5 Jul 2014
زيادة أسعار الطاقه وبداية المشوار الحقيقي – رحمتك يا رب من الزيّاطين
———————————————————————–
بالامس تم تحريك أسعار الطاقة سواء البنزين او السولار او الغاز او الكهرباء ….. و قبل ما نخش في صراع الفيسبوك سواء المؤيد اللى بيدعم و خلاص من غير ما يفكر أو المعارض اللى بيزايد و بيتكلم عن الفقراء و هو أصلا ما شافش الفقراء اللى بيتكلم عليهم للأن الفقير معندوش رفاهية الجهاز اللى حضرتك بتعمل لايك و كومنت منه ….. و زي ما اتعودنا حنحاول نأصل الامور عشان نفهمها …. و بعد كده رأيك انت حر فيه سواء داعم أو معارض .
أولا :- فيه شوية حقائق لازم نعرفها و نسلط عليها الضوء قبل ما نتكلم … حنقولها في نقط مختصره و كل لبيب بالاشاره يفهم :-
بعد زيادة سعر البنزين تظل مصر هي من ارخص دولة في العالم في سعر لتر البنزين …. بسعر 2.60 قرش يعني 0.37$ للتر و تسبقنا فقط قطر و ايران و السعوديه و فنزويلا و تركمنستان و ليبيا و البحرين و الكويت ( و كلهم بلاد نفطيه ) و يوجد بعدنا بلاد نفطية كثيرة و لكن سعر البنزين فيها أغلي من مصر.
الوفر اللى حيحققه رفع سعر الطاقه حوالي 6 و نص مليار دولار إتشالوا من مصروف الموازنة سنويا ، و ده رقم ضخم و كانت الحكومه بتدفعه بالعملة الصعبة …. يعني بتتكلف فوق منه عمولات توفير عملة صعبة من السوق السوداء بمناسبة ان الاحتياطي النقدي بتاعنا نزل من الحد الآمن 36 مليار الى 18 مليار فقط لا غير …. يا ريت نفتكر ان الدولة كانت قبل كدة بتحفي و راء قرض من البنك الدولي بقيمة 4 مليار فقط . 🙂
سعر برميل البترول عام 2010 كان 90$ و سعر الدولار كان 5.70 و من غير سوق سودا و الاحتياطي 36 مليار …. اليوم و بعد الثوره سعر البرميل 110$ و سعر الدولار 7.15 و ما تلاقيهوش و الاحتياطي 18 مليار فقط.
بالرغم من هذا الوفر الكبير لكن الميزانيه أُعتمدت بإجمالي دين داخلي و خارجي بخدمات بنسبه 95% من إجمالى الناتج القومي …. عارفين يعني إيه …. يعني من غير هذا الوفر كانت البلد بالفعل أفلست … أو إقترضت كمان و حتفلس كمان سنة أو اتنين بالكتير ….. لأن حــ يكون نسبة الدين بخدماته تعدت الناتج القومي…. يعني ديونك أكتر من إيراداتك و إنت لسه لا أكلت و لا شربت… و ده سبب إن السيسي رفض يمضي على الميزانيه لأنها كانت مقدمة له بسد العجز بديون جديدة بالمليارات من الخليج بالمبدأ المعتاد “إحييني النهاردة و موتني بكرة و فرح الناس و لما تمشي اللى يجي وراك يبقي يشيل و يبقي يحلها الحلال.
حسب بيان وزارة المالية إنهم بيستهدفوا أن يصل نسبة الدين الداخلي و الخارجي العام القادم الى 91% و العام التالي الى 84% و بعده بعامين … أي بعد انتهاء ولاية السيسي يتعهد أن يكسر حاجز ال 80% ليصل الى 79% او 78%.
تم إقرار الحد الاقصي للاجور …. يعني أجعصها رئيس مجلس إدارة في بنك و لا شركه بترول و لا شركة اتصالات و لا اي شركة حكومية مرتبة بحوافزه بسلاطاته مش حياخد في ايده أكتر من 42000 جنيه …. ميغة الملايين اللى كانوا بياخدوها خلاص بح …. و السيسي طبق ده على نفسه و إتنازل كمان عن نصه .
ثــانيــــا :- فيه بقي شوية صور و حقائق حنجمعها مع بعض عشان حضرتك تعرف الدنيا ماشية علي فين :-
اللى بــ يتكلم علي الفقراء و ان الناس مش ناقصة …. اللى بــ يركب عربية و بــ يستهلك 300 لتر في الشهر بــ يأخد دعم بنزين في الشهر حوالي 1300 جنيه و اللى بــ يتشعبط في الاتوبيس مش بــ يشوفهم أصلاً و لا بــ يشمهم و لو عنده عربية للمودام بياخد 2600 جنيه …. يعني دعم الطاقة اللى هو من أهم أسباب عجز الموازنة بسبب دعم الأغني على حساب الافقر … فبلاش مُحن علشان هى أصلها مش ناقصاك.
اللى بيتكلم على الفقراء اللى عنده في بيته 4 تكيفات بياخد دعم من الموازنة أضعاف اللى بياخده الفقير اللى عايش على لمبه و مروحه …. و الزيادات الكبيره كلها على الشرائح التانيه و التالته و الرابعه.
اللى بيقول إن بنزين 95 الزيادة عليه أقل من بنزين 92 ، أقول له إن بنزين 95 إتشال منه الدعم أصلا و أصبح غير مدعوم من أصله .
المواصلات حــ تزيد ده أكيد …. بتوع الميكروباصات ما حــ يصدقوا …. و محلب مع عادل لبيب كان أصدر تصريح إن حــ يتم توحيد تعريفة الميكروباص في كل مدينة و حــ يكون فيه رقابة من المرور عليهم …. و حــ نشوف آلية تنفيذ ده على الارض حــ تكون إييه …. المهم كلنا نساعد في الرقابة.
طيب الفقير السلع كلها حتزيد عليه و الاسعار حتولع و التجار حــ يتحالفوا مع الإخوان إنهم يسقطوا الحكومه و السيسي و حــ تبقي فوضي …. هنا بقي الكلام … …. لأن القرار ده مش حــ يدبح الفقرا زي ما الزياطين بيقولوا و بيسخنوا الناس …. القرار ده حــ يدبح بيه حيتان السوق و الأسر اللى بتتحكم في لقمة العيش و حيقضي علي إمبراطوريات الفساد الاقتصادي من جذوره في خبطة واحدة …. إزاي ؟؟؟؟ اقولك خد بالك من كام نقطة ….
السيسي من أول لقاء من شهرين إتكلم علي آليات موازية …. و ده معناه اننا داخلين نظام إشتراكي وش كدة. 🙂
السيسي كل كلامه علي الترشيد و تفهم من كلامه انك اذا ما رشدتش بمزاجك حــ ترشد غصب عنك يا إما تدفع بقي.
و خد بالك كمان من تصريحات وزير التموين المتكررة إن حــ يبقي فيه أكتر من 100 سلعة غذائية حــ تنزل على بطاقة التموين ( و السلع دي معظمها من جهاز الخدمات) و بــ أسعار تكاد تصل للتكلفة ….
و خد بالك كمان انه ناشد رجال الاعمال اللى كسبوا كتير من البلد ( هبشوا منها زمان و كبروا على قفانا ) انهم يرموا بياضهم و يورونا نفسهم …. و طبعا كله عمل نفسه من بنها ….. فالمعلم حــ يخرب بيتهم …. حــ يلبّسهم البضاعة اللى عندهم و حــ يعمل البديل و بأسعار خيالية بالنسبة ليهم …. يعني اللى حــ يشتغل في المنظومة و حيدفع من اللى كسبه زمان أهلا وسهلا … اللى حــ يستعبط حــ يشوف وش خشب و حــ يتفرم و حــ يتفضح قدام الناس ( ده اللى أتوقعه الفترة اللى جاية).
من الاخر كدة و اللى من الجيل اللى عاش مرحلة الجمعيات الاستهلاكية هــ يفهم ده لأنها المفروض مش جديدة عليهم …. يعني سيبك بقي من كارفور و مترو السنتين دول و عيش زي بابا و ماما ما كانوا عايشين زمان .
اللى عنده عربية و زعلان من سعر البنزين الفرق حــ يكون في حدود 40 جنيه في الاسبوع … و دول ممكن توفرهم من مصروف سجايرك أو توفر أكتر منهم لو ركبت يوم و يوم مع زمايلك.
الخلاصه :-
————
من الأخر كده و من غير نحنحة و سفسطة فارغة …. اللى إحنا فيه ده تكلفة و ثمن الحرية اللى طالبنا بيها من أول يناير فــ ماحدّش يعيّط و يجيب مارشدير ، و يقول مش لاعب ….. بدأت حاجة كمّلها … مأتورطناش و تطلع عيل و تخلع …… و من رأيي إن اللى بيحصل ده هو الصح و ماينفعش يتأجّل أكتر من كدة …. و الراجل ده لو عايز يعيش كان إستلف و لبّسنا في الحيط …. و هو أول واحد يكون عنده الشجاعه إنه يحل فعلا …. و فعلا بالطريقه دي حــ يصلّح …. و دي نفس البداية بالكربون بتاعة بوتين في روسيا بنفس الاجراءات ….. و ده إتنفذ في كل دول العالم اللى انتقلت من الدول الفقيرة الى الدول المحترمة زى البرازيل مثلا.
و اللى عنده حلول تانية ياريت يقولّنا ، بس ياريت من غير موضوع إنه حــ يرجّع الـ 70 مليار دولار بتوع مبارك اللى الجارديان البريطانية مش لاقياهم لغاية دلوقتي هي و بقية الفلوس المتهربة …