03 Nov 2016
وأخيراً … تعويم الجنيه المصرى .. !!
————————————
فى البداية نقول ، الحمد لله الذى بنعمته تتم الصالحات .. 🙂
قرااااااااار إتأخر كتييييير أوى .. وعجزت الحكومات المصرية المتعاقبة عن إتخاذه .. ومافيش دولة تقدر تاخده ، إلا إذا كانت دولة قوية وإقتصادها متين ، بمعنى إنه قادر على تطبيقه وتجاوز أعراضه الجانبية المؤقتة … ومش القرار ده بس .. لكن قرارات تخفيض الدعم والإكتفاء الذاتى من القمح والسلع الأساسية والخروج من الوادى الضيق إلى تنمية طول مصر وعرضها ، وبناء عاصمة إدارية جديدة تليق بمصر وبمكانتها ، علشان نخف الضغط من على القاهرة شوية .. ألخ ألخ ألخ … بس معلش .. هم المصريين كدة .. مش بيعرفوا ينجزوا ويعملوا المعجزات غير لما بيتزنقوا 🙂
ده إحنا لسة كنا بنقول إمبارح فى مقال صفحتنا عن هبوط الدولار اللى نشرناه الساعة 3 الظهر إن الدولار هــ يفضل ينزل ويطلع ، لغاية ما يستقر بالضربة القاضية ، أو بالتعويم .. 🙂 .. بس واضح إن طارق عامر كان محضّر لنا مفاجأة =D
بس لازم برضوا نفهم يعنى إييه تعويم الجنيه .. !!؟
الموضوع ببساطة خالص معناه تحرير سعر صرف العملة وترك قيمتها علشان تتحرك فى نطاق القيمة السوقية وحركة العرض والطلب … والتعويم بــ ينقسم إلى شقين:-
- الشق الأول … إنه يكون تعويم حر بمعنى ترك سعر صرف العملة يتغير ويتحدد على بحسب قوى السوق، .. وفى الحالة دى بــ يقتصر تدخل السلطات النقدية للدولة على الإستجابة بسرعة لتغير سعر الصرف حسب العرض والطلب فى السوق ، .. ومن الدول اللى بتعمل كدة أميريكا وإنجلترا وسويسرا …
- الشق الثانى هو التعويم المدار .. واللى بــ يعنى ترك سعر الصرف يتحدد وفقاً للعرض والطلب مع لجوء البنك المركزي للدولة للتدخل علشان يعدّل السعر مقابل بقية العملات ، لو الوضع إحتاج للتدخل … والتدخل ده بيكون بناء على بعض المؤشرات ، زى مقدار الفجوة بين العرض والطلب في سوق الصرف، ومستويات أسعار الصرف ألخ ألخ ..
وبدون الدخول فى تفاصيل ممله لأن الموضوع متشابك جداً .. نحب بس نقول إن النهاردة فى المؤتمر الصحفى لطارق عامر محافظ البنك المركزى ، كان وجهه بيحمل إبتسامة الواثق ، وبيتكلم من مركز قوة ، وبيعلن محددات الفترة القادمة وسياسات البنك المركزى وأليات التعامل وكأنه مؤتمر إعلان النصر فى الحرب .. و ده ناتج عن إن اللى حصل النهاردة فى مصر كان فعلا ضربة قوية بل وتكاد تكون قاضية وجهتها الدولة للسوق السوداء والمضاربة فى العملة فى شكل مقص حرامية كدة =D .. وتسببت فى خسائر بالملايين لكل اللى كانوا بيجمعوا الدولارات بجنون الفترة اللى فاتت ، إما علشان يضغطوا على البلد أقتصادياً ، ويركعوا الدولة والحكومة والرئاسة .. أو لتحقيق مكاسب شخصية على حساب المواطن المصرى والمتاجرة بأوجاع الناس ..
وعجبنى جدا طارق عامر لما واحد قام يهاجمه ويعلى صوته فى المؤتمر الصحفى ، ورد عليه طارق عامر بشدة وقال له “لحظة واحدة يا دكتور .. إنتم بتطلعوا كلكم تتكلموا فى الإعلام ، وكل واحد عامل فيها خبير و واخد لقب دكتور ، وبيبقى نفسى حد يسأله إنت أنجزت إييه فى حياتك وعملت إييه علشان تطلع تعمل فيها خبير 🙂 .. إحنا خلاص تعبنا بقى والشعب المصرى غلبان وبيصدق” 🙂 …. وبعد كدة جاوب على سؤاله بعد ما خلّاه يخرس خالص ..
قرار تعويم الجنيه زى ما قولنا قرار صائب .. لكنه إتأخر جداً ومعاه كل السياسات الإصلاحية من سنة 1977 ، زى ما ذكرنا فى مقالنا عن الدولار قبل كدة .. وإوعى حد يضحك عليك أو يفهمك إن الإقتصاد يمكن إختصاره فى سعر صرف العملة .. لأن اللى بيحاول يفهمك كدة ، إما إنه غبى ومغرض ، أو إنه بيراهن على غباء اللى قدامه ، أو عدم وعيه ومعرفته بمحددات قوة وضعف الإقتصاد فى أى دولة .. لأنه بالمقياس ده يبقى إحنا إقتصادنا أقوى من الإقتصاد اليابانى والروسى لأن الدولار زى ما شرحنا قبل كدة ، بــ يساوى 103 ين يابانى و65 روبل روسى 🙂
النتيجة اللى وصلنا لها النهاردة هى نتيجة مخطط لها من أيام رئيس الوزراء المهندس إبراهيم محلب ، اللى أعلن قبل كدة إنه فيه خطة من الحكومة لرفع الدعم التدريجى وتحرير سعر الصرف ، وكل الإجراءات الحكومية اللى تمت فى الفترة الماضية … وبغض النظر عن كل اللى بيتقال ، والهرى اللى شغال على الفيسبوك ، بإستثناء كلام بعض الشخصيات المحترمة .. والكلام عن سلبيات وإيجابيات القرار ، إحنا بس هــ نعرض بعض المكاسب اللى حصلت بعد الإعلان عن تعويم الجنيه :-
- دخول أكثر من 20 مليون دولار كإيداعات دولارية فى البنك الأهلى المصرى فقط .. والبقية تأتى ..
- توجيه ضربة لسوق المضاربات ، وإنهاء السوق السوداء تماماً ، وأى حد هــ يتعامل بأى عملة صعبة ، لازم يكون من خلال المنظومة الرسمية للبنوك .. و ده هــ يقلل بشكل كبير الفاقد النقدى ، حجم إقتصاد السوق الموازى خارج المنظومة الرسمية واللى هــ يعود بالفايدة على حركة التبادل التجارى داخليا وخارجياً.
- البورصة المصرية تربح 23 مليار جنيه وتسجل أكبر رقم مكاسب يومية فى خلال 13 سنة وتوقعات بتصاعد مؤشرات البورصة بداية من الأسابيع القادمة لمستويات غير مسبوقة
- تصريح الدكتور علاء عز، أمين الاتحاد العام للغرف التجارية، إن الصادرات المصرية هــ ترتفع من 10% إلى 20% خلال الفترة المقبلة، نتيجة تحرير سعر صرف الجنيه أمام الدولار فى السوق، وإن الواردات هــ تتراجع بالتبعية نتيجة هذا القرار.
- إقبال غير متوقع علي السندات المصرية الدولية فى بورصة لوكسمبورج ، و ده ترتب عليه إانخفاض العائد علي السندات دى ، و ده شئ إيجابى جدا بالنسبة لمصر
- طارق عامر قال إن الاستثمارات الي دخلت مصر 2015 /2016 هى الاعلي منذ 10 سنوات .. وقال إن كتير من المستثمرين اللى كانوا مترددين فى الدخول للسوق المصرى ، بدأوا فى التواصل مع الجهات الرسمية لبدء إجراءات بث إستثماراتهم فى مصر … وطبعا الكلام ده بسبب إنه تم توحيد سعر الصرف فى مصر وأصبح سعر واحد بدل سعرين .. و ده هــ يخلى المستثمر يتحرك بمنتهى الأريحية وبحسابات محددة لحسابات المكسب والخسارة ..
- تحرير سعر الصرف هــ يؤدى إلى تحسين تنافسية مصر الخارجية ودعم الصادرات والسياحة وجذب الاستثمار الأجنبى. وكل ده هــ يساعد على تعزيز النمو وخلق فرص العمل وتقوية مركز مصر الخارجى.
- توقعات برفع التصنيف الإئتمانى لمصر ..
وبدون الإفراط فى التفاؤل ، أو السقوط فى هوة التشائم .. أكيد إحنا ما بقيناش سويسرا فجأة .. وأكيد لسة الإقتصاد المصرى بيواجه صعوبات كنتاج للتغيير فى منظومة الإقتصاد والتحول من إقتصاد ريعى إلى إقتصاد إنتاجى .. وإذا كان أى قرار فى الدنيا له إيجابيات وسلبيات .. فــ الأكيد إن الإيجابيات من اللى حصل ده أكبر بكتير .. وخصوصاً إن توجهات المجموعة الإقتصادية فى الفترة القادمة هــ تكون بإتجاه البورصة ، واللى هى من أهم المؤشرات اللى بتهم المستثمرين .. و ده معناه زيادة فى الإستثمارات الأجنبية والأموال اللى هــ يتم ضخها فى السوق فى شكل مشروعات ، هــ تخلق فرص عمل .. والعجلة تبدأ تدووووووووررررررر
وإوعوا تفتكروا إن أباطرة السوق السودا هــ يستسلموا بسهولة وده طبعا متوقع .. دى حرب تكسير عظام بتخوضها الدولة ،.. مش ضد مجموعة من المضاربين بس .. لكن ضد جماعة وجهات وأجهزة تسعى إسقاط مصر .. يعنى الحرب حرب إقتصادية .. وهو ده كان معنى الكلام اللى قاله طارق عامر النهاردة .. وهو إن الدولة بتواجه حرب مصيرية إتفرضت عليها ، و الدولة هــ تخوضها ، و مصممة على الإنتصار فيها .. مهما كانت الصعوبات !
أكيد مش بين يوم وليلة … لكن هــ يحصل .. بس قولوا يارب بلدنا ..
يارب ((((مــــصـــــر)))) 🙂