21 May 2018
إنخفاض البطالة ونتاج تحسن الإقتصاد الإنتاجى ..
———————————————–
فاكرين لما كنا بنقول فى مقالتنا الإقتصادية إن مصر بتقلب منظومة الإقتصاد بتاعها من إقتصاد خدمى إلى إقتصاد إنتاجى .. والبعض كان بيستغرب التعبير ده أوى !؟؟ ..
الإنفوجراف ده .. ومن خلال جزئية واحدة فقط وهى جزئية إنخفاض معدلات البطالة ، بيوضح الطفرة اللى حصلت فى بعض القطاعات من مكونات الإقتصاد المصرى ، واللى موجودة فى أى إقتصاد فى العالم مش فى مصر بس ..
خلاص مافيش حاجة إسمها إن إقتصاد مصر بالكامل يبقى قائم بالأساس على عوائد السياحة وقناة السويس … خلاص مصر بتعمل منظومة إقتصادية متكاملة قائمة على إستغلال كل الإمكانيات والموارد المتاحة ، وتعظيم الإنتاج المحلى وجذب إستثمارات فى كافة القطاعات وخلق فرص عمل لتعظيم عوائد الإنتاج وليس الخدمات ..
و مش معنى كلامنا إن عوائد الخدمات دى شئ مش مهم .. لكن ماينفعش الإقتصاد الكلى للدولة يقتصر عليها ، لأننا بكدة بنخلق حالة من الإقتصاد الهش اللى ممكن ضربه بسهولة جداً … وكل ده بيحصل بالتزامن مع تدرج رفع الدعم وتحرير الدولة من نظام إقتصاد المنح والهبات اللى خلق حالة مجتمعية من الإعتمادية والتواكل وإهدار لمقدرات الدولة بــ لا مبالاة مجتمعية ترسخت على مدار سنين طويلة .. واللى لو كنا مشينا فى مسار الإصلاح الإقتصادى وراء الرئيس السادات سنة 1977 بالتنازل عن بعض ملاليم وقروش ، ما كونّاش وصلنا للى إحنا فيه دلوقتى من الوصول لمرحلة إن الإصلاح الإقتصادى اصبح مسألة حياة أو موت .. مع الوضع فى الإعتبار إن دولة زى الصين بدأت رحلة الإصلاح الإقتصادى سنة 1978 بإجراءات غاية فى القسوة والصعوبة ، وفرضتها الحكومة على الشعب بالحديد والنار .. وشوفوا الصين فين دلوقتى … يعنى لو كنا سمعنا كلام الرئيس الراحل السادات وقتها ، كان ممكن نبقى زى الصين النهاردة !
لكن معلش .. و زى ما المثل الإنجليزى بيقول:
Its never too late
اللينك ده من على موقع صفحتكم الأرشيفى ، فيه مجموعة من المقالات الإقتصادية فى كافة المناحى من أول ما بدأنا سكة الإصلاحات الإقتصادية … ممكن تسلوا صيامكم وتقرأوها ..