29 Jul 2016
إبحث عن الحقائق وبلاش ينضحك عليك
————————————–
فى شهر فبراير الماضى صرّح الدكتور محمد العريان الخبير الإقتصادى المصرى واحد اشهر الخبراء الإقتصاديين على مستوى العالم أثناء لقائه مع أعضاء غرفة التجارة الأمريكية بالقاهرة
إن العالم يمر بأزمات وتغيرات اقتصادية خطيرة، وأن نصائحه للاقتصادات الناشة هى ضرورة زيادة الإنتاجية وتوسيع مشاركة القطاع الخاص .. وأكد إنه لا يمكن وضع حلول ثابتة لحل الأزمات الاقتصادية تصلح فى كافة دول العالم، .. والكلام اللى قاله ده هو مجرد رسالة لخبرائنا الفيسبوكيين ونوشتااااء الغبرة ، والعيال المثورجين على روحهم ، اللى كل واحد فيهم قاعد على القهوة ، ومدوّر العالم كله إقتصاديا وسياسياً وأمنياً من على الموبايل بتاعه من خلال فكره اللكولجى اللوزعى.
ومش كدة وبس .. لكن كمان قال إن ما تعانيه مصر حاليًا لا يزال لا يقارن بما تتعرض له بعض الدول الأخرى في المنطقة، وهذا مؤشر جيد على قدرتها على الخروج من الأزمة … وأضاف إن مصر تشهد بالفعل تحركا واسعا فى مجال الإقتصاد وإن مصر لم نصل إلى مرحلة الكساد الاقتصادى لإنها بالرغم من كل اللى مرت به من سلبيات اقتصادية، إلا أنها حققت نمو للسنة الثانية على التوالي، .. ومش كدة وبس .. لكن كمان بــ تمتلك مزايا عديدة تمكنها من الخروج من الأزمة.
و بجِملة بقى الحديث والهرى الكثير اليومين دوول عن الدولار وإنهيار الإقتصاد والقروض والديون ، فــ إحنا مقالنا النهاردة مقال قصير .. لإنه مش مقال تحليلى .. لكن مجرد عرض حقائق مش أكثر
ياترى إحنا عارفين مين هم الدول اللى على رأس قائمة الدول اللى عندهم أكبر دين خارجى على مستوى دول العالم ، وإييه هى نسبة الديون دى لإجمالى حجم الناتج المحلى للدولة !؟ … وعلى فكرة .. الكلام ده موجود ومتداول على الإنترنت .. وكنا عايزين ننزله كسؤال بحثى من غير إجابة .. وحضراتكم اللى تجاوبوا لكن فضّلنا نوفر عليكم ونعرض الأرقام مباشرة
ترتيب الدول من حيث حجم الديون الخارجية هى كالآتي:
1 – الولايات المتحدة حوالى 19 تريليون دولار بنسبة 114% من إجمالى الناتج المحلى
2 – المملكة المتحدة حوالى 15 تريليون دولار بنسبة 569% من إجمالى الناتج المحلى
3- فرنسا حوالى 6 تريليون دولار بنسبة 222% من إجمالى الناتج المحلى
4- ألمانيا حوالى 5.5 تريليون دولار بنسبة 145% من إجمالى الناتج المحلى
5- لوكسمبورج حوالى 3.5 تريليون دولار بنسبة 3443% من إجمالى الناتج المحلى
6- الصين حوالى 3 تريليون دولار بنسبة 37.5% من إجمالى الناتج المحلى
وبعيداً عن الدول دى .. لازم نعرض دولتين تانيين بشكل منفصل ..
تركيا … حوالى 400 مليار دولار بنسبة 56% من إجمالى الناتج المحلى
مصر … حوالى 55 مليار دولار بنسبة 16.5% تقريبا من إجمالى الناتج المحلى
عارفين يعنى إييه دولة يكون لها ديون خارجية تعادل إجمالى أو ضعف إجمالى أو حتى أربعة أو خمسة اضعاف إجمالى الناتج المحلى !!؟؟ .. فى حين إن دولة زى مصر بكل مشاكلها لا تتعدى ديونها الخارجية نسبة 16.5% من إجمالى الناتج المحلى !!!؟؟ … وياريت مش عايزين حد من الخلايا النائمة اللى عندنا على الصفحة يطلع يتفذلك ويقول إننا بنقول كدة علشان نعطى مبرر لأى قروض مستقبلية ممكن الحكومة تاخد بيها قرار .. لأن مش هو ده هدفنا خالص
إحنا هدفنا فقط إننا نوقف اللطّامة اللى شغالة طول الوقت فى موضوع الديون والقروض ، والناس اللى بتطلع تتشحتف وتعيط وتقول “مستقبل أولادنا ، والأعباء اللى هــ يتحملها احفادنا .. و القطة بتاعة ابناء احفادنا اللى مش هــ تلاقى تاكل” .. وكل الكلام ده علشان علشان بجد خلاص المرارة مابقتش مستحملة .. واللعب على وتر اوجاع الناس والكربلائيات اللى هم معيّشينا فيها اصبح شئ مقزز !! … والمشكلة للأسف إنك تلاقي الخبير اللوذعى من دوول ، بقاله سنييييين مش عارف يحل مشكله أسانسير او سباكة مع إتحاد ملاك العمارة اللى هو ساكن فيها .. و عمّال يفتي في حلول إقتصادية لدولة تعدادها 90 مليون مواطن …. يعنى عامل كدة بالضبط زى شخصية “الكوحيت” اللى قدمها الفنان أحمد راتب واللى وضعنا صورتها فى صورة المقال =D =D
زى بالضبط الشخص الحزبى البرلمانى المعارض (بدون ذكر إسمه حفاظاً على إحترامه) .. واللى صفحته كلها معارضة وهجوم على الدولة .. وحاطط مقال طويل عريض على صفحته بعنوان “خطتى وخطة المجموعة الاقتصادية لإنقاذ الاقتصاد” … واللى دخل على صفحتنا يعلّق على مقال الدولار وهو بــ يتساءل بتهكم وسخرية “إزاى إننا بنقول إن الين إنخفض بنسبة 40% قصاد الدولار وإن ده مش صحيح .. ولما قلتله إن الدولار كان بيساوى 75 ين يابانى سنة 2011 ، والنهاردة الدولار بيساوى 106 ين .. فــ رد عليا بسخرية وقال ” طب ماهو كدة يبقى بــ يزيد ، مش بــ ينخفض =D =D … أدى عينة من الخبراء والنخبة اللى بيتهموا الحكومة بالفشل ، وعايزين ينهضوا بالبلد إقتصادياً .. وهم مش فاهمين ألف باء حساب 🙂
ما علينا ….
إحنا طبعا ضد الديون والإقتراض لأننا بكدة بنضع عبئ على كاهل الدولة … ولو رجعنا لكلام د. محمد العريان اللى ذكرناه فى بداية المقال هــ نلاقيه قايل إن اللى بيصلح فى دولة مش شرط يصلح فى دول اخرى … لكن الأرقام اللى إحنا إستشهدنا بيها دى علشان بس نوضح إن كل ما الناتج القومى بتاعك بيزيد وحجم التضخم بيقل ، ده معناه إن الإقتصاد بتاعك إقتصاد قوى أو على الأقل متماسك … وبالنسبة للإقتصاد المصرى فهو بيتعافى والناتج المحلى بيرتفع ووصل فى نهاية 2015 لــ مستوى 331 مليار دولار بعد ما كان فى مستوى 230 مليار فقط فى سنة 2010 واللى المفروض إن الإقتصاد المصرى وقتها كان وصل لأعلى معدلاته وكانت الدولة مستقرة … لكن إحنا النهاردة تخطينا الرقم ده بكتيير جداً زى ما ذكرنا … وكل ده وإنت بتحارب الإرهاب .. وبتتعرض لحصار إقتصادى .. والسياحة شبه متوقفة .. ومع ذلك إنت مكمل فى سكتك وبتبنى نفسك 🙂
مافيش شعوب بتعدى أزمات من غير ما تتكاتف .. مافيش دولة بتتقدم ومعيشتها بتتحسن من غير ما تشتغل وتتنتج !! … أيوة لازم ننتج … ولازم نتخلص من النمط الإستهلاكى المعيشى اللى إحنا عايشين فيه .. واللى حصل فى ازمة الدولار فى اليومين اللى فاتوا خير دليل على الكلام ده !
مصر مش احسن بلد فى الدنيا .. بس مصر بخير وبتتقدم برغم كل السلبيات اللى بنعانى منها .. وبكرة بلدنا تبقى قد الدنيا .. بس بإيدينا مش بإيدين حد تانى 🙂 🙂