الأيام دول .. والحقيقة لازم تبان !!

16 Dec 2021

الأيام دول .. والحقيقة لازم تبان !!

———————————

من كام سنة لما كنا ومازلنا نيجى نتكلم عن الإقتصاد المصرى ، ونحاول نفهم الناس مدى عظمة الإجراءات اللى بتاخدها الدولة المصرية برغم صعوبتها .. وحجم تأثيرها الايجابى على مكونات الإقتصاد الكلى للدولة وعلى الناس .. وإنه من غير الاجراءات دى كنا هندخل فى كارثة محققة … كنت تلاقى ناس عميقة كدة مالهاش أى 30 لازمة فى الحياة غير انها عايشة كمخلوقات بيضوحباطية مش أكثر .. داخلين كدة يتدحرجوا على الصفحة .. ويقولولك بمنتهى السخرية … ياعم احنا دولة فاشلة … روح شوف تركيا عاملة إييه … 😎

ولما كنا نتكلم عن الإقتصاد التركى .. ونقول إنه ماشى فى سكة الهاوية .. وإن عناصر ومحددات الإقتصاد من نسب بطالة وتضخم وعجز موازنة وفروق الميزان التجارى كلها ماشية فى سكة اللى يروح مايرجعش … كنت تلاقى نفس هذا المخلوق البيضوحباطى داخل يتسرسب كدة فى الصفحة ويقولك “وإحنا مالنا بتركيا ماتخلينا فى نفسنا !؟” …

ولما كنا نقول إن سعر الليرة التركية فى النازل والدولار بقى بأربعة ليرة .. لأ خمسة .. لأ سبعة .. لأ تسعة .. طب بقى بعشرة … كنت تلاقى نفس هاذوها المخلوق برضوا داخل يهز فى اللية بتاعته ، ويقولك بأسلوب ينم عن إن علاقته بالاقتصاد زى علاقته كدة باللغة الصينية .. “ياعم خلينا احنا بس فى خيبيتنا … هو الدولار دلوقتى بكام جنيه !؟” …

طب ياسيدى .. أهو النهاردة الليرة بتساوي جنيه … بعد ماكانت من كام سنة بتساوي 6 جنيه … ومؤشرات الإقتصاد التركى اصبحت كلها سلبية و لسة مكملة …. فى الوقت اللى مؤشرات الإقتصاد المصرى كلها إيجابية .. ولسة مكملة برضوا …

وضع الليرة التركية النهاردة فى نفس مستوى البؤس اللى فيه ذاك المواطن البيضوحباطى اللى كان مصدق من كام سنة إن الإقتصاد المصرى بينهار وإن الدولار هيبقى ب 150  جنيه … وإن مؤشر قيمة العملة أمام الدولار هو مؤشر للاقتصاد الكلى ..

طب ياسيدى … أهو الجنيه المصرى بعد انهيار الاحتياطي النقدى والتعويم وثورتين وحرب على الإرهاب وتهديدات حدودية بالجملة .. بيساوي النهاردة الليرة التركية من غير تعويم ولا ثورات ولا أى بتنجان .. لأ وكمان فعليا .. الجنيه النهاردة بحساب القوة الشرائية أصبح أقوى من الليرة .. لأن زى ما قولنا قبل كدة .. وزى ما الناس اللى عندها الحد الأدنى من المعرفة الاقتصادية فاهمين إن القياس والمقابلة عمرها ماكانت مقابلة عددية .. والكلام ده شرحناه كتير فى مقالات سابقة …

بالنسبة لصديقنا اياه هو وكل القطيع بتاعه … ياترى تفتكر بقى بالوضع الحالى ، مين الدولة اللى اقتصادها منهار !!؟ … أو بمعنى أصح “بينهار” !!؟ … و ده دورنا علشان نسألك بنفس اسلوبك .. وعلى طريقة سرحان عبد البصير فى مسرحية شاهد ماشفش حاجة لما قال له “و دى هتكتبها إزاى دى ياحسين !؟” 😁

و مش كدة وبس …. لكن كمان …..

وإلا أقولك … مالنا احنا ومال خيبة طوركيا ..

انا رأيي نخلينا فى نفسنا أحسن … ومالناش دعوة بالدول الفاشلة دى  😅😅

حفظ الله مصر برئيسها وجيشها وشعبها 🙏

لمتابعة تعليقاتكم