24 Jan 2021
و حتبقي قد الدنيا .. !!
———————-
بدأت صورة البازل تكتمل لوجه مصر الجديد اللى حتكون عليه عام 2030 …. و اللى لو حد إتكلم علي جزء صغير منه عام 2014 كنا كلنا إتهمناه بالجنون و ماكانش حد صدّقه….. و إمبارح بس عرفت ليه الرئيس السيسي في أول حديث تليفزيوني له قبل إنتخابات 2014 لما كان بيتسأل “إييه البرنامج الإنتخابي بتاعك ” … كان جوابه :-
“أنا معنديش برنامج إنتخابي بالمعني المعروف …. لأني حشتغل مع المصريين إني اغير وجه مصر تماما …. لأن مصر أم الدنيا و حخليها قد الدنيا …. و حبني مصر من أول وجديد بالمعني الحرفي للكلمة”
اللى بيحصل في مصر الكام سنة اللى فاتت شىء لا يصدقه عقل … و معدلات التنفيذ غير مسبوقة عالميا …. و كأن عصر بناة الأهرامات بيعيد نفسه من تاني …. فكمية البناء الجاري تنفيذه في مصر غير مسبوقة … لا في حجمها و لا تكلفتها و لا جودتها و لا حتي في إتساقها مع مخطط علمي طويل الأجل لخدمة 150 مليون نسمة و هو تعداد سكان مصر عام 2050 .
الصورة فعلا عاملة زي قطع البازل اللى بالفعل بدأت تتجمع مع بعض …. و عرفنا إن جهابزة الأولويات اللى كانوا مصدعينا بقالهم سنين بمقولات زي بيصرف مليارات في البناء ليه و ايه لازمة الإهتمام بالبحيرات و الطرق و غيرها من المشاريع …. هم ناس لا عارفة و لا فاهمة و لا ليهم فيها أصلا …… فمثلا …. بالأمس عرفنا إنه تم تطوير بحيرة المنزلة لإرجاعها مرة أخرى لأصلها كمخزن غذاء سمكي للمصريين و أيضا توفير آلاف فرص العمل الحلال للصيادين اللى هجروها بعد تلوثها و ردمها و كانوا بيتمسكوا في المياه الإقليمية للدول المجاورة ….. أو كانوا بيستخدموها كمأوي للخارجين على القانون أو للهجرة غير الشرعية ….
و عشان ده يحصل تم تكريكها في أكبر عملية تكريك على مستوي العالم ليزيد عمقها من 30سم الى 3 أمتار كاملة ليعود السمك مره أخرى لموطنة الأصلي …. و يتم و إزالة آلاف التعديات من حيتان الإستيلاء على الأراضي ….. و كذلك إنشاء المزارع السمكية الحديثة بآلاف الأحواض السمكية اللى حولت مصر من دولة تعاني من فقر الثروة السمكية …. الى المركز السادس عالميا في إنتاج الأسماك من المزارع السمكية و يصل الإكتفاء الذاتي من الأسماك الى 85%.
و عشان ده يحصل …. كان لازم القضاء على التلوث …. فتم إنشاء محطة بحر البقر اللى هي أكبر محطة تنقية لمياه الصرف الصحي بالعالم …. و اللى حتقوم بتحلية 2 مليار متر مكعب سنويا من مياه الصرف الصحي و الصرف الصناعي اللى كان بيترمي في البحيره و أدي الى نفوق الثروة السمكية بها …. عشان نعرف إن جزء من المياه المنقاه دي حتترمي في بحيرة المنزلة لغسيلها و تجديد المياه و تحسين جودتها لصالح الثروة السمكية ….. و الجزء الآخر المنقي من المياه سيتم نقلة عبر سحارة سرابيوم من تحت قناة السويس الى سيناء لتقوم برى 180 ألف فدن شرق بورسعيد …. و اللى كانت شغالة فيهم الهيئة الهندسية بالتعاون مع وزارة الزراعة و الري بتجهيزهم بنظم الرى الحديثة و البنية التحتية عشان يكونوا جاهزين كمان 5 شهور بالظبط ….. و ده كان في الوقت اللى إذ فجأةً إكتشفنا إن فيه ترسانة في بورسعيد بتقوم بإنشاء أسطول مصري حديث للصيد … و قاموا بالفعل في إنشاء 30 مركب و اللى حيكملوا الى 100 مركب صيد جديده….. في نفس الوقت اللى إكتشفنا اننا بنشتغل في مشروع الإكتفاء الذاتي من اللحوم بخطة علمية مدروسة … و أيضا الإكتفاء الذاتي من الألبان.
و في الوقت اللى عرفنا فيه إن الهيئة الهندسية بتقوم ببناء نصف مليون وحدة سكنية داخل سيناء في أحياء حديثة مخططة من الجيل الرابع كاملة الخدمات … و أنجزت بالفعل ما يكفي لتوطين مليون مواطن مصري في 30 يونيو القادم …. و ده في نفس الوقت اللى بتنجز فيه تجهيز نصف مليون فدان في شمال سيناء بخلاف المدن السكنية بكافة البنية التحتية لسكن ملايين المصريين سواء أهالي سيناء أو من أهل الوادي …. في مجتمعات عمرانية حديثة مخططة بأسلوب علمي …. فبها السكن و الطرق و المصانع و المزارع و الخدمات الصحية و المواني و المدارس و دور العباده و الإستادات الرياضية و مراكز الشباب و الفنادق السياحية….. بخلاف المجتمعات البدوية الحديثة اللى تم بناؤها و تسليمها لأهالينا في سيناء …. و القضاء على العشوائيات في مدن كتيره داخل سيناء….. و اللى كان قبلة حفر قناة السويس الجديدة.
و كل ده بعد ما إتعمل أنفاق الربط ما بين الوادي و سيناء …. و ده بعد ما إتعمل و على وشك الإفتتاح أكبر ميناء في البحر المتوسط في شمال سيناء “شرق شرق بورسعيد” …. و اللى واكبه شق طرق طولية و عرضية بطول سيناء و عرضها …. و كل ده كان بعد إنشاء أول مطار عسكري في قلب سيناء و دخول 46 كتيبة بكامل تسليحهم على خط الحدود.
إحنا مش حنتكلم كتير على المشاريع اللى تم إفتتاحها بالأمس و العائد الإقتصادي الهائل لأن كل مشروع محتاج مقالات كتير ….. و بالذات مشروع تطوير القري المصرية “50 مليون مواطن” …… بس إحنا حنركز من زاوية واحدة بس …..
فاكر حضرتك لما ناس كانت بتستغرب و تقولك …. محطة بحر بقر إييه دي اللى حتتكلف مليار و نص دولار … و سحارة إييه و أنفاق إييه !!!!! …. إييه لازمة الصرف على مشاريع ملهاش لزوم !!!!! …. رخصلنا فواتير الغاز و الكهربا و إدوني فلوس في إيدي عشان أشتري شقه و أتجوز و أخلف و آكل شندوشتات حلاوة بالقشطة …… أو اللى يقولك …. سمك إييه و جمبري إييه و طماطم و خيار إييه !!!!!
طبعا بغض النظر إن لولا خط الجمبرى و السمك و صوب الطماطم و الخيار …. كنا شوفنا المواطن النطع ده أول واحد ماسك في خناق جاره و هم بيضربوا بعض على رغيف العيش في أزمة كرونا زي ما شوفنا في دول كتير جنبنا و ماكانش لقي حتي الطمطماية اللى بيتريق عليها …… لكن أهو بسبب ثقافة المواطن النطع ده …. رئيس الهيئة الهندسية كان بيشتكي و يقول “أكبر مشاكلنا النهاردة إننا مش لاقيين عمالة تشتغل في المشاريع بتاعتنا ….. أنا مش بقول عمالة مدربة … لكن أنا باكلم إننا حتي مش لاقيين العمالة العادية اللى ممكن ندربها و نطورها”
عامة المقالات الجاية حنتكلم مع بعض في المشاريع بالتفصيل …. المشاريع اللى فعلا حتخلّى مصر …. قد الدنيا.
تحيا مصر.