08 Mar 2016
الحلم المصري يتحقق على ارض الفيروز
—————————————
شاء من شاء و ابي من ابي …. مصر بتتبني من جديد … و الحلم المصري بيتحقق…. و مع كل يوم جديد … فيه معجزات بتتحقق على الارض …. و مع كل انجاز جديد …. تجد المتخبطين و السوداويين و اصحاب الطاقات السلبيه صوتهم بيعلي و بيقاوموا و بيتفننوا في بث الطاقات السلبيه بين الناس …
ففي الماضي … تلاقيهم يقولولك مفيش امل … مفيش مشروع قومي يجتمع عليه المصريين …. فين محور قناة السويس و فين تطوير قناة السويس …. تيجي مصر تحفر قناة السويس في سنه واحده و باموال مصريه و تبدا العمل في محور قناة السويس اللوجيستي .
يقولك راحت عليك فلوسكم و القناه حتنهار و لن تري النور … انتم اتنصب عليكم ….. و تتفتح القناه و يبدأ العمل في محور قناة السويس
يقولولك طب ده كلام … انهي مستثمر حيجي يعمل مشروع و الكهرباء بتقطع و مفيش كهرباء …. تقوم مصر تحل مشكلة الطاقه و تزيد طاقه انتاج الكهرباء لعشر سنوات قادمه في عام واحد فقط مما يعتبر معجزه بكل المقاييس .
يقولك طب و ايه يعني … الكهرباء مش مشكله … المهم الغاز … طب انت عندك غاز ؟؟؟ …. تقوم مصر تحل مشكله الغاز و منسمعش عنها تاني في اقل من سنه …. يقوم يقولك و ايه يعني … بقي مين اللى حيجي يعمل مصنع و يصنع … و انت عندك شبكة طرق متهالكه … مفيش فايده .
تقوم مصر تنشىء 6000 كيلو طرق و محاور بطرق حره تربط اواصل المدن المصريه ببعضها و كل ده في نفس السنه اللى اتعمل فيها كل اللى ذكرناه في اول المقال …. ميلقوش حاجه يقولوها …. طب نقول ايه ؟؟؟ …هم شكلهم حيعملوها و لا ايه ؟؟؟ … 🙂 🙂
خلاص … بصوا بقي … روحوا شوفوا سعر الدولار بقي كام …. الاقتصاد واقع و مفيش سياحه و مفيش احتياطي نقدي ….. انتوا بتضحكوا على الناس … 🙂 🙂
و مع ان كل اللى بيتكلم ده … ناقح عليه العرق الصاوري … ميعرفش انه بسبب احاسيسه المفرطه لمواجهه الزولم و الكمع طوال 5 سنوات …. تسبب في انهيار السياحه و و انهيار الاحتياطي النقدي و هروب المستثمرين و اغلاق المصانع و غيره كتير .
بس برده ميسيبكش … يرجع يقولك … روح شوف الارهاب في سيناء و سعر الدولار و المصانع اللى قفلت و … و ….
تخيل بقي يا مؤمن ان في ظل الظروف دي اللى انت فرحان بيها و قاعد على الفوتيه بتتكلم … فيه ناس بتبني بلدها على الارض …. و قدرت انها توفر وقود حضرتك بتستخدمه باكتر من 64 مليار دولار في سنتين منهم 6.5 مليار دولار فقط من الخليج و مشاريع تنمويه باكثر من 500 مليار جنيه بقيمه 64 مليار دولار اخري تتم الان على الارض …. تم الانتهاء من اكثر من صفها .
و كل ده و السياحه مش موجوده و الدوله بتتحارب بالارهاب و بخنق عملتها بازمه مفتعله و ناس مش عايزه تشتغل و اعلام لو بيحارب اسرائيل مش حيحاربها بالشكل ده .
عشان منطولش عليكم …. ده تلخيص لحوار الرئيس بالامس عن المشاريع اللى اتعملت بالفعل و بتتعمل في سيناء حاليا على الارض .
التنميه في سيناء
———————–
- لربط سيناء بمصر انشاء نفقين للسيارات بالاسماعيليه و نفقين للسيارات في بور سعيد (جاري العمل بهم بالفعل) …. التسليم في 2017
- لربط سيناء بمصر انشاء نفق للسكه الحديد بالاسماعيليه و نفق سكه حديد ببورسعيد (جاري العمل بهم بالفعل) ….. التسليم في 2017
- لربط سيناء بمصر البدء في عمل نفقين اخرين عند مدينه السويس
- جاري العمل في انشاء ميناء شرق التفريعه بطول ارصفه 5 كيلومترات ليكون اكبر ميناء في البحر المتوسط … تسليم 2017
- تم بالفعل تطوير بحيره البردويل و رفع كفاءتها و تم الانتهاء من عمل 600 حوض لزراعه الاسماك
- تم الانتهاء من انشاء مصنع لتعليب السمك و ثلاجه للتخديم على نشاط الصيادين ببحيره البردويل داخل سيناء
- تم الانتهاء بالفعل من انشاء مدينه الاسماعيليه الجديده شرق القناه بعدد وحدات 20 الف وحده سكنيه بكل مرافقها (كهرباء – صرف – طرق – خدمات) و انشاء 15000 الف وحده اخرى … تسليم 2017
- يتم الان العمل في الانتهاء من 25 الف فدان مزارع سمكيه بعدد 20 الف حوض ….. 35 كيلو شرق بورسعيد داخل سيناء …. تسليم 2017
- العمل جاري الان على الارض لانشاء المدينه المليونيه الجديده شرق شرق بورسعيد داخل سيناء …. تسليم 2017
- تم الانتهاء من تنظيم و تخطيط و البدء في انشاء 27 تجمع بدوي … كل تجمع بدوي يحتوى على من 100 الى 150 منزل ب 500 الى 1000 فدان لكل تجمع ارض مستصلحه بابار المياه لانشاء حياه متكامله نموذجيه للزراعه و الرعي …. تسليم 2017
- الانتهاء من المرحله الاولي من طريق حر موازي لقناة السويس من بورسعيد الى مدينة السويس بطول 60 كيلو …. التسليم 2017
- العمل جاري على الارض لانشاء شبكه من الطرق الحره داخل سيناء بطول 1500 كيلومتر ….. التسليم 2017
- الانتهاء من اعاده بناء مطار المليز داخل سيناء و تحويله لمطار مدني حديث يستوعب كل انواع الطائرات بطاقه استيعابيه 1.7 مليون راكب في العام …. تسليم صيف 2016
- الانتهاء من انشاء 2000 وحده سكنيه في مدينة العريش بكل خدماتهم (كهرباء – صرف – مياه – خدمات)
- البدء في خلال شهر لانشاء 3000 وحده سكنيه اخري بالعريش …. تسليم 2017
- الانتهاء من انشاء 5000 وحده سكنيه بجنوب سيناء
- التخطيط لانشاء 3000 وحده سكنيه اخري بجنوب سيناء …. تسليم 2017
- الانتهاء من مشروع مزرعه الامل المتعطل ب 3000 فدان و توفير مصادر المياه و طرح الاراضي و المساكن للشباب
- الانتهاء من انشاء سحاره سرابيوم لنقل المياه الى داخل سيناء
- التخطيط للبدء في تنفيذ محطتين لمعالجه المياه بطاقة مليون متر مكغب باتجاه ترعه السلام و مليون متر مكعب في اتجاه سرابيوم لاستزراع 100 الف فدان داخل سيناء…. تسليم 2017
- جاري العمل على الارض في انشاء اكبر و احدث مجمع رخام في الشرق الاوسط بعدد 5 مصانع على احدث طراز لتصدير الرخام …. تسليم 2017
في النهايه …. اللى مش عايز يشوف عمره ما حيشوف …. و اللى قافل عقله و قلبه حبفضل طول عمره كده …. المانيا و كوريا بنوا نفسهم في عشر سنوات …. و احنا بدانا نبني و نعمر و نحل مشاكل عقود مضت …. اللى عايز يشارك و يبني بلده اهلا وسهلا .
و اللى قاعد يبث طاقته السلبيه و عقده النفسيه على بلده … و قاعد على الفوتيه متحفز لاي طاقه امل او تجربة نجاح فعليه على الارض … و يراهن على فشل مصر … و يقولك طب انا حتفرج و لو خلصتوا ابقوا نادوني عشان اكمل قعده على الفوتيه و اقيم اللى بيحصل … نقوله … خليك في حالك …. مصر بتشتغل و بتنجح … و فيه ملايين الشباب على الارض شغالين في مشاريع بطول مصر و عرضها بيواصلوا الليل بالنهار …. و مش محتاجين من حضرتك حاجه
مصر بتحارب و بتبني في نفس الوقت ….. مصر بتحقق حلمها الان …. مصر بتبني لاولادنا ……
تحيا مصر
تحياتنا