23 Dec 2017
مصر المستقبل ..
—————–
النهاردة الرئيس المصرى كان بيفتتح العديد من المشروعات الإستراتيجية والتنموية اللى هــ يكون لها أكبر اثر فى حاضر مصر ، ومستقبلها .. ومستقبل اجيال قادمة من ابناء مصر …. وعلشان مانطولش عليكم ونختصر الكلام هــ نقول الأتى:
السيسى قال إن ماحدش هــ يقدر يمس مصر أو يقرب من شبر واحد من أرضها .. وإن المشروعات التنموية دى كلها علشان مستقبل المصريين … وماتخافوش من أى حاجة ، وماتقلقوش من تلاحق الأحداث … إحنا جامدين أوى ..
السيسى قال .. أنا ما بأخافش من أى شئ ، ولا من أى حد .. أنا بأخاف بس منكم انتم يامصريين إنكم ماتكونوش إيد واحدة … لكن طول ما إنتم إيد واحدة ، هــ تقدروا تتحدوا الدنيا
السيسى قال إنه كان المستهدف أن يتم الإنتهاء من حفر نفقين تحت القناة بحلول 30 يونيو 2018 .. و هو كان فعلا قال كدة من سنة مع بدأ أعمال الحفر .. والنهاردة أعلن إنه بحلول يونيو القادم ، هــ يكون تم الإنتهاء من 4 أنفاق وتم إفتتاحها والعبور منها لسيناء …. وعلشان نعرف حجم الإنجاز لازم نقول إن نفق الشهيد أحمد حمدى اتفتح سنة 1981 و بدأوا انشائه فى 1975 … يعنى إتعمل فى 6 سنين … وكان عرضه 7.5 متر … لكن مصر النهاردة بتعمل 4 أنفاق كل واحد فيهم عرضه 11 متر فى سنة ونص فقط لا غير .. يعنى إحنا بنعمر .. يعنى إحنا بنبنى .. ولا عزاء للحاقدين
السيسى قال إنه فيه فى خلال ال 3 سنوات القادمة مشروعات عمرانية بــ 100 مليار جنيه .. يعنى سيناء بتاعة مصر مش بتاعة حد تانى .. يعنى مصر بتعمر أرضها .. يعنى مصر مش هــ تسيب سيناء لحد .. يعنى إحنا مش سايبينها من غير تعمير علشان نسلمها لإسرائيل زى ما قال النشطاء والمناضلين الثوريين إياهم .. و ولا بنعمرها علشان نسلمها لإسرائيل متشطبة و على المفتاح زى ما قال برضوا نفس النشطاء والمناضلين الثوريين إياهم 🙂
الفريق مميش قال إن نسبة السفن العابرة فى قناة السويس إرتفعت بنسبة 11% .. وإجمالى منسوب وحجم الحمولة إرتفع بنسبة 12% .. وإيرادات قناة السويس الدولارية غرتفعت بنسبة 15% … وإن قناة السويس فى شهر نوفمبر سجلت أعلى معدل عبور سفن فى تاريخها فى الإتجاهين وهو 74 سفينة … وإنه تم وضع برنامج لتسويق المناطق اللوجستية والصناعية فى محور التنمية ومنطقة القناة على مستوى العالم …… يعنى قناة السويس ما إنهارتش .. يعنى القناة مابتخسرش .. يعنى المشروع له جدوى إقتصادية .. يعنى فلوس المصريين وتعبهم ماراحش على الأرض .. يعنى حركة التجارة العالمية ماتحولتش لرأس الرجاء الصالح .. يعنى قناة بنما ما اخدتش زباين من القناة … سامع يا إسمك إييه انت وهو !!؟؟
الرئيس السيسى النهاردة تابع اللحظة التاريخية لخروج ماكينة الحفر ويعبر لأول مرة من الشرق إلى الغرب عبر أنفاق الإسماعيلية .. 🙂
تم إفتتاح كوبرى الشهيد البطل العقيد أ.ح أحمد منسي كجزء من مخطط الدولة نحو ربط “سيناء” بالوادي عبر إنشاء عددٍ من الكباري العائمة بطول المجرى الملاحي للقناة كمحورٍ رئيسي بالمشروع القومي لتعمير سيناء والتى ستحقق تكاملا مع المعديات المنتشرة بطول المجرى الملاحي لتخفيف تكدس المواطنين والمركبات والخامات، وذلك بالتزامن مع استكمال تنفيذ مشروع حفر الأنفاق .. كما تعتزم هيئة قناة السويس البدء في المرحلة الثالثة بإنشاء اثنين من الكباري العائمة أحدهما في “منطقة الشط” بالسويس والثاني بمنطقة “سرابيوم” بالإسماعيلية في 2018، التزامًا باتفاقية القسطنطينية في توفير سبل الانتقال للقاطنين على ضفتي القناة.
الرئيس إفتتح كوبرى الشهيد البطل الجندى أبانوب جرجس بمنطقة القنطرة شرق، حيث يقع بمدينة الإسماعيلية بالكم 46.800، ويربط بين ضفتي القناة بطول 350 مترا، ويسهم فى خدمة الحركة المرورية من وإلى سيناء.
تم إفتتاح المرحلة الثانية من مشروع الاستزراع السمكى بمنطقة أحواض الترسيب شرق القناة الذى تبلغ طاقتة الكلية 4440 حوضا لاستزراع الأسماك البحرية عالية الجودة، على مياه قناة السويس، لسد الفجوة الغذائية وتنمية منطقة قناة السويس وسيناء وخلق مجتمعات عمرانية جديدة .. وقد نجح المشروع في خلق 3 آلاف فرصة عمل مباشرة وغير مباشرة ترتفع إلى 10 آلاف فرصة عمل بعد اكتمال المشروع، حيث تم افتتاح المرحلة الأولى بطاقة 1034 أحواض، واستكمال مراحل المشروع الكبير، على أن يتم الانتهاء من المرحلة النهائية خلال الفترة من منتصف إلى نهاية 2018.
وتفقد الرئيس السفينة أحمد فاضل التى انضمت إلى أسطول شركة التمساح، إحدى الشركات التابعة للهيئة لبناء السفن لتشارك في اكتشافات حقول الغاز والبترول بالبحرالمتوسط، وتتمثل أهمية السفينة “أحمد فاضل” في كونها أكبر وحدة متعددة الأغراض وإمدادات ودعم لوجستي فى الشرق الأوسط كله … و ده يخلينا نفهم حجم المتوقع من افكتشافات البترولية فى الفترة القادمة
واخيراً … شوفنا بعنينا 52 ألف وحدة سكنية فى الإسماعيلية الجديدة جاهزة للإسكان بمرافقها زى ما الرئيس قال .. المدرسة وقسم الشرطة والكنيسة والمسجد وكل المرافق الضرورية فى محاولة توطين 400 الف مواطن ….. يعنى سيناء بتاعة المصريين مش بتاعة حد .. يا متعلمين يا بتوع المدارس 🙂😉
وعاشت مصر وعاش شعبها العظيم