26 Mar 2021
قناة مصر .. !!
————–
اللى حصل إمبارح فى قناة السويس بجنوح الناقلة اليابانية أثبت بما لا يدع مجالا للشك:
⛔ إن مشروع قناة السويس الجديدة ماكانش مجرد مشروع فنكوش زى ما كانوا بيقولوا .. أو زى ما إقتطعوا من كلام الرئيس السيسى بإنه مشروع كان كل غرضه رفع الروح المعنوية وبس .. لكنه كان مشروع ضرورى وحيويى للحفاظ على قناة السويس كممر ملاحى إستراتيجى قادر على إستيعاب التنامى فى حركة التجارة العالمية .. وفى مواجهة التحديات اللى ممكن تهدد قدرات القناة فى المستقبل
⛔ إن قناة السويس الجديدة مش مجرد تفريعة .. وإنها أوسع من طشت أم الإرهابى وجدى غنيم زى ما كان بيقول .. وإنها مع عمليات توسيع المجرى الملاحى اللى جرى للقناة ماكانتش مجرد مشروع للرفاهية
⛔ إن قناة السويس شريان حياة بالفعل يمر فى أرض مصر .. وإن قناة السويس الجديدة مش عملت سيولة فى حركة القناة فقط .. لكنها وفرت على الدول والشركات مئات الألاف من الدولارات اللى كانوا بيخسروها فى أثناء ساعات التوقف فى إنتظار دورهم للمرور بقافلتى الشمال والجنوب اللى كان بيوصل لحد 22 ساعة إنتظار .. وأدينا شوفنا تعطل الملاح والإنتظار للأيام ممكن يكلف العالم قد إييه
⛔ إن قناة السويس ممر إستراتيجى … وإن تعطل جزئى فى حركة الملاحة فيها حتى ولو كان لعدة ساعات ..، خلّى أسعار البترول ترتفع فى البورصات العالمية نتيجة الخوف من تعثر المرور فى القناة لفترة طويلة
⛔ إن إرهاصات مابعد 25 يناير . ومابعد 30 يونيو .. مما كان يثار حول سعى القوى الدولية للتدخل للسيطرة على القناة بدعوى حماية حركة التجارة الدولية ماكانش من قبيل التخريف .. وإنه لولا فضل الله أولا وقوة الجيش المصرى ثانيا .. ولولا تحذيرات المشير طنطاوى فى 2011 .. وبعدها المشير السيسى فى 2013 من التدخل .. و إن الرد هــ يكون عنيف .. كان حدث مالا يحمد عقباه
⛔ إن محاولات إستهداف قناة السويس بالتخريب أو بضرب السفن العابرة واللى أحبطته الأجهزة الأمنية فى 2014 و 2015 و 2016 ماكانش نابع من دوافع فردية لشوية غلمان موتورين بشباشب وجلاليب .. لكنه كان إستهداف ممنهج مدفوع من اطراف خارجية وقوى دولية .. زى ما حصل بالضبط أيام تأميم القناة فى سنة 1956 .. و ده بــ يأكد إن قرار جمال عبد الناصر ومخاطرته بتأميم القناة كان هو الصح .. وإن كل الناس اللى كانت ومازالت بتقول إن إتفاقية حق الإنتفاع بالقناة لمدة 99 سنة كانت هــ تنتهى سنة 68 وبعدها القناة كانت هــ ترجع لمصر بدون حرب ولا مشاكل .. دوول ناس طيبين أوى أوى يا خاااال … ياحبيبى ماحدش يبقى فى إيديه كنز إستراتيجى زى ده ويفرط فيه .. لا بإتفاقية ولا بصوانى مهلبية
⛔ إن إقدام الدولة على تطوير الممر الملاحى وتحويله إلى مشروع لوجيستى متكامل بما يتم من مشروعات ملحقة بيه ومناطق صناعية وخطوط نقل برية وتعميق الممر وتوسعته لإستيعاب أكبر قدر ممكن من السفن والناقلات .. كل ده يدل على حكمة ودراية ومدى إدراك الأدارة المصرية الحالية للكنز الإستراتيجى اللى بين إيدينا سواء على المدى القريب أو البعيد … يعنى مصر مابتعملش فناكيش !
⛔ إن قناة السويس مش ممكن يكون لها بديل أو منافس سواء النهاردة .. أو حتى بعدين .. ألا لو قدروا يوجدوا شيئ يقدر يستوعب نقل مليار وربع طن من البضائع سنويا .. أو إن العلم يقدر يكتشف مضادات جاذبية تتحط فى الطائرات وتخليها تقدر تشيل وتنقل فى المتوسط حوالى 60 ألف طن فى المرة الواحدة زى الناقلات اللى بتمر فى قناة السويس
⛔ إنه بمتابعة المواقع الإخبارية والصحف والميديا العالمية فى حادث زى ده … و من طريقة صياغة العناوين واسلوب تغطية الحدث .. تقدر تستشف وتفهم حجم الإستهداف اللى بتتعرض له الدولة المصرية .. والرغبة فى هدمها .. أو حتى تعطيل تقدمها ونموها .. سواء كان بسبب إنه فيه أطراف كتيرة يهمها إن مصر تفضل ضعيفة و منكفئة على نفسها وغرقانة فى مشاكلها .. أو حسدا لإمتلاك مصر لممر حيوى وشريان حياة للتجارة العالمية . وإنها تكون هى اللى مسيطرة عليه مش حد تانى أو دولة تانية … وياريت تفتكروا فكرة إنشاء إقليم قناة السويس فى زمن أول جاسوس مدنى منتخب .. لما كان هــ يبقى إقليم منفصل عن الدولة وتابع بشكل مباشر للرئيس الجاسوس طرشى … وكان بدأ التحضير من عناصر الجماعة بالترويج إننا لييه مانعطيش إدارة الإقليم ده لحد يقدر يصرف عليه ويطوره .. يعنى بين قوسين الأخت الشجيجة جطر … واللى وقف فيها الجيش برضوا … أومّال هم بيكرهوا الجيش المصرى لييه !!
🚫 🚫 لكن أهم شيئ اثبته الحادث ده .. إن السوشيال ميديا و الفيسبؤس دوول هم “منبر من لا زريبة له” … وإننا فعلا نمتلك كم من الخبراء الإستراتيجيين اللى بيجرى فى دمائهم كم غير محدود من أنزيمات الهريولوجى والفتيولوجى .. بعد حجم الإفتاءات والنصائح اللى كانت بــ تشرّ منهم عن كيفية معالجة الأزمة .. و إزاى خبراء القناة كان ممكن يعوموا الباخرة ويحركوها بدون أى مشكلة … والحمد لله إن أبطال هيئة القناة وفريق عملها من الخبراء والمهندسين ماتابعوش الهراء ده .. وإلا كان الواحد فيه إنتحر .. أو قدم ستقالته وراح يبيع فجل من القهرة اللى كانت هــ تصيبهم من كلام السادة الخبراء دوول
✅ مصر مش صدفة يا سادة .. وعمرها ما كانت صدفة .. ولا هــ تكون …
مصر الدولة اللى من قبل ماتقوم فى العالم دولة ..
مصر أرض الرباط .. وأهلها هم جند الرباط .. هم المرابطون إلى يوم الدين
مصر اللى هتفضل واقفة وصامدة .. مهما كانت العقبات والتحديات .. و مهما كان حجم التضحيات .. ومهما حاول أى خسيس إنه يعطلها أو يفرملها …
حفظ الله مصر وجيش وشعب مصر