12 Oct 2018
فى دقيقة واحدة …
تصريح خطير جداً .. ومباشر جداً للرئيس السيسى !!
—————————————————-
“المعركة مانتهتش .. المعركة مازالت موجودة بمفردات مختلفة .. كان الأول العدو واضح والخصم واضح .. دلوقتى لأ .. دلوقتى بقى مش واضح .. بقى معانا وجوانا .. وإستطاعوا بالفكر إنهم ينشئوا عدو جوانا .. يعيش بقتلنا .. و يتبنى بهدمنا … وجزء كبير من التحدى اللى بنواجهه ، هو بناء وعينا .. اللى أنا باعتبره هو العدو الحقيقى .. الوعى المنقوص أو الوعى المزيف .. اللى كتير بيحتاج مننا ، مش بس على مستوى النخب والمثقفين والإعلاميين … ولكن حتى على مستوى ناس أكبر من كدة .. لأنهم إذا كانوا مهتمين بحفظ البلد دى وحمايتها .. إنهم لازم يدركوا الصورة الكلية للواقع اللى إحنا فيه”
واللى تابع كلمة الرئيس السيسى فى الندوة التقيفية ، هيلاقى إن الكلام ده إتقال بعد حديث الرئيس عن حرب أكتوبر وعن إجبار إسرائيل بالقوة على المضى فى عملية السلام .. وإن الخسائر كانت كبيرة ، لأن الحرب كانت حرب حقيقية ، ولولا كدة لم تكن إسرائيل لتقبل بالسلام .. ثم كلامه المباشر عن قدرة الجيش المصرى على تكرار ده مرة تانية وثالثة … طب يعنى الرئيس عايز يقول إييه !!؟؟ .. عايز يقولك خلى بالك .. عدوك واحد .. واللى كان بيحاربك قبل كدة ، هو اللى بيحاربك دلوقتى .. بس بشكل مختلف ، وبوجوه أخرى .. وبيستخدمك إنت فى الحرب دى .. لأنه ماعندوش إستعداد إنه يواجه خسائر زى اللى واجهها قبل كدة .. وبالتالى هو بيستخدمك إنت علشان تدمر نفسك !
الكلام اللى فى الفيديو ده إحنا بنعتبره من أهم وأخطر ما قاله الرئيس السيسى فى خلال سنوات حكمه كله .. وبيتوافق مع كل اللى صفحتنا بتقوله بقالها سنين طويلة .. أيوة .. زمان كان العدو واضح وصريح … لكن للأسف العدو أصبح جوّانا .. مننا … بــ يعيش عيشتنا .. و بــ يتكلم لغتنا …
الكلام ده خطورته أنه بــ يتوافق مع كلام كنا نشرناه قبل كدة فى جملة كانت على لسان الجنرال الاسرائيلي “عاموس يدلين” الرئيس السابق لجهاز الاستخبارات العسكرية الإسرائيلية أمان بعد انتهاء خدمته بالجهاز و أثناء حفل توديعه في 2010 … و هو بــ يستعرض انجازات الجهاز التي شارك في تنفيذها اثناء خدمته .. فقال:
“إذا كان المصريون قد حطموا لنا خط بارليف في 1973 … فإننا قد نجحنا في بناء خط بارليف آخر لهم أشد صلابة و ضراوة داخل القاهرة نفسها ….. لقد نجحنا في اختراقهم في قطاعات عديدة …. و بعد رحيل مبارك ….. سيدورون في حلقات مفرغة… و لن يتمكن المصريون من عبوره او حتي فك طلاسمه … و حتي و ان تدخل الجيش المصري بكل قوته ….. سيتنهي بهم الحال في الفوضي المدمرة”
نعم للأسف لقد نجحت إسرائيل ومن خلفها إنجلترا ، في بناء خط بارليف ليس داخل القاهرة فحسب ولكن داخل جميع العواصم العربية .. وإستخدمت الخط ده فى تدمير البلاد اللى وقعت .. ومازالت بتحاول فى البلاد اللى لسة واقفة على رجليها ..
الكلام ده كان هــ يحصل فى مصر .. لولا وعى المصريين ، وثبات الجيش المصرى .. لكن لسة خط بارليف ده موجود .. و هدمه مش هــ يكون غير من خلالنا .. من خلال وعينا .. زى ما قال الرئيس السيسى … لأن سلاح الوعى هو السلاح اللى ممكن يبدد ظلام الفكر المغلوط .. ويهد مليون خط باريف .. مش خط واحد فقط
سلاح الوعى يا مصريين هو الحل ..
مواجهة الفكر المغلوط ، والناس المضحوك عليهم والمغيبين اللى شايفين إنهم كدة بيعملوا الصح ، و همّ مجرد أدوات للعدو الرئيسى لنا .. ده مسئوليتنا كلنا .. شعب وجيش وحكومة
وستظل مصر فى رباط إلى يوم القيامة .. كما قال أشرف الخلق صلى الله عليه وسلم