21 Feb 2018
الغاز .. والعملية الشاملة المصرية ..
——————————–
فجأة وبدون أى مقدمات .. إجتاحت مصر موجة شديدة من الذعر والقلق ، ترتب عليها موجات من الهرى والجدال على خلفية تصريحات رئيس الوزراء الإسرائيلى بنيامين نتنياهو اللى طلع فى بيان تلفزيوني يصرح بكل سعادة ويقول ، إنه تم التعاقد على تصدير الغاز الطبيعى لمصر فى صفقة بــ 15 مليار دولار على 10 سنوات .. والحقيقة إحنا مش قادرين نفهم لحد دلوقتى حالة القلق واللخبطة ويمكن الهجوم اللى حصل سواء من المؤيدين أو من المعارضين للدولة …. طب المعارض ومفهوم جدا اللى بيعمله .. واللى وصل لمرحلة من البؤس إنه يكذّب دولته ، و يستشهد بكلام العدو الأول له وللدولة البمصرية علشان فقط يؤيد وجهات نظره ويثبت إن كلامه ومصطلحات الفنكوش بتاعته طلعت صح … لكن المؤيد لمصر ولجيشها ولقيادتها السياسية .. إتهزيت ليه ؟؟ .. قلقت ليه ؟؟ .. ليه اصبحت فجأة محتاج لحد يلحقك ويسندك ويقوى موقفك .. هو انت نسيت إن مصر بتخوض حرب شاملة وإلا إييه !!؟ .. وإن جزء من الحرب الشاملة دى هو الحرب الإعلامية ، اللى بتضرب فى أعماق السلام المجتمعى وتهد فى أساسات التضامن مع الدولة !؟
مافيش جديد فى اللى بيحصل النهاردة .. بل بالعكس .. هو محصلة كل اللى قامت به مصر على مدار 4 سنوات .. واللى إحنا نشرناه على الصفحة دى فيما يتعلق بمستقبل الغاز فى مصر والمنطقة ، أو حتى فيما يتعلق بالمستقبل السياسى …. وعلشان ماندخلش فى تفاصيل دقيقة ومعقدة .. وكلام كتير وتفاصيل فنية تم تناولها سواء فى الإعلام أو على صفحات السوشيال ميديا .. فإحنا هنا هــ نتكلم فى عدة نقاط نراها هى الأهم من وجهة نظرنا بعيدا عن التفاصيل الفنية .. واهمها .. هى ليه كانت التصريحات الإسرائيلية دى أصلا !؟
النقطة الأولى:
اللى قاله نتنياهو واللى تم تداوله فى بعض وسائل الإعلام ، وبالذات الأبواق المغرضة هو مجرد صياغة خبيثة لنشر الخبر على نطاق واسع ، واللى لها 3 أهداف:
– أولا .. دعم لموقفه فى الانتخابات القادمة .. علشان يقول للشعب بتاعه أنا جبتلكم 15 مليار دولار .. ومن مين .. من مصر !
– ثانيا .. دعم لموقفه اما إتهمات قضايا الفساد اللى بيواجهها هو وبعض أفراد الطاقم المعاون له
– ثالثا وهو الأهم .. إحراج مصر أمام شعبها المعادى لكل شئ جاى من جانب الكيان الصهيونى .. وخصوصاً إنه اغفل عن عمد إن الإتفاق مش مع الحكومة المصرية .. ولكنه تم مع شركات قطاع خاص ، اللى هى الشريك الأجنبى اللى بيمتلك الحصة الأكبر فى محطتى الإسالة المصرية الموجودين فى دمياط وإدكو .. مع ملاحظة إنه ماجابش خالص سيرة إن الــ 15 مليار دول هو اللى دفعهم الشريك الإجنبى نتيجة حصوله على الغاز لتسييله فى مصر ثم إعادة تصديره من مصر لأوروبا مرة أخرى
النقطة الثانية:
احنا مش هناخد غاز من إسرائيل وبس .. لكن من إسرائيل ولبنان وقبرص واليونان وحتى من السعودية كمان .. بس مش علشان احنا محتاجينه .. لكن علشان مصر هتتحول إلى مركز أقليمى لتصدير الغاز للعالم كله لأننا الدولة الوحيدة فى المنطقة اللى عندنا البنية الأساسية ومحطات تسييل الغاز الجاهزة لتصدير الغاز لأوروبا وافريقيا وجنوب وشرق أسيا …
أومّال تطوير قناة السويس ، وطشط أم وجدى ، والمنطق الصناعية ، ومحور التنمية ، وإتفاقيات التجارة ، وخط الحرير الصينى ، ومصانع البترو كيماويات كل ده كان لييه ؟؟
النقطة الثالثة:
على مدار الأسابيع اللى فاتت أعلنت مصر إنها ستكتفى من إنتاج الغاز المسال للإستهلاك المحلى بحلول يونيو 2018 .. وقام رئيس الدولة المصرية بإفتتاح حقل ظهر .. وإتعمل عليه ضجة إعلامية فى معظم المواقع الإخبارية العالمية .. وتم الإعلان عن حجم الإحتياطى الضخم اللى سيتم إستخراجه من الحقل ده (30 تريليون قدم مكعب من الغاز فى مساحة تغطى 100 كيلومتر) ، واللى يفوق أصلا إحتياطات الحقول الإسرائيلية المكتشفة مجتمعة .. وأعلنت شركة إينى إن الحقل ده ، بحجم العمل والإنجاز اللى تم فيه ، يمثل ايقونة المشاريع الكشفية للشركة على مستوى العالم .. وبعدها تطلع شركة BP الإنجليزية وتعلن إن مراحل الإنتاج فى حقل أتول بدات قبل معادها بــ 7 شهور ، وإنها بتتطلع لإكتشافات جديدة مع مصر … فى نفس الوقت اللى اعلنت مصر فيه عن طرح مناقصة عالمية للتنقيب عن الغاز والبترول فى 11 منطقة فى شرق المتوسط والدلتا .. ووقت مصر إتفاقية مع شركة شلومبرجير للتنقيب عن البترول وتقديم الخدمات البترولية فى خليج السويس .. يبقى إزاى مصر هــ تستورد غاز من إسرائيل !
النقطة الرابعة:
وزير البترول طارق الملا عمل مداخلة فى برنامج كل يوم مع الإعلامى عمرو أديب لمدة حوالى 20 دقيقة .. وشرح كل شئ بمنتهى البساطة ، ورد على كل التساؤلات .. وقال أن الحكومة المصرية مش هى اللى هــ تستورد الغاز من الخارج، و لكن شركات خاصة دولية هى اللى هــ تعمل كدة فى إطار توفير احتياجاتها، بالإضافة إلى إسالة الغاز وإعادة تصديره مرة أخرى فى إطار تحول مصر لمركز إقليمى للطاقة، وتحرير سوق الغاز .. وقال إن مصر ستحقق الاكتفاء الذاتى من الغاز خلال العام الحالى، من خلال حقول “ظهر وشمال الإسكندرية ونورس واتول”، وهو ما سيؤهل مصر مع استيراد الغاز من دول حوض شرق البحر المتوسط للتحول إلى مركز إقليمى للطاقة.
النقطة الخامسة:
لييه الحكومة المصرية ماتحركتش بإجراء إعلامى إستباقى لشرح الإتفاقية !!؟؟ .. ببساطة خالص لأن الخبر ماكانش المفروض يتم الإعلان عنه بالشكل ده المخالف للحقيقة (راجع النقطة الأولى) .. ومش المفروض إن الحكومة المصرية تصدر بيانات مع كل إجراء تقوم به اى شركة من الشركات الأجنبية صاحبة الإستثمارات الكبرى فى مصر فى كل قطاعات الإستثمار (ده إحنا لسة عندنا إستثمارات كتيرة والهري هيبقى عالمى 😊 ) .. بالإضافة إن المتحدث الرسمي لوزارة البترول ، حمدي عبدالعزيز، صرّح وقال تعليقاً على اللى إتنشر فى المواقع الإلكترونية حول توقيع اتفاقية بين شركات خاصة لاستيراد غاز من الخارج، بأنه ليس لدى وزارة البترول تعليق على أي مفاوضات أو اتفاقيات تخص شركات القطاع الخاص بشأن استيراد أو بيع الغاز الطبيعي … وقال في بيان رسمي، أنه «سيتم التعامل مع أي طلبات تصاريح أو تراخيص ستقدم من قبل القطاع الخاص وفقاً للوائح المطبقة وذلك في ضوء أولاً أن مصر تمضي قدما لتنفيذ استراتجيتها لتصبح مركزا إقليميا لتجارة وتداول الغاز، وثانياً أن الحكومة اتخذت خطوات لتحرير سوق الغاز في مصر ووضع إطار تنظيمي يسمح لشركات القطاع الخاص بتداول وتجارة الغاز.
النقطة السادسة والأخيرة:
مصر بالفعل بتتحول لمركز عالمى للطاقة ، مش فى الغاز بس ، ولكن فى الكهرباء أيضا ..، وكل الل بيحصل على مسرح الأحداث ده ما هو إلا سياسية حافة الهاوية .. اللى هــ تفضى فى النهاية إلى لا شئ .. لأن مصر خلاص فرضت أمر واقع على العالم كله .. وأصبحت مركز إقليمى ودولى بالفعل .. وإجتذب إستثمارات قوية فى كافة القطاعات .. ودعمت جيشها بقوة ضاربة مش إقليمية فقط ، ولكن على مستوى العالم .. وربطت نفسها بمعظم دول العالم القوية إقتصادياً .. وبالتالى طول ما إنت قوى .. هــ تفضل كل دول العالم فى ظهرك ، وهــ تقوم بدور المدافع عنك … مش علشان سواد عنيك .. ولكن لحماية المكتسبات الإقتصادية اللى حققوها .. وشوف إيطاليا عملت إييه لما تركيا قررت فقط تتحرش بسفن شركة إينى الإيطالية فى المياه القبرصية 😉 .. يعنى مرة تانية إنت اصبحت امر واقع ، وأمنت نفسك أمام إحتمالية أى عمل عدائى ضدك .. وكمان فرضت نفسك كشريك عسكرى وإقتصادى وأمنى وإستراتيجى .. لأن كله كووووم .. ومصادر ومراكز الطاقة كووم تانى خالص 😊 …. أومّال حضرتك فاكر الحرب إللى كانت على مصر ومازالت .. ومحاولات تركيعها وتطويعها وإسقاطها من 2011 دى كلها كانت لييه !!؟ .. والنهاردة بس نقدر نقول إنك فرضت نفسك على رقعة الشطرنج .. وبشروطك … و طوول مانت قوى ومستقر ، ماحدش هــ يقدر يقربلك 💚😊
اللينك ده من صفحة “CNBC Arabia” العالمية والمتخصصة في الشئون الاقتصادية بيشرح ببساطة خالص أبعاد الصراع على الغاز فى شرق المتوسط .. وأسباب إن بعض الأطراف هــ تتجنن من كشوفات الطاقة اللى بتحصل فى مصر
أصدقائنا … إحنا امام حرب مواجهات حقيقية .. وحرب شاملة فعلية تتضمن الحرب الإعلامية القذرة التى تشنها علينا كل الأبواق المغرضة والمعادية للدولة .. واللى هتزيد بكثافة شديدة جدا لحد 10 يونيو القادم .. وطالما عجزوا عن إسقاط الدولة خارجياً ، يبقى لازم يستمروا فى محاولات إسقاطها داخلياً ، بتحويلها إلى دولة هشة … يعنى الهدف الأول والأخير هو إنت …
جيشك بيحارب دلوقتى بالفعل .. وكل قطاعات القوات المسلحة بتخوض عمليات على مسرح الأحداث فى الإتجاهات الحدودية الأربعة .. بالإضافة لقيام القوات البحرية بتأمين مسرح العمليات وتأمين مصادر الطاقة المصرية الجديدة .. فــ ياريت ماتسمحش لحد إنه يخليك الباب الخلفى اللى يدخل منه لضرب الجيش المصرى فى ظهره .. وإفتكر دايما إنك إنت الجيش والظهير الشعبى للدولة المصرية
وأخيراً .. الرئيس السيسى طلع النهاردة وقال إننا جبنا جون يامصريين .. وإن مصر اليوم بفضل الله حطت رجليها على أنها تبقى المركز الإقليمي للطاقة في المنطقة .. وقال إن مصر اقتنصت الفرصة دى من دول أخرى في المنطقة كانت تريد أن تصبح المركز الإقليمي للطاقة !!!
(بدون ذكر اسماء .. أول حرف من إسمها تركيا =D =D )
أيوة ياريس إحنا جبنا جوووووون …. من قذيفة صاروخية غازية ..
وفى المقص كمان …