20 Jan 2019
مصر وأكبر مشروع طاقة شمسية فى العالم !!
———————————————
– مصر بتعمل مشروع انفاق بأعلى معدلات حفر فى العالم ..
– مصر بتعمل أوسع جسر معلق بالعالم.. أعلى محور روض الفرج ..
– مصر بتعمل أضخم عملية مسح طبى مش بس فى العالم لكن فى التاريخ الإنسانى كله .. لــ 100 مليون شخص فى مبادرة 100 مليون صحة ..
– مصر تنشئ مسجد الفتاح العليم فى العاصمة الإدارية كرابع أكبر مسجد بالعالم بأعلى مأذنة فى أفريقيا..
– مصر تفتتح أكبر كاتدرائية في أفريقيا والشرق الأوسط ..
– مصر تحقق اسرع معدلات إنجاز لمشروعات البنية التحتية على مستوى العالم ..
– مصر تعتبر أكبر Mega Project على مستوى العالم فى الوقت الحاضر ..
– مصر بتعمل اكبر مشروع تطوير عشوائيات فى العالم ..
– مصر ستفتتح المرحلة الاولى من مدينة منسوجات السادات الاضخم فى الشرق الاوسط بنهاية 2019 ..
– المصريين يجمعوا تكاليف حفر قناة السويس الجديدة فى اكبر واسرع عملية جمع تكلفة لمشروع قومى على مستوى شعبى فى العالم كله ..
– ألخ ألخ ألخ
أصبحنا طول الوقت بــ نسمع جملة ( أكبر – اضخم – اعرض – اعلى – أسرع ) كقاسم مشترك ووصف متكرر لكل ما يتم إنجازه على أرض مصر فى خلال الكام سنة اللى فاتوا ، وإلى ما شاء الله
زمان كنت دايما تسمع التاوهات ومصمصة الشفايف لما البعض كان بــ يقرأ خبر واحد زى ده عن أى حتة فى العالم ، وتلاقى اللطامة إشتغلت .. ويقولك شايفين الناس اللى بتصنع حضارة .. شايفين الدول اللى بتبنى نفسها .. ياريتنا نقدر نعمل كدة …. و … و …. و …. وغيره وغيره من الكلام اللطيف ده ، وما كانوش ساعتها بيجيبوا سيرة الغلابة ، ولا أكل الغلابة ، ولا ساندوتشات الحلاوة بالقشطة للغلابة … لكن لما بدات مصر تبنى وتعمّر .. بدانا نسمع التأوهات واللطم والولولة .. لأن الموضوع فى الأصل ماكانش مصر .. ولا كان حزن على مصر .. لكن كان لترسيخ شعور الدونية .. ونشر الإحباط بين جموع المصريين .. و عمل رصيد وهمى من الهتافات والتصفيق فى إطار من الكربلائيات بدون اى توجه إيجابى واحد !
فى الفيديو ده ، هــ نلاقى حديث وتقرير عن أكبر مشروع طاقة شمسية فى العالم يتم تنفيذه فى مصر على أرض بنبان فى أسوان .. و على فكرة .. فى الصحرا برضوا .. علشان بس جماعة (هو بــ يبنى فى الصحرا لييييه) يلاقوا نفسهم 🙂
اللى بيتكلموا فى الفيديو دول مسئولين فى حاجة إسمها International Finance Corporation
المشروع بحجم تمويل 2 مليار دولار لشركات خاصة قامت الحكومة بتوفير الإمكانيات والتراخيص والأرض وكل التسهيلات … المشروع هينتج 2000 ميجا وات … و هــ تقوم الدولة بربطه بالشبكة القومية للكهرباء … و هم اللى بيقولوا فى الفيديو ، إنه لولا التوجه الحالى للدولة المصرية فى التطوير والبناء ، ماكانش المشروع ده ممكن يتم …
المشروع ده يعتبر أضخم مشروع توليد الكهرباء من الطاقة الشمسية فى العالم ويمكن مشاهدته من الفضاء الخارجي حول الأرض بوضوح … وحجم العمالة اليومية فى المشروع حوالى 9000 فرد .. و من المتوقع أن يتم الإنتهاء من المشروع فى 2019.
مصر بتبنى دولة بجد .. دولة حديثة على اعلى مستوى علشان تقدر تواجه به التحديات المستقبلية سواء كانت داخلية أو خارجية … وأى حد من بتوع التأوهات ييجى يقول ” وأنا بقى إستفدت إييه ، وإييه العائد على المواطن الغلبان من كل ده” … ده بقى تبوسه من بقه وتحطه على جنب … لأنه بعد شوية هــ يتحول لكائن من الحفريات .. و هــ تيجى كمان كام سنة ، لما تكون مصر بقت حاجة تانية خالص ,, وناس كتير عدت و أوضاعها إتغيرت .. هــ تلاقى نفس الكائن ده لسة قاعد بحطّة إيدك فى نفس المكان ، مشغّل نفس اللطّامة … “وأنا بقى إستفادت إييه”