعيش في محميات طبيعيه …. لكن اللى لفت نظري هو التطابق التام في الـ body language للكائنات دي و هم بيتكلموا وبيشرحوا وجهة النظرالعبقريه دي 🙂 🙂 و اللى اكدلي انها بالفعل حاله نفسيه او مرض من حالات الفصام النفسي 🙂 🙂
الاول ميكلمكش مباشرة …. و تحس انه مخبى كنز فكري و معلوماتي رهيب وكاتم في قلبه كتمة الواصل الى الحقيقه المطلقه اللى محدش عرف يوصلها وطبعا ده لانه عبقري زمانه وجاب التايهه اللى مستوى فكر الناس العاديه الجهله اللى زي حالتنا ميوصلوش ليه …. الراجل عبقري يا جدعان. 🙂 🙂
و بعدين يكلمك بقرف المتعالى وتحس انه قرفان منك ومن شكلك وكأن لسان حاله بيقول زي المثل اللبناني “مكلف الله جميله منشان خلقك” …… (يعني انت تحمد ربنا ان ربنا خلقك اصلا و خلاك تنول الشرف وتيجي تقف قدامي عشان اشرحلك ) …. 🙂 🙂
و بعدين لما يبتدي يدلي بدلوه و يشرح وجهة النظر العبقريه دي بمنتهي القرف منك ومن شكلك على اساس ان خساره فيك الكلام اصلا ……. تحس انه بيتكلم عن مسلمات وحقائق و انه عنده الحقيقه المطلقه اللى محدش يعرف يوصلها لانه بالطبع سابق الناس و الشعب المصري بسنين ضوئيه من الفكر العالي و الدماغ الالماظ …. وطبعا الاحساس ده بيزيد عنده لما يلاقيك مبرق عنيك و فاتح بقك من الانبهار و الاندهاش من اللى بتسمعه و بتتلقاه من واحد المفروض انه متعلم و مثقف ….. و للاسف ميعرفش ان تعبيراتك دي عباره عن تعبيرات اندهاش و شفقه للحالة النفسيه اللى وصلوا ليها و لسان حالك بيقول “لا حول و لا قوة الا بالله ….. ربنا يعفى عنك و يشفيك يا بلحه …. انت هربت تاني !!!! ” 🙂 🙂 🙂 .
بصراحه و بعد تفكير عميق توصلت الى سبب الحاله النفسيه دي اللى بدات تتحول الى امراض نفسيه و عصبيه من حالات الفصام النفسي سببها انكارهم للحقيقه و الواقع بعد وضوح فشلهم طوال اربع سنوات في كل تحركاتهم اوخياراتهم و بعدما شافوا ان تأثيرهم على الشارع المصري كان وهم كبيييييير و ان تأثيرهم الحقيقي هو صفر …… و ده بان ليهم بعد فشلهم في تحريك الشارع او حتي عمل حزب سياسي واحد فيه على الاقل 5000 عضو ….. بعد ما الناس فهمت ان فكرهم يؤدي الى اسقاط الدولة تماما.
و بعد ما شافوا حقيقة نماذج قيادتهم ومثلهم الاعلي الفاشله و اللى كانوا عاملين منهم اصنام من العجوه ….. و شافوا بعنيهم ابتعاد الناس عنهم لان الناس عمرها ما تسامح من يقترب من ثوابت وطنهم …. و اصابتهم حاله من التكبر انهم يعترفوا انهم كانوا غلط و فشلوا في كل تحركاتهم لانها كانت مبنيه على اساس غلط من الاول ….. و بدل ما يستفادوا من اخطاؤهم و يعترفوا بخطأهم …. جتلهم حاله من التقوقع و الفصام النفسي و اصبحوا عايشين في دنيا الخيال و الوهم …….
و حاسس ان مع الوقت حنلاقي منهم كتير ماشي هائم على وجهه في الشوارع هدومه مقطعه و ناكش شعره و ماشي يكلم نفسه ….. بس المشكله ساعتها اللى حتواجهنا …. ان مصر بتعاني من نقص كبير في البنيه الطبيه لمستشفيات الامراض العقليه و العصبيه … و معندناش غير مستشفي العباسيه بالقاهره و المعموره بالاسكندريه …. و دول اصلا مش ناقصين و مش حيقضوا الناس دي كمان …. 🙂 🙂 🙂
بصراحه فكروني بسلسلة مقالات “رساله الى عزيزي المواطن المصرى عزرا بن عميتاي” …. اللى نزلناها من شهورطويله و اللى تنبأت بالحاله النفسيه دي و سلطت عليها الضوء …. و بنفكر فعلا نعيد نشرها تاني يمكن لما يقروها يفوقوا اوحتي يروحوا للدكتور عكاشه يمكن يقدر يعالجهم ….. و عامة الطب النفسي دلوقتي تقدم خااااالص و الحفر دلوقتي بقي على الناشف 🙂 🙂 🙂 …. و اكيد فيه أمل. ……
يا ريت لوحد معانا على الصفحه متخصص في الطب النفسي يشرحلنا علميا ايه توصيف الحاله و ايه العلاج المناسب ليها .
لك الله يا مصر في شبابك.