15 Jun 2015
قناة السويس … بين الحلم المصرى ، وحماية الأمن القومى
———————————————————
قناة السويس الجديدة علشان تتم محتاجة من 3 الى 5 سنين ياريّس !
لأ .. سنة واحدة بس .. يعنى أستلم منكم القناة يوم 6 أغسطس اللى جاى ..
تمام ياريّس ..
والمحصلة النهائية إن القناة هــ تكون جاهزة يوم 20 يوليو .. يعنى قبل الموعد المقرر كمان بأسبوعين .. 🙂
شئ يدعوا للفخر فعلاً .. و ده إعجاز المصريين لما يعوزوا يعملوا حاجة بتوفيق ربنا وإرادته اللى مافيش غنى عنهم .. لكن ياترى لييه ده حصل ؟؟ .. ياترى إييه وجه الإستعجال !!؟؟ .. أكيد طبعاً ماعندناش وقت نضيّعه .. وأكيد المواطن المصرى محتاج نتائج سريعة وملموسة حتى لو تخطت السرعة المطلوبة كل المعدلات العالمية ، وتخطت كمان طموحات أشد المتفائلين تفائلاً 😊
طب حد سمع عن مشروع قطار إيلات .. أو مشروع قناة بن جوريون اللى الدعاية الصهيونية إتكلمت عنها وكانوا بيقولوا إنها هــ تكون شبية لقناة السويس الجديدة وطبعا ده كذب !!؟؟
مشروع قطار إيلات زى ما إتقال عنه إنه مشروع اقتصادي إسرائيلي بأهداف سياسية .. لييه بقا !!؟؟ .. لأن المشروع ده بــ يضع حجر الأساس للشحن البري بين أوروبا وآسيا ، عبر مد خط سكة حديد من ميناء حيفا لميناء إيلات بطول 350 كيلومتر فــ يربط البحر الأبيض بالبحر الأحمر ، وبعد ما كان المخطط له إنه ينتهى فى سنة 2020 تم تقديم الموعد علشان يخلص فى مابين عامى 2016 و 2017 واتفقوا فعلياً مع شركة بلجيكية للقيام بتوسعة ميناء حيفا .. و ده مجرد إختصار للمشروع لأنه فييه تفاصيل كتيرة قوى مش عايزين ندخل فيها ..
اللعبة كمان كانت محاولة التعاقد مع شركات صينية لتنفيذ المشروع .. إييه !! .. قولتولى مييين ؟؟؟ .. الصين !!؟؟ .. أاااه وحياتك الصين .. وتطلع تقارير إستخباراتية من الموساد تحذر الحكومة الإسرائيلية فى تقارير معلنة ، إن المشروع ده هــ يؤثر على قناة السويس اللى بتعتبر كنز إستراتيجى وأمن قومى لمصر وجيشها ، وممكن يؤثر على إتفاقية السلام على المدى البعيد مع القاهرة .. وكأن الموضوع فيه رسائل موجهة لمصر بأسلوب غير مباشر وجس نبض .. !!
صحيح بعض الخبراء شككوا فى الجدوى الإقتصادية للمشروع .. لكن طبعاً مع الدعاية الصهيونية العالمية وكام عملية إرهابية يقوم بها عملائهم من أحفاد البنا فى مدن القناة ، فــ يتم الترويج للخط الجديد بإعتباره الطريق الأئمن للنقل بين الشرق والغرب واللى هــ يأثر بشكل كبير على دخل قناة السويس .. اللى الملاحة فيها صحيح مش هــ تتوقف .. لكن إذا كان دخل قناة السويس فى 2014 وصل لحوالى 5 مليار دولار .. فــ دخلها فى 2017 ماكانش هــ يتعدى المليار دولار وبالتالى تفقد مصر واحد من أهم مواردها الإقتصادية ..
مصر بقا عملت إييه !!؟؟
مصر افشلت المشروع وخلته أصبح كوم تراب .. لييه !!؟؟ لأن مصر خلصت قناة السويس الجديدة فى أقل من سنة ، وكمان عمّقت قناة السويس القديمة بحيث إن القناتين أصبحوا يستوعبوا مراكب الشحن العملاقة اللى كانت بتعدى من طريق رأس الرجاء الصالح .. ومش كدة وبس .. لكن مع تطوير طريقة إدارة القناة ، والسيولة فى المرور .. أصبح عبور الممر المائى للقناة مش هــ يستغرق أكثر من 4 ساعات .. والإنتظار مش هايكون فى أسوأ الظروف لأكثر من 10 ساعات .. وكل ده تم بتكلفة إجمالية حوالى 8 مليار دولار كلهم من جيب الشعب المصرى ومافيش مليم من أى دولة مانحة أو مُقرضة .. مع العلم إن التقديرات المبدئية بتقول إن دخل القناة فى أول سنة بعد الإفتتاح هــ يتجاوز الــ 14 مليار دولار .. يعنى القناة كدة إتعملت ببلاش وفيه فائض كمان بعد سنة واحدة بس ..
و مش كدة وبس .. لأن مصر ماكانش هدفها تعمل مجرد ترعة تعدى فيها المراكب زى ما كان بيقول النوشتاااء ، وأحفاد البنا ، وكل اللى غاويين يكسروا مقاديف البلد .. لكن الهدف هو تحويل القناة إلى منظومة مشاريع خدمية متكاملة توصل بدخل قناة السويس فى خلال 7 سنوات إلى 100 مليار دولار .. و ده غير الرواج الإقتصادى للمشروعات اللى هــ تتعمل فى مدن القناة وفى سيناء على إمتداد الساحل الغربى لسيناء وإنشاء خط سكة حديد فى سيناء والتقسيم الإدارى الجديد لشبه جزيرة سيناء .. ولا عزاء للشامتين أو المغيّبين 🙂
ياترى قولتولى بقى الرئيس راح الصين من فترة طويلة لييه !!؟؟ .. وليه هــ يتم دعوة الرئيس الصينى لحفل الإفتتاح .. وليه الرئيس راح المجر وتعاقد على شراء 700 عربة قطارات سكة حديد .. وليه مصر بتسعى لشراكة إقتصادية مع أفريقيا وبــ توقع إتفاقيات تجارة حرة مع الدول الأفريقية اللى كل الدراسات بتقول إن التوجه فى الــ 50 سنة اللى جايين هــ يبقى للقارة السمراء !!
إفتكروا مقالات صفحتنا بعنوان “مصر تتمدد داخلياً وإقليمياً ودولياً” .. لأن عجلة التمدد المصرى إنطلقت .. وأصبح من المستحيل بإذن الله إيقاف كرة الثلج اللى عمّالة بــ تتسارع و بــ تكبر ، و بــ تاخد فى سكتها كل العوائق اللى بــ تقف فى طريقها ..
عرفنا لييه بقا الضغط زايد اليومين دول ، والكلام والدوشة كتيرة لييه .. !!؟؟ لأن مصر بتفلت من إيديهم ومش قادرين يلاحقوها .. واللعبة كلها دلوقتى على المصريين أنفسهم .. فــ خلّوا بالكم 😊 .. وأنا متأكد إنكم واخدين بالكم 😊😊