29 Dec 2021
التفاصيل !!
————-
إحنا فعلا ماشوفناش كدة فى حياتنا أبداً .. ولا كان حتى ممكن نتخيل ده …
ماكانش ممكن نتصور إننا نشوف رئيس مصر بيتكلم فى أدق أدق التفاصيل كدة .. !! .. ده مش رئيس بس عايز يبنى ويعمل اللى عليه وخلاص .. لأ .. ده رئيس عايز يوصل فى كل حاجة لدرجة الكمال !!
رئيس مصر ياجماعة بيتكلم عن تنظيف تراب على سقف المنشأة .. بيتكلم عن ورقة واقعة على الأرض .. بيتكلم عن بقعة زيت أو مية عايزة تتنظف .. بيتكلم عن انه ماينفعش نشوف لوح زجاج مكسور والا ستارة مقطعة والا لمبة محروقة والا بلاطة مكسورة …. ايييييييه ده ياريس … إنت عايز تروح بينا على فين !؟ .. وعايز تعلم الناس اييه !؟
والطريف انه لما سأل طب نعمل كدة ازاى .. والوزير كامل الوزير حاول يرد ويقول له عندنا شركة نظافة تعمل كدة .. فالرئيس قال له “انا مالى بالشغلانة دى.. أنا ماليش دعوة .. إحنا عايزين نشوف شغلنا” .. يعنى عايز يقول له ويقول لكل موظف وعامل ومسؤول حاجة مهمة جدا ..
عايز يقول ان كل واحد لازم يقوم بدوره .. ويشوف شغله .. مش لازم حد يفكره بيه … أنا ماليش دعوة بالكلام ده .. اومال انتوا بتعملوا اييه … انا بأوفر لكم الدعم والتمويل .. وباجيبلكم الفلوس .. وبأساعدكم فى التطوير والتجديد .. ومركز فى التحديات الداخلية والخارجية .. طب شوفوا انتوا شغلكم بقى واعملوا اللى عليكم (حكومة ومواطنين) المسئولية مشتركة !!
ومش كدة وبس … لكن اللى من حضراتكم بيشتغل فى القطاع الخاص هيبقى عارف انه فيه حاجة الصبح اسمها الاجتماع الصباحى أو ال ( Morning Briefing ) .. والشركات اللى فيها أكثر من وردية بيبقى فيها (Briefing) قبل كل وردية … والرئيس هنا فى الفيديو بيطلب منهم يعملوا ده .. يعنى بيعلم الجميع يعنى اييه الموظف يبقى عنده (Task list) يومى علشان نقدر نحافظ على حاجتنا … ونتلافى كل السلبيات .. و إن ده يبقى اسلوب حياة مستدام .. مش مرتبط بمرور المدير او بزيارة الوزير أو بجولة الرئيس !!
الرئيس قال بما معناه إننا مش عايزين ناس تتكلم .. احنا عايزين ناس تشتغل …
تانى بنكررها .. عمرنا ماشوفنا رئيس مصرى أو غير مصرى بيتكلم فى كل حاجة كدة .. وحقيقى إحنا مش عارفين هو مخه بيستوعب كل الكلام ده ازاى !؟ …
لو فيه ناس ممكن تعتبر إن كلامنا ده تطبيل .. فاحنا هنريحهم ونقوللهم .. أيوة .. إحنا مطبلاتية .. ولو رئيسنا بيفكر كدة وبيتكلم كدة وبيعمل كدة .. يبقى كل الفخر والشرف لينا إننا نطبل له … وندعيله ان ربنا يحفظه لحد مانشوف مصر اللى فى خياله هو .. لأننا بالشكل ده ملعتقدش إننا قادرين نتخيل مصر اللى هو عايز يوصل لها دى شكلها اييه فى تصوره ..
وعقبال مانشوف مصر فعلا قد الدنيا برئيسها وجيشها وشعبها 🙏