27 Feb 2016
معركة الفساد فى مصر ..
ما لن تشاهده أو تسمع عنه فى الإعلام المصرى
————————————————
أكيد طبعا كلنا متفقين إن أشرس معركة بتخوضها مصر هى معركتها مع الفساد !! … الفساد المتغلغل فى النفوس قبل المؤسسات .. وفى الأفراد قبل الشركات والحكومة والوزارات … لكن بغض النظر عن الموضوع ده ، خلينا بس نتكلم عن الفساد الملموس .. الفساد اللى كل الناس بتتكلم عنه .. وكل ما حد يتكلم عن إنجازات الدولة ، تلاقى حد طالع له يقول “طب والفساد !!؟؟” .. الفساد اللى أصبح هو المدخل لكل المزايدين من تجار السياسة ، وتجار الدين ، والمشككين .. ألخ ألخ ألخ !
الفساد أمر واقع .. بــ نعيشه فى حياتنا اليومية ، وبــ نتعامل معاه .. ومن الإخر كدة إتعودنا عليه وبقينا أصحاب .. لأ وكمان أصبحنا كلنا بنستفيد منه 🙂 .. وإوعى حد يقوللى لأ 🙂 .. لكن السؤال المهم هنا ، .. هى الدولة بتعمل إييه !؟؟ .. وليه مش بتحارب الفساد !!؟؟ .. والإجابة على السؤال ده بسيطة جداً .. وهو إن الدولة بتاخد خطوات جادة لمكافحة الفساد .. لكن بمنتهى التأنى .. لأن المواجهه العنيفة والمباشرة ممكن تؤدى لسقوط الدولة !! .. وإحنا مش بــ نعرف حاجة عن خطوات مواجهة الفساد ، لأن جهات اللإعلان وتسليط الضوء على ده ، واللى ممكن يفهّم الناس إذا كان الفعل الفلانى للدولة ، يندرج تحت عنوان محاربة الفساد وإلا لأ ، هى منظومة الإعلام ..
منظومة الإعلام هى أصلاً منظومة فاسدة ، إما فى ذاتها كمنظومة بهيئاتها وأفرادها .. وإفتكروا الفيديو اللى إنتشر مؤخراً عن وائل الإبراشى لما ضيفه اللواء احرجه على الهواء وهو بيحاول يعمل فيها مثالى فى موضوع الواسطة والمحسوبية ، … أو لأنها خارجة من عباءة رجال أعمال عايشين بالفساد ومستفيدين من إستمرار الوضع على ماهو عليه ، على الأقل علشان تستمر حجة الهجوم على الدولة من خلال منظومة أعلام السبوبة الفاسد .. واللى من غير الفساد مش هــ يقدروا يلاقوا حاجة يقولوها !!!
إحنا بقى النهاردة ، هــ نلقى الضوء على بعض الإجراءات اللى بــ يتم التخطيط لها ، أو اللى تمت فعلياً على طريق تطهير الدولة من الفساد والفاسدين !
الدولة بدأت السير فى إجراءات تفعيل الحكومة الأليكترونية والنظام الليكترونى علشان يبقى كل التعاملات الحكومية ، وإستخراج الأوراق والبيانات الرسمية والوثائق الرسمية يتم إليكترونياً بدون مايكون فيه تعامل مباشر مع الموظفين .. و ده لواحده هــ ينسف 50% من منظومة الفساد والبيروقراطية فى مصر 🙂
الرئيس السيسى قام بتشكيل لجنة برئاسة المهندس محلب .. و تضم اللواء أحمد جمال الدين ، وممثل لمباحث الاموال العامة ، وممثل وزارة العدل ، ممثل من الشهر العقارى ، وممثل لهيئه المساحة .. ووظيفة اللجنة دى هو العمل على إسترداد الاراضي اللى تم الإستيلاء عليها أو توزيعها أو الإستفادة منها بشكل غير قانونى عن طريق التخصيص وخلافه … واللجنة دى تابعة للرئيس بشكل مباشر ، وبــ يقوم بمتابعة مهامها بنفسه …..
تم عمل مراقبة فساد ومراقبة جودة على الإستيراد السلعى لصالح الحكومة وعلشان كدة عروض توريد الأقماح لمصر إنخفضت من عشرين وتلاتين وخمسين عرض لأربعة عروض بس إتقدمت مؤخراً لهيئة السلع التموينية !! عارفين ليه !!؟؟ عشان دلوقتي بــ يتم محاصرة الفساد واحدة واحدة ، على الرشاوى والسرقة والفتة اللى بــ عشرين ختم وتوقيع إن القمح صالح وهو أصلا فاسد ، عشان دلوقتي فيه ناس شغلتها إنها تراقب الجودة ، .. بعد ماكان فيه موردين ورجال اعمال معدومى الضمير شغلتهم إنهم يخلصوا دول العالم من القمح المسوس بتاعهم بتوريده لمصر.. ويدخل عن طريق فاسدين ومعدومى ضمير برضوا بعد ما يتفحص ويتوافق عليه ويتختم انه صالح … والناس تاكله !!!
تعالوا بقى نشوف بعض ما تم لمواجهة بعض شبكات الفساد:
- إحالة جميع العاملين بإدارة الجبّانات بمحافظة القاهرة للنيابة العامة !!! .. شوفو بقى الناس دى كانت بتعمل إييه وبتتاجر فى إييه !!؟
- ضبط رئيس الحى الثالث بالتجمع الخامس ، متلبسا بالصوت والصورة داخل أحد المطاعم فى القاهرة الجديدة وهو بــ يتقاضى 20 ألف جنيه رشوة من موظفين فى شركة نظافة خاصة ، بعد ما اتفق مع شركة النظافة إنه يرفع تقرير لرئيس جهاز مدينة القاهرة الجديدة يقول فيه إن الشركة بتقدم مستوى عالى من الخدمة و الالتزام بتنظيف الشوارع ، علشان يضمن استمرار الشركة فى التعاقد !
- تمكنت الشرطة والنيابة العامة من كشف عصابة داخل وزارة الأوقاف ، بيستغلوا المسابقات اللى بتعملها الوزارة علشان يزوروا النتائج ويعملوا خطابات مزورة لأشخاص بعينهم مقابل 15 ألف جنيه للوظيفة الواحدة .. بحيث إن الشخص يدفع مبلغ 7 آلاف جنيه ، لإعطائه خطاب تسلم العمل ، وبعدين يدفع باقى المبلغ بعد إستلام الوظيفة .. والتشكيل الفاسد اللى داخل الوزارة كانوا شغلتهم إنهم بيشيلوا اسماء الفائزين الفعليين بالوظائف من الكشوف ، ويحطوا مكانها ناس ما تقدمتش اساسا للمسابقة .. لكنهم دفعوا الفلوس علشان يحصلوا على الوظيفة … يعنى منظومة فساد كاملة داخل الوزارة .. وجارى التحقيق !
- قام بعض المحافظين بإحالة قرابة 3 آلاف و500 موظف فى قطاعات الوحدات المحلية والمديريات الخدمية فى الفترة الأخيرة للنيابة العامة والنيابة الإدارية والشئون القانونية ، وتم نقل بعضهم من مناصبهم إلى أعمال إدارية أخرى ، على خلفية ارتكاب أخطاء إدارية ومالية ، منها الإهمال فى العمل وتقصيرهم فى خدمة المواطنين وإهدار المال العام
- تفعيل تطبيق ثلاث عقوبات ضد الموظفين بالأجهزة التنفيذية والمحلية، وهى الخصم المالى لمدة تتراوح بين 3 أيام إلى 20 يوما كحد أقصى، والنقل من المناصب القيادية إلى درجات وظيفية أقل ، ومن مدن كبيرة إلى مناطق نائية ، بالإضافة إلى الوقف عن العمل مصحوبة بالإحالة للنيابة العامة والنيابة الإدارية فى حالة إهدار مال عام وتقاضى رشاوى مالية ، وكل ده من غير تطبيق قانون الخدمة المدنية. 🙂
- قيام بعض المحافظين ومساعديهم بتنظيم جولات مفاجئة بعد الساعة الثانية عشر ليلا على القطاعات الجماهيرية ، والخدمية ، و خاصة الوحدات المحلية والمستشفيات والقرى والوحدات الصحية ، بالإضافة لتنظيم الجولات النهارية المفاجئة على المدارس والمشاريع الاستثمارية كنوع من أنواع المتابعة ، والترهيب بإستخدام العقوبات الإدارية والجنائية.
- إحالة 1083 موظفًا من الموظفين والأطباء ورؤساء المراكز والقرى فى محافظة البحيرة للتحقيقات ، من بينهم 400 شخص للنيابة العامة والإدارية بسبب الإهمال والفساد .. ما بين مخالفات مالية وإدارية تصل للجرائم العامة زى الاختلاس مثلا فى مشروع الإنتاج الحيوانى بقرية سيدى غازى بكفر الدوار اللى يقدر ثمنها بقرابة المليون جنيه .. بالإضافة لتراخيص مبانى مزورة. و استبعاد 12 رئيس قرية بمختلف المراكز ألخ ألخ.
- إحالة أكثر من 750 موظفا فى محافظة الدقهلية ، من بينهم 273 موظفا فى يوم واحد من الموظفين والأطباء ورؤساء المراكز للتحقيق فى النيابة العامة والشئون القانونية ، التابعة للإدارات العاملين ، فى خلال جولات مفاجئة بعدد من القطاعات المختلفة ، ضبطت قضايا عديدة من الفساد.
- تحويل حوالى 650 فى كفر الشيخ للنيابة العامة والنيابة الإدارية ، منهم 493 موظفاً فقط فى 10 أيام سواء فى المحليات أو الصحة أو التربية والتعليم بسبب مخالفات وقضايا فساد ورشاوى
- وفى المنوفية أصدر الدكتور المحافظ هشام عبد الباسط قرارات وجزاءات لقرابة 150 موظفا من بينهم 89 موظفا حكوميا، تم إحالتهم إلى النيابة العامة بقطاعات المحليات والإسكان ومياه الشرب والصرف الصحى، وذلك لقيامهم باختلاس المال العام وتلقيهم رشوة وأشهرهم هو العميد أحمد إبراهيم وكيل وزارة الإسكان السابق بإجمالى أموال 200 مليون جنيه من المال العام .. وصرّح المحافظ ، إنه أوقف مشروع المول التجارى لرجل أعمال كبير؛ لأنه فيه مخالفات كتيرة تمت إحالتها إلى النيابة العامة للتحقيق فيها ..
- وفى الإسماعيلية اسفرت عمليات المتابعة المستمرة للمحليات، من خلال لجان المتابعة بالمحافظة والوحدات المحلية لخدمة المواطنين، لأنها الأولوية الأولى فى أجندة العمل اليومى فى المحافظة عن إحالة قرابة 350 موظفا للتحقيق والخصم ، بالإضافة إلى تعيين ونقل وتغيير 42 من القيادات المحلية بدائرة المحافظة وتوابعها ، شملت نواب وسكرتيرى رؤساء المراكز والمدن والأحياء ورؤساء وسكرتيرى الوحدات المحلية للقرى على مستوى المحافظة بالكامل
- وفى الفيوم تم نقل وإحالة قرابة 300 موظف من المحليات والقطاعات الخدمية ، للنيابة الإدارية والنيابة العامة وإحالة للشئون القانونية على خلفية أعمال وقضايا فساد
- شنت الأجهزة الأمنية والرقابية حملات مكبرة لمواجهة ظاهرة ارتفاع الأسعار والتأكد من الالتزام بعرض المنتجات والسلع بالأسعار المناسبة وضبط المتلاعبين بالسلع الغذائية
- شهدت المحافظات على مستوى الجمهورية حملات تموينية مكبرة بإشراف اللواء حسنى زكى مساعد وزير الداخلية لمباحث التموين، وتم ضبط ( 8 ) قضايا مواد بترولية مدعمة قبل بيعها بالسوق السوداء بأسعار مرتفعة ، وضبط ( 24 ) قضية أسطوانات بوتاجاز وضبطت شرطة التموين ( 6 ) قضايا دقيق مدعم وأقماح وتم تحرير ( 68 ) قضية مخالفات للمخابز لمخالفتها المواصفات القياسية والتلاعب بقوت المواطنين وبيع الدقيق المدعم ، .. وتم تحرير ( 12 ) قضية لتجار السلع التموينية المدعمة لبيعها بالسوق السوداء، وتم ضبط ( 32 ) قضية فى مجال الغش التجارى وقضية استيلاء على أموال الدعم ، و( 275 ) قضية فى مجال “المحلات العامة ، الشهادات الصحية ، ألخ الأخ ألخ.
- شنت مديريات الأمن بالتنسيق مع شرطة التموين حملات تموينية مكبرة استهدفت ضبط الأسواق والقضاء على كافة أشكال الغش التجارى واستغلال السلع ، وتم ضبط عشرات من قضايا السلع الغذائية الفاسدة
وطبعا مش عايزين ننسى إنه فيه وزير إتحبس من كام شهر على خلفية تهم فساد .. وفيه غتنين من اكبر قيادات الموانى فى مصر إتحبسوا برضوا !!
وكل ده _غيضٌ من فيض_ زى ما بيقولوا .. وللأسف الكلام ده مش بيتم الإعلان عنه لأنه فيه ناس مستفيدين من بقاء الصورة قاتمة فى عيون الناس .. ومش معنى الكلام ده إننا عايزين حد يعتقد إن الدولة كدة بتمنّ علينا باللى بتعمله ، لأن ده واجب القائمين على مصالح الشعب .. لكن فى نفس الوقت لازم كلنا نفهم ، إنه كون إننا مانعرفش ، فــ ده مش معناه إن الدولة ساكتة .. لكن تشابك التحديات الداخلية والخارجية ، بيخلى الدولة مش فاضية إنها تقول .. لأن حجم مايتم إنجازه وتفاصيله كتيرة أوى ، نتيجة الوضع المؤسف والمتردى اللى إحنا كنا ، ومازلنا فيه ..
مصر مكملة .. وماتصدقش الهرى الكتير .. صدق بس رئيسك وبلدك .. والأهم إنك تصدق نفسك وإيمانك بنفسك وبوطنك االى بإذن الله هــ يبقى قد الدنيا .. وبإيديك أنت بس ، مش حد تانى !! 🙂 🙂 🙂