08 Nov 2019
روعة الإعجاز .. فى سرعة وحجم الإنجاز !!
—————————————–
(((هتشوفوا العجب))) …
المعنى ده أو الجملة دى قالها الرئيس السيسى فى لقاءاته الإعلامية الشهيرة اللى عملها مع الإعلام المصرى بعد إعلان قراره بالترشح لرئاسة الجمهورية فى عام 2014 … واللى منكم فاكر الأيام دى .. كانت أيام صعبة قد إييه .. وكانت مصر بتمر فيها بأسوأ حالاتها على كافة المستويات ….
الجملة دى إتقالت رداً على أسئلة ما وصفناه وقتها على صفحتنا دى بإعلام التوكتوك .. واللى كان بقيادة إبراهيم عيسى ولميس الحديدى وخالد صلاح ووائل الإبراشى … و ده كان نتيجة ركاكة الأسلوب وسماجة وسخافة الأسئلة المطروحة و اللى كان من عينة ما طرحته الإعلامية القديرة ملكة السخف الإعلامى .. الأخت خميس الحديدى لما سألت المرشح الرئاسى وقتها فى إطار من الإستظراف السمج وقالتله “إييه بقى أخبار صفقات السلاح يافندم هيئ هيئ هيئ !” .. وكأن الحديث عن صفقات السلاح ممكن يكون متاح للعوام فى برامج التوك شو .. و ده خلى الرئيس السيسى ينظر لها نظرة سخرية .. وكأنه كان عايز يقولها جملة الفنان محمد صبحى الشهيرة “إنت حمان يا حمان !!؟؟”
المهم إنه لما سألوه وقتها .. هل هو عنده برنامج ، و هــ يعمل إييه فى الأزمات المتراكمة ، و الملفات العاجلة اللى لازم يكون لها حل .. و هل هو عنده حلول للمشاكل دى ، وإييه أليات تنفيذها … فــ كان رد الرئيس بالجملة دى … (((هتشوفوا العجب))) .. وكان متحفظ جداً فى كلامه ومارضيش يفصح عن خططه أو برنامجه … وطبعا بعدها طلعت بقى الكوميكسات الشهيرة بتاعت مالوش فى الإدارة .. و ماعندوش برنامج .. و ابو 50% هــ يضيع البلد .. مع إن مافيش حد بيدخل كلية عسكرية بــ 50% 🙂 .. وحكم العسكر الى مش بيفهموا غير فى التسليح وبس .. ألخ ألخ ألخ
الرئيس السيسى بعد توليه الرئاسة قال فى سنة 2016 جملة تانية مهمة جداً
قال: “انا عارف مصر زى ما انا شايفكم قدامى دلوقتى .. وعارف علاج مشاكلها برضوا زى ما أنا شايفكم قدامى دلوقتى” … ده معناه إييه !!؟؟ .. معناه إن إدارة الدول مش بتمشى بالصدف … والتطور والتقدم محتاج تخطيط و رؤية مستقبلية .. والأهم محتاج إرادة سياسية ، ومجتمعية لتحقيق التقدم والإنجاز المطلوب .. مع الأخذ بعين الإعتبار ، الظروف المحيطة ، والمعوقات والتهديدات اللى بتأثر على مستويات الأداء
دولة رئيس الوزراء الدكتور مصطفى مدبولى أثناء إفتتاح الرئيس السيسى لمجموعة من المشرروعات القومية من كام يوم ، وقف وقال إنه فى 2009 لما كان هو رئيس جهاز التخطيط العمراني فى مصر .. و كان معاه وزير الاسكان الحالي عاصم الجزار ومعاهم فريق عمل من العلماء في التخطيط .. كانوا شغالين على وضع مخطط ورؤية تمتد لحد سنة 2052 .. و سموها:
((الإستراتيجية القومية لتنمية مصر 2052))
وتم الإنتهاء من المخطط ده بالكامل فى إبريل 2012 !! … بتقول سنة كام يافندم !!؟؟ .. أيوة 2012 … يعنى فى عز الأزمة اللى إحنا كنا فيها .. وإنهيار مؤسسى تام للدولة المصرية ، وتحديات إقتصادية وسياسية وعسكرية … وتهديد بالإختطاف التام للدولة على إيدين جماعة إرهابية … وناس عمالة تجعّر فى الشوارع ، بــ يساهموا فى عملية ترسيخ إسقاط الدولة سواء كان بسوء نية او حتى بحسن نية … ورغم كل ده .. كان فيه مجموعات عمل شغالة .. بتضع خطط وإستراتيجيات مستقبلية تمتد لـمدة 40 سنة، للنهوض بمصر من كبوتها. 🙂
دولة رئيس الوزراء قال إن المخطط ده كان بــ يتضمن مرحلتين … الأولى كانت لحد 2027 .. والثانية مع نهاية 2052 … و رغم إنهم ماكانوش متوقعين إنهم يشوفوا نتائج المخطط ده .. ويمكن مع الظروف فى مصر وقتها ، كان ممكن مايلحقوش حتى يشوفوا التنفيذ .. و مع ذلك كملوا .. وإجتهدوا .. و حط هو وكل العلماء المصريين الأكفاء المشاركين فى وضع المخطط والرؤية دى ، كل أحلامهم بالنسبة لمصر على مستوى تطوير الدولة بالكامل وبناء دولة عصرية حقيقية يفخر بيها أبنائنا واحفادنا .. و عملوا وثيقة توصيات لابراء ذمتهم امام الاجيال القادمة !
الفكرة بقى مش فى كدة .. لكن دولة رئيس الوزراء مصطفى مدبولى ، قال إنه ثانى يوم حلفه لليمين كوزير للإسكان فى الحكومة الجديدة وقتها .. إستدعاه الرئيس السيسى وطلب منه البدء في تنفيذ المخطط فوراً … والمفاجأة بالنسبة للدكتور مصطفى مدبولى كانت إن الرئيس السيسى كان على دراية بكل تفاصيل المخطط ده .. وفعلا بدا التنفيذ بالفعل ..
المفاجأة بقى اللى فجرها دولة رئيس الوزراء … إن كل احلامهم اللى وضعوها فى المخطط على مرحلتين ، فى ضوء إمكانيات مصر والظروف المحيطة بيها ، و مستوى أليات التفيذ المتعارف عليها حتى بالنسبة لمعدلات الأداء العالمية .. المفاجأة إننا دلوقتى تخطينا حجم الإنجاز اللى المفترض إنه كان ينتهى فى 2027 … يعنى إحنا فى 2019 تخطينا المخطط اللى المفروض إننا كنا نشوفه فى 2027 … و مش كدة وبس … لكن كمان شبكة الطرق اللى على مستوى مصر بالكامل اللى فى مراحلها الأخيرة النهاردة ، هى اللى كان المفروض يتم الإنتهاء منها بحسب المخطط فى سنة 2052 …
ولما نضع فى إعتبارنا إننا مش بنتحرك فى ظروف عادية .. لكننا بنبنى دولة بكل ما يتكلفه ذلك من مليارات الدولارات للبناء والتعمير .. فى ظل أزمة إقتصادية وصعوبة فى تدبيرالتمويل اللازم لكدة .. ومعارك سياسية تخوضها مصر خارجياً مع قوى دولية وإقليمية .. وحروب مخابراتية لفرض الإرادة الدولية ورؤية مصر لمصلحة أمنها القومى .. و مواجهة مع منتخب العالم للإرهاب ومن خلفه كل داعميه وصانعيه .. و حرب إستزاف عسكرى من كل الجهات الحدودية للدولة المصرية .. وتحديات فى ملفات الغاز والمياه والطاقة …. و ناهينا طبعا عن السوس الداخلى اللى بينخر فى عظم الدولة المصرية .. سواء من أصحاب المصالح أو المنتفعين من الفساد .. و حط عليهم الجوقة السياسية اللى بتكسر فى الدولة .. ومعاهم شوية المغيبين اللى بيزايدوا على الدولة فى كل تصرف بتعمله .. ومن خلفهم الإخوان بأذرعهم الداخلية والخارجية …. و رغم كل ده .. فــ إنت بتسبق الجدول الموضوع بكتير أوى … أو إن شئنا الدقة .. إنت بتسبق حلمك اللى إنت حلمت بيه …. و ده معناه إن مصر النهاردة مش بتعمل إنجاز .. لأ … .. لكن دى بتعمل إعجاز بكل المقاييس .. العالمية .. و على المستوى الداخلى أيضا
و ده يرجعنا لجملة الرئيس السيسى فى 2014 .. واللى ذكرناها فى بداية المقال:
(((هتشوفوا العجب))) …
تخيل بقى لو كان الرئيس من البداية طلع وقال للمصريين إنه هــ يحل مشكلة الكهرباء فى سنة .. وإننا هــ نصدر طاقة وكهرباء لأفريقيا واوروبا .. وإنه هــ يقضى على فايروس سى تماما و هــ يعالج أكثر من 10 ملايين مواطن من الفايروس و من الأمراض السارية مجاناً .. و هــ ينهى قوائم الإنتظار للعمليات الحرجة .. وهــ يبنى 250 مستشفى (لحد النهاردة) .. و مئات المدارس .. ويغير نظام التعليم ويبنى حاجة وعشرين جامعة .. ويخلص كام ألف كيلومتر طرق وكبارى .. ويبنى 14 مدينة جديدة .. و ينمى سيناء ويعمل فيها مجتمعات عمرانية .. ويعمل أنفاق لربط سيناء عبر قناة السويس .. ويقضى على العشوائيات الخطرة ، ويسكنهم فى مدن جديدة تليق بمعيشة المصريين .. وأقمار صناعية .. ومنصات ضخ وإسالة غاز .. ومحطات طاقة شمسية … ألخ ألخ ألخ .. مما يضيق المقام بذكره … ياترى لو كان قال لنا كدا كنا هــ نصدق … طب ياترى كنا هــ نقول عليه إييه .. مش من المعارضين .. لكن حتى من المؤيدين نفسهم .. ياترى كنا هــ نقول إييه !!؟؟ 🤔
اللى بيحصل فى مصر ده يامصريين .. بجد معجزة بكل المقاييس .. مش فى حجم ماتم إنجازه فقط .. ولكن فى الوقت اللى تم فيه هذا الإنجاز …
و لسة ….. و هــ نفضل مكملين .. والقادم أفضل بإذن الله
و حفظ الله مصر ..
روابط للمشاهدة:
——–
كلمة دولة رئيس الوزراء فى إفتتاح الرئيس السيسى لبعض المشروعات
السيسى: أنا عارف مصر زى ما أنا شايفكم قدامى دلوقتى
السيسى فى 2018: أصبروا وهتشوفوا العجب فى مصر