16 Jul 2019
مصر جاية .. !!
—————-
البوست ده كان مفروض يتنشر من كام يوم .. لكن إنشغال الناس بمباريات بطولة الأمم الفريقية خلّانا نأخره شوية 🙂
بوست النهاردة مش مقال تحليلى طويل … ولا كلام بنحاول نثبت فيه وندافع ونعيد ونزيد … لأ خالص … مقال النهاردة إقرار واقع … حقيقة لا جدال فيها …. و واقع فرض نفسه على الجميع .. العدو قبل الصديق … و أى حد عايز يقول عكس كدة .. أو يحاول يقلب الحقائق ويشوف الموضوع من منظور سلبى ونظارة سوداء .. هــ نقول له .. طبعا طبعا … أيوة معاك حق … خليك إنت قاعد مستنى مصر تفلس 🙂
كلامنا النهاردة عن إنفوجراف نشره المركز الإعلامي لمجلس الوزراء، سلّط من خلاله الضوء على احتلال مصر مرتبة متقدمة جداً ضمن قائمة الدول الأعلى من حيث معدل النمو الإقتصادى بقائمة مجلة “الإيكونومست” الدورية للنمو الاقتصادي حول العالم بالنسبة للربع الأول من عام 2019 .. وجاء ترتيب مصر على مستوى العالم بعد الصين والهند اللى إحتلوا المركزين الأول والثانى بنسبة (6.4%) و (5.8%) على الترتيب .. تليهم مصر فى المركز الثالث بــ (5.6%) معدل نمو إقتصادى.
فى الحقيقة الكلام ده ماجاش من فراغ … لكن كان نتاج جهد وعمل وتعب وشقى .. ومرار طافح عانينا منه على مدار الــ 8 سنين اللى فاتوا علشان نقدر نتجاوز مرحلة الخراب اللى كنا فيها .. و نقدر نوصل للمستوى الإقتصادى اللى إحنا فيه دلوقتى !!
طبعا إحنا كتبنا مقالات كتيرة فى الشق الإقتصادى وشرحنا بديهيات ، و أبجديات و أسس إقتصادية فى علوم كيفية تقييم إقتصاد دولة والحكم عليه بإنه ماشى صح أو لأ … وعلشان كدة .. مش هــ نلتفت بقى للطبلة والزمارة بتاعة خبراء المراهقة السياسية والإقتصادية .. واللى بــ يستمتعوا بترديد كلام المغرضين … و منتهى فهمهم لتقييم إقتصاد دولة هو سعر كيلوا البطاطس وبرطمان الطماطم … وتلاقيه داخل يقولك سعر الجنيه كام … طب الديون الخارجية وصلت كام .. طب بص الأسعار عاملة إزاى !! … والإكتيساد مونهارون تمامان يا حسن 🙂🙂
وصول مصر لثالث أعلى معدل نمو إقتصادى على مستوى العالم .. فى ظل التراجع العام للإقتصاد العالمى .. و متخطيين دول كبرى زى أميريكا وروسيا وبريطانيا واليابان والمانيا .. مش معناها إن إقتصادنا أصبح أفضل منهم أو أقوى منهم .. لأ طبعا .. و أى حد يقول كدة يبقى مدلّس … لكن ده معناه إنه فى ظل كل التحديات اللى بتواجهها مصر .. نجحت المجموعة الإقتصادية اللى بتدير الملف الإقتصادى المصرى إنها تتفوق على مثيلاتها فى الدول الأخرى .. و تضع خريطة طريق .. و توجد حلول .. وتستثمر فى الفرص والفرص البديلة .. وتحقق نقلة نوعية فى النمو الإقتصادى المصرى … مش عن طريق أليات إقتصاد ريعى زى ما شرحنا قبل كدة .. لكن إقتصاد تنموى إنتاجى حقيقى .. فى كل المجالات … زراعة وصناعة وإنشاءات وتطوير تنموى وأمن غذائى وبنية تحتية .. مع إجراءات إصلاح إقتصادى كامل بترشيد الدعم وإعادة توجيهه لمستحقيه … وكل ده على إيديين المجموعة الإقتصادية اللى سخروا منها وقالوا إنهم ناس فاشلين .. و هــ يغرقوا مصر .. وإن طارق عامر محافظ البنك المركزى خريج اداب … وإن وزير المالية مش فاهم حاجة … ألخ الخ الخ
الجميل بقى … لما تلاقى من 3 أيام ، البنك الأسيوى للاستثمار في البنية التحتية عامل مؤتمر فى لوكسمبورج بيشارك فيه وزراء وممثلى قرابة الــ 100 دولة … و يتم إختيار وزير المالية المصرى لإلقاء الكلمة الافتتاحية تقديرا لدوره فى وضع خطط واليات تنمية الإقتصاد المصرى والبنية التحيتة …. تعرف على طول إن خبراء الفيسبوك دوول .. بسم الله ما شاء الله خبراء على ماتفرج …. و بجد خسارة إن الواحد يضيع وقته معاهم فى محاولة إقناعهم باللى هم مش عايزين يقتنعوا بيه لغرض فى نفوسهم !
و بنكرر ثانى … تحقيقك للمعدل ده من النمو الإقتصادى … مش معناه إنك متقدم إقتصاديا على الدول الكبرى .. لكن معناه إنك بتجرى .. وبسرعة … بدون إفراط أو تفريط … فى نفس الوقت اللى هم بــ يتحركوا فيه بسرعة اقل منك .. أو ثابتين … و ده يقودنا إلى إن فرص تقدمك فى ترتيب الإقتصاد العالمى بترتفع .. و ده معناه .. فى حالة المحافظة على معدل النمو الإقتصادى ده أو زيادته .. إن التقارير والخبراء اللى بيتكلموا عن إن مصر هتوصل لمستوى إقتصادى متقدم عالمياً بحلول عام 2030 ماكانش كلام فنكوش .. او ضرب من الخيال .. لكن بناء فهم وإستيعاب وارقام بتقول إن ده هــ يحصل بكل تأكيد .. طبعا إحنا هنا نقصد كلام الخبراء الحقيقيين .. مش خبراء مصر هتفلس وبتنهار إقتصادياً علشان سعر كيلو الليمون كان بــ 40 جنيه 😉😅
أى حد بقى من قبيلة “ماء ماء” .. هــ يدخل يناقشك ويقولك .. الكلام ده مش مضبوط .. و مؤشر النمو الإقتصادى مش مؤشر صحيح .. قول له تمام جدا .. بس لاحظ إن كلامك ده ينطبق على أيقونة كل حرّان .. و مأوى كل بردان .. دولة مهاتير محمد اللى مسلفة البنك الدولى هى كمان .. لأن التقرير بيقول إنها فى المركز السابع .. يعنى لو الكلام علينا مش مؤشر .. يبقى عليهم كمان مش مؤشر 😁😁 .. أما بقى بالنسبة لتركيا حبيبة الإخوان .. فــ حدث ولا حرج … ماتستاهلش أصلا نجيب سيرتها .. لأن فضيحة الإقتصاد التركى اصبحت عالمية .. و هتلاقوها فى ذيل القائمة فى تقرير الايكونومست فى صورة المقال !
مبروك لمصر … و نتمنى إننا نفضل مستمرين بنفس معدلات الأداء دى علشان نقدر نعوض اللى فاتنا .. لأن اللى فاتنا كتير فعلا … و لو كان فيه حد له الفضل بعد ربنا سبحانه وتعالى فى وصولنا للمستوى ده من الأداء .. فهو الشعب المصرى العظيم وتضامنه مع جيشه وحكومته .. و وعيه و تفهمه لحقيقة الوضع .. و لحتمية كل الإجراءات اللى تم إتخاذها .. والل ماكانش فيه بديل عنها
إرفع راسك .. وإعرف قيمتك وقيمة مصر .. وإفخر ببلدك .. علشان تقدر تفهم ، اللى بيحصل معاك ، و حواليك.