9 Mar 2015
المؤتمر الاقتصادي – مستقبل شعب
————————————-
حاله صرع و حرقان و رعب من الاخوان من المؤتمر الاقتصادي …. و تهديد و وعيد حلفان بأغلظ الايمان و الطلاق بالتلاته ان على جثتهم ان يتعمل المؤتمر ده و ينجح ….. طب ايه الموضوع و ليه هما مرعوبين قوى كده من المؤتمر ده ؟؟؟ ….. 🙂 🙂
تعالوا نبص مع بعض على شوية ارقام و حقائق عن اداء مصر الاقتصادي الفتره اللى فاتت.
اللى حصل يوم 30 يونيو غير خريطه العالم كله و افشل مخططات دول عظمي و غير مستقبل العالم كله …. و شرحنا ده كتير بالتفصيل في مقالات سابقه …. فكان التحركات من الطرف الاخر باستخدام كل الوسائل سواء الضغوط السياسيه او باستخدام حلفاؤهم في الداخل من الاخوان الارهابيين بمختلف مسمياتهم سواء الاخوان او داعش او النصره او انصار المقدس او ام الخلول 🙂 🙂 ….
المهم كان من اهم الوسائل و اللى كانت عمرها ما بتخيب ابدا مع اي دوله و بتجيب مناخيرها الارض هي الضغوط الاقتصاديه سواء بمنع المعونات او القروض او حتي التسليح و نقل التكنولوجي باستخدام المنظمات الدوليه اللى بتتحكم في المواضيع دي و منها البنك الدولي ….. يعني يا تسمع كلامي يا اما شعبك حيموت من الجوع ….. فلا فلوس تشتري منها بترول و لا قمح و لا كهربا و لا غاز ولا حتي حتعرف تدفع المرتبات و تعلن افلاسك …. و خاللي شعبك يقوم عليك لما الجوع يقرصه ….. يعني من الاخر حنخليك تدمر نفسك بشعبك.
فاول حاجه عملوها انهم خفضوا التصنيف الإتماني للمره الرابعه و منعوا الاقتراض من البنك الدولي و اوقفوا المعونات الاوروبيه و الامريكيه ….. و لان التنسيق و الترتيب المصري الخليجي كان مفاجئا و في اعلي مستوياته …. فكان رد الفعل صادم تماما ليهم …. “و مالوا …. احنا مش عايزين منكم حاجه 🙂 🙂 ” …. و ده الدور الخليجي الحاسم اللى انقذ مصر و اللى شرحنا جزء كبير منه في مقال ” مصر ما بين العدوان الثلاثي – الجزء التالت ” …. و اللى في كل مناسبه يذكره الرئيس السيسي و يقدم الشكر ليهم لانهم فعلا كانوا سبب حاسم في خروجنا من عنق الزجاجه و تحررنا تماما في قراراتنا من الضغوط الاقتصاديه الغربيه 🙂 🙂
فبعد تدمير الاقتصاد المصري باغراق مصر في بحر من الديون عاليه التكلفه و الفوائد و اغلاق المصانع و تدمير السياحه …. الخ …. فبقينا عايشين فتره اعتمادا على المعونات الخليجيه …. و لان ده مش حيستمر الى الابد …. فكان لازم مصر تتحرك و تعيد نشاطها الاقتصادي و تقف على رجلها عشان تكمل بدون الرجوع مره اخري و الاستسلام الى الضغوط الاقتصاديه الغربيه …. فكان الهدف الاساسي من تحرك الاخوان الارهابيين في مسيراتهم المسلحه و القاء القنابل في كل مكان و تدمير ابراج الكهرباء هو افشال اي تقدم اقتصادي او دفع عمليه الاستثمار …. حتي يزهق الخليج من تكلفة اعباء بلد تعداده 90 مليون و يتركوا دعمنا ….. فتقع مصر تماما.
المهم ….اللى جننهم بعض الحقائق التاليه 🙂 🙂 :-
مصر مولت مشروع قومي بقيمة 8.5 مليار دولار محليا من المصريين و بدون الاحتياج الى البنك الدولي في اقل من اسبوع … و اللى حيزود اهم مصدر للعمله الصعبه لمصر ثلاثة اضعاف و في اقل من سنه 🙂 🙂
مصر سددت 3 مليار دولار الوديعه القطريه اللى كانت اغلي وديعه في تاريخ الاقتصاد المصري تكلفة بنسبة فوايد تتعدي ال 6% بدون التأثير على الاحتياطي النقدي المصري.
مصر مولت تنفيذ انشاء 4000 كيلومتر طرق و محاور حديثه للتخديم على المشاريع التنمويه اللى حتتعمل في مصر.
في بداية الموازنه الحاليه …. مصر اعلنت انها تأمل في نسبه نمو تبلغ 2.5% …. لكن نائب مدير البنك الدولي صرح ان البنك الدولي يتوقع تعدي نسبه النمو في الاقتصاد المصري خلال العام المالي الحالي نسبة 4.5% …. كما يتوقع ان تتعدي نسبة النمو العام القادم ال 7.5% 🙂 🙂
مصر مولت صفقات تسليحيه حديثه ضخمه تتعدي مليارات الدولارات لحمايه ما يتم انجازه من انجازات اقتصاديه و لحمايه الدوله المصريه.
شركة بريتش بتروليم تصرح بأنها ستضخ 12 مليار دولار استثمارات مباشره في مصر في قطاع الغاز الطبيعي و تعلن عن اكتشاف اكبر حقل غاز شرق البحر المتوسط.
طب كل ده و لسه المؤتمر الاقتصادي مبدأش ….. امال مرعوبين ليه من المؤتمر ؟؟؟ ….
المؤتمر ده المفروض انه حيتم فيه التعاقد على مجموعه من المشاريع تتعدي قيمتها ال 100 مليار دولار كإسثمارات مباشره …. يعني فلوس جايه من بره الى جوه …. في مشاريع زي محور قناة السويس اللى قيمته السنويه المضافه ممكن تتخطي ال 100 مليار دولار سنويا.
و مشروع تخزين الحبوب العملاق اللى حيخاللي مصر سلة الحبوب لافريقيا و الشرق الاوسط كله و حيوفر مليارات سنويا …. و مشروع المثلث الذهبي التعديني و غيره من المشاريع اللى حتنقل مصر نقله اقتصاديه هاااائله. ….
مش بس كده …. ده فيه عشرات الدول اكدت حضورها برجال اعمالها و بيتسابقوا على الفوز باكبر قدر ممكن من المشاريع …. لان ربحها مضمون و كبير ….
و ده ليه معني واحد …. ان نجاح المؤتمر يعني خروج مصر تماما من اي تبعيه اقتصاديه او سياسيه او تسليحيه …. و مش حيكون فيه اي مدخل يقدر يدخل منه كلاب الارهابيين او العملاء للتأثير على القرار المصري في اي وقت.
فاضل بقي اخر حاجه و أهم حاجه …… مش معني ان الشركات و المستثمرين جم و حطوا فلوس و عملوا مشاريع ان مصر وقفت على رجليها ….. او اننا حنبقي سويسرا تاني يوم …. لكن الكره دلوقتي في ملعبنا احنا كشعب …. و لو مقومناش بدورنا التاريخي يبقي كل ده مش حيبقي ليه اي لزمه و حنفضل زي محنا او يمكن اسوأ كمان …. ازاي ؟؟؟؟؟
معدل العمل اليومي هو 480 دقيقه …. فلا يمكن لينا اننا نتقدم و لا ننهض و لا نطلب بزيادة مرتبات و غيره من الطلبات في ظل معدل انتاج العامل اليومي للعامل و الموظف المصري اللى هي 23 دقيقه من ال 480 دقيقه في حين ان معدل انتاج العامل الاوروبي هي 420 دقيقه.
العامل او الموظف المصري بيروح الشغل بيصطبح الاول و يشرب الشاي و السجاره … و يروح يصلي في نص ساعه …. و يتكلم في الموبايل …. او بالاصح …. لازم نغير المفهوم بتاعنا في العمل اللى هو كيف تتفنن انك تحصل على مرتبك بأقل مجهود او انتاج ممكن
العمل يا مصريين …. العمل ثم العمل ثم العمل …. كل الدول اللى اتقدمت و نهضت في سنوات معدوده مش احسن مننا ….. الفرصه اللى عندنا مش لازم نضيعها …. و اولادنا مش ممكن يسامحونا لو ضيعناها من ادينا ….
تحياتنا