04 Nov 2018
تعليقاً على منتدى شباب العالم
——————————
الشوشيال ميديا وكثير من المواقع الإخبارية مالهاش سيرة غير منتدى شباب العالم فى شرم الشيخ … وكلمات الرئيس السيسى اللى تخللت الفعاليات بــ يتم تداولها بكثافة .. وخصوصا إن بعض كلماته بتضرب فى قلب مخططات الشر ، وهو بيخاطب مش شباب مصر فقط ولكن شباب المنطقة وشباب أفريقيا وشباب العالم كله .. ومنها على سبيل المثال تعليقه فى فعاليات جلسة (ما بعد الحروب والنزاعات.. آليات بناء المجتمعات والدول) .. وكمان كلامه عن أسباب عدم الاستقرار الداخلي في بعض الدول واللى أهمها البطالة .. وحديثه المباشر والواضح والصريح عن إن بعض الدول بتشارك فى تأجيج الصراعات فى دول أخرى وبتساهم فى تجهيل المجتمع و بــ تعمل على إشعال الدول من الداخل وزيادة معدلات البطالة .. لأن كل ده بيخدم التوجهات السياسية والإقتصادية للدول دى !!!
إحنا النهاردة مش هــ نتكلم كتير علشان ما نقطعش على حضراتكم متابعة جلسات منتدى شباب العالم .. وتستمتعوا بالأجواء المبهرة لفاعليات المؤتمر … لكن علشان تعرفوا أهمية المؤتمر ده ، وتعرفوا المردود الإيجابى للمنتدى ده وتأثيره الدولى سواء فى أوساط الشباب المهتم بالحدث ، أو حتى فى الأوساط السياسية والأمنية .. هــ نقول لكم معلومة .. يمكن مش هــ تلاقوها فى أى حتة تانية غير عندنا .. لأنها معلومة من قلب الحدث ..
السنة اللى فاتت لما مصر أعلنت عن تنظيم منتدى شباب العالم فى سنة 2017 تحت رعاية السيد الرئيس وبتواصل شباب المشروع الرئاسى ووزارة الهجرة بقيادة الوزيرة النشيطة الدكتورة نبيلة مكرم .. تقدم للمشاركة فى المنتدى حوالى 3500 شخص شاملين شباب المشروع الرئاسى لإعداد القادة ، وكثير من شباب العالم سواء من خلال الوفود الرسمية للدول أو المشاركين بصفة شخصية … لكن السنة دى فى 2018 بمجرد إعلان مصر عن تنظيم المؤتمر .. إنهالت الطلبات للمشاركة فى المؤتمر بدون ما مصر تطلب .. ووصل عدد طلبات المشاركة المقدمة حوالى 160 ألف طلب من 163 دولة و جنسية شاملة الوفود الرسمية ، علشان فى الأخر مصر تختار منهم 5000 مشارك فقط … !! .. لدرجة إن الموقع الرسمى للمؤتمر نشر رسالة إعتذار عن عدم قبول مزيد من الطلبات نظرا لتجاوز حجم طلبات المشاركة الحد الأقصى للمشاركة .. و ده كان معناه نجاح مبهر للمنتدى فى نسخته الأولى فى 2017 وتأثيرة الكبير اللى أدى للوصول إلى كل هذا الحجم من التفاعل والإقبال على المشاركة فى النسخة الثانية فى 2018 😊
الكلام ده لدارسين الـ “Marketing” .. معناه نجاح كبير للدولة المصرية فى فرض شخصيتها على العالم كله .. ووضع وإرساء أليات جديدة فى كيفية التواصل ، ليس مع الجهات الرسمية للدول فقط ، ولكن مع شعوب هذه الدول .. ومش كدة وبس .. لكن الأهم والأخطر .. إن المنتدى بيقدم نماذج مشرفة سواء من المصريين أو من الدول الأخرى .. النماذج دى هى اللى هــ تبقى قيادات مؤسسية فى المستقبل فى السنين القليلة القادمة ونماذج جادة ومتفوقة ، بــ تصنع الفارق سواء فى مصر أو فى الدول الأخرى .. و ده فى حد ذاته بيضرب فى قلب المؤامرة .. و بــ يهد أساسات محاولات هدم دول المنطقة وعلى رأسها مصر لتحقيق أطماع الدول التى تقوم على هذه المؤامرة ، سواء كانت هذه الأطماع إقتصادية ، أو سايسية ، أو دينية
منتدى شباب العالم بيقدم مصر بشكل جديد ، فى ثوب جديد .. وبيبعث رسالة للعالم كله من قلب سيناء ، إن مصر دولة قوية وقادرة وأمنة ومستقرة .. وده هيكون له مردود كبير جدا سواء على المستوى السياسى والإجتماعى لمصر .. أو حتى على مستوى التدفقات السياحية ، وإنتعاش القطاع السياحى اللى بيمثل مصدر دخل لما يقارب 35% من تعداد الشعب المصرى سواء بشكل مباشر أو غير مباشر … وعلشان كدة بنشوف الحملات المسعورة لتشويه المنتدى والتشكيك فى الجدوى منه .. لأنهم عارفين كويس جداً المردود الإيجابى للنوعية دى من المؤتمرات على مصر بشكل خاص وعلى دول المنطقة والعالم بشكل عام وعلاقاتهم بمصر ..
ولسة كمان مؤتمر البيئة الدولى اللى قدرت مصر تحصل على حق تنظيمه فى دورته الحالية ، بدلا من سويسرا .. وذلك فى النصف الثانى من شهر نوفمبر .. ويليه فى أول أسبوع من ديسمبر القادم مؤتمر الكوميسّا الأفريقى الإقتصادى 😊
مصر بتسابق الزمن .. وبتتحرك للأمام بسرعة الصاروخ .. علشان تبقى بجد قد الدنيا 😊
لمتابعة تعليقاتكم