13 Sep 2015
قول معانا تحيا مصر .. وشير بقوة
———————————-
أصدقاؤنا اصدقاء صفحة كلام فى الصميم
على خلفية تغيير الوزارة بقبول إستقالة المهندس محلب .. كان فيه مناقشة حامية مع أحد أصدقاء صفحتنا الأعزاء ، عن الشباب ، وتأهيل الشباب ، وإن الدولة لازم تفتح الباب وبقوة ، أمام الكوادر الشابة ، والمؤهلة … وهو طبعا معاه كل الحق فى رأيه ووجهة نظره اللى إحنا بــ نؤيده فيها تماما ، لأن الدول مش بتتقدم إلاّ بالشباب .. و دى طبيعة الدنيا ..
ولأن صفحتنا زى ما عودتكم دائما بتاخد الأمور بتعقل .. ورؤية محايدة موضوعية وشاملة للأمور .. وأهم حاجة إنها تحمل ثقة لا متناهية فى التوجهات الحالية للدولة وللقائمين على تطوير أدائها السياسى والإقتصادى والعسكرى .. وعمل تطوير مجتمعى لإصلاح ما فسد على مدار عقود طويلة من الفساد والإهمال .. فكان ردنا على صديقنا العزيز يحمل وجهة نظر وملامح صفحة كلام فى الصميم .. وهى إن السنوات الخمسة اللى فاتت مانجحتش إنها تقدم نموذج شبابى واحد يحتذى به ، يمكن البناء عليه لتطوير الدولة .. لكن جابت لنا شوية صيّع ومأجورين إستغلوا الوضع المتردى اللى كانت فيه البلد ومدعومين ببعض الرموز اللى إكتشفنا إن معظمهم أفاقين ومدعّى ثورية علشان يلعبوا بعواطف ومشاعر شريحة كبيرة من المجتمع .. و مشى وراهم كثير من المغيبين .. علشان نوصل فى النهاية لــ لا شئ !!
الموضوع كله كان عبارة عن كلام وشعارات وخلاص .. ماعدا نسبة قليلة جدا من الوجوه دى .. يمكن واحد أو إثنين على الأكثر ومعروفين بالإسم هم اللى نجحوا فى إنهم يطوروا فكرهم والوضع اللى حواليهم للأفضل … وغير كدة مافيش غير بذاءات وشتائم وقلة أدب .. وفشل يعقبه فشل من قلب فشل إلى قمة الفشل !!
وحتى فى الأحزاب اللى بتقول على نفسها إنها أحزاب ثورية ، الشباب بيتكلم وبس .. لكن مالهمش أى وزن على الأرض .. والأحزاب بتاعتهم مش بترشحهم !!! .. يعنى برضوا عندنا مشكلة حتى فى التيارات اللى بتقول عن نفسها إنها ثورية ، وهى إن معظمهم مجموعة من المنتفعين المؤمنين بمبدأ اللى تغلب به إلعلب به !!
وكان رأينا إننا لو عايزين ندّى الفرصة للشباب الراغبين فى العمل السياسى .. إننا ندعمهم ونفتح لهم المجال فى وظائف ذات طبيعة خاصة .. يعنى مثلا نخليهم مساعدين وكلاء وزارة أو اقل كبداية علشان يندمجوا ويتم تأهيلهم فى المطبخ السياسى ويكونوا محل إهتمام الوزير فى التدريب وإعطائهم الفرصة .. أو نخليهم مندوبين ميدانيين للوزير علشان يعيشوا مع مشاكل البلد ويطلعوا أفكار خارج الصندوق تفيد الدولة ، بناءً على معرفتهم بإمكانيات الهيئة أو المؤسسة الحكومية اللى بيشتغلوا فيها ومعرفة مدخلات الدولة والعوائق اللى بتحد من التطوير .. وبعد كدة نبتدى تصعدهم وتدخلهم فى المطبخ .. وندعمهم وندفع بهم لأعلى درجات العمل السياسى والوطنى .. 🙂 … إنما ماينفعش نجيب حد كدة وخلاص من غير خبرة إدارية أو أى دراية بشئون الحكومة وماعندوش اى وعى ثقافى او سياسى ، أو بانى افكاره السياسية على تصورات فاسدة ..!!! (واخدين بالكوا من تصورات فاسدة دى 🙂 ) .. وأعينه فى منصب قيادى لمجرد إنه شاب !!!
الحقيقة إن المناقشة دى ما كانتش أول مناقشة مع أصدقاء صفحتنا سواء فى التعليقات على المقالات بشكل عام .. وأكيد كثير من اصدقائنا اللى بيتابعوا التعليقات وردودنا عليها شافوا ده .. أو حتى من خلال الرسائل اللى بتجيلنا واللى كلها تنم عن وطنية شديدة وخوف على مصلحة البلد ..
لكن وكأن مؤسسة الرئاسة متابعنا ومتابعة كلامنا … والحق يتقال إنها متابعة كل ما يخص شأن المواطن وبتبذل اقصى جهدها فى سبيل القفز بالدولة لأفاق جديدة والخروج من النفق المظلم اللى إحنا فيه ..
النهاردة الصفحة الرسمية للرئيس/عبدالفتاح السيسي رئيس جمهورية مصر العربية واللينك بتاعها أهو
أطلقت البرنامج الرئاسي لتأهيل الشباب للقيادة Presidential Leadership Program
يهدف البرنامج الرئاسى لتأهيل الشباب على القيادة بإنشاء قاعدة قوية وغنية من الكفاءات الشبابية كى تكون مؤهلة على العمل السياسى والإدارى والمجتمعى بالدولة من خلال إطلاعها على أحدث نظريات الإدارة والتخطيط العلمى والعملى وقادرة على تطبيق الأساليب الحديثة لمواجهة المشكلات التى تحيط بالدولة المصرية.
شاهد فيديو توضيحي للتعريف بتفاصيل مراحل التسجيل و المشاركة في البرنامج الرئاسي لتأهيل الشباب للقيادة
للمزيد من التفاصيل تابعوا الصفحة الرسمية للبرنامج علي فيسبوك :
او تابعوا الحساب الرسمي للبرنامج علي Twitter :
أو قوموا بزيارة الموقع الرسمي للبرنامج