07 Nov 2018
كلام مباشر فى قلب الصميم من منتدى شباب العالم .. !!
—————————————————–
الفيديو ده فيه رد على الهجوم اللى شنه البرلمان السورى بسبب كلمات الرئيس السيسى فى منتدى شباب العالم عن إن الشعوب هى اللى بتضيع بلادها .. سواء كان بسوء نية أو بحسن نية …. أيوة .. أنتم اللى عملتم فى بلدكم كدة ، لما قولتم “يالا بينا نلعب ثورة و .. وكدزة” .. لما صدقتم اللى ضحك عليكم .. لما صدقتم إن الدول اللى بتقع ممكن تقوم تانى .. أو بالأصح .. لما صدقتم إن الدول والتنظيمات والجماعات والجهات اللى شجعتكم إنكم توقّعوا بلدكم ، هــ تسمح لكم إنكم توقفوها تانى على رجلها ..
و ده كان ممكن يحصل عندنا فى مصر .. لولا لطف ربنا بينا ومشيئته .. وتسخيره للجيش المصرى ، ولشعب واعى قدر يقف إيد واحدة وينقذ بلده من الضياع .. (الناس التانيين دوول اللى كانوا و مازالوا عايزين يهدوها مالناش دعوة بيهم 😉 )
الفيديو ده بيقول اللى بقالنا سنين بنقوله .. وبشكل واضح وصريح بدون أى مواربات سياسية:
– إن أدوات الصراع إتغيرت .. وإن الحروب المباشرة أصبحت مكلفة وعلشان كدة اصبح هناك أليات لحروب بشكل جديد ، وتدمير الدول بشكل مختلف
– لازم نتكلم بشكل واضح وصريح ونفهم الناس لأننا بنتكلم عن إنقاذ أوطان وإنقاذ ملايين البشر من الضياع
– اللى بيحصل ده هدفه هدم مؤسسات الدولة وتضييع قيم ومعايير الدولة الوطنية وهدم القيم الأخلاقية والإنسانية نتيجة حالة الفوضى الشاملة اللى هتحصل .. وفى النهاية مش هــ يبقى فيه حل غير الوصول لمعسكرات اللاجئين لسنوات زى ما إحنا شايفين حوالينا
– الناس ممكن تعيش إزاى لما الدولة تخش فى فوضى وخراب ، ومين ممكن يأمن إحتياجات الشعوب من الوقود والمؤن والأغذية وغيرها (مثال: مصر بتستهلك وقود فقط بــ 42 مليار دولار فى السنة)
– إحنا كلنا والأجيال الجديدة محتاجين نتعلم يعنى إييه مقومات الدول والحفاظ عليها وإستمرارها ، لأن بقاء الدول هو أهم التحديات اللى بــ يتصارع عليها الجميع
– إحنا بنسجل أمام الله وامام العالم و بــ نبث رسالة إن الحفاظ على بقاء الدول هو حق من حقوق الإنسان
ربنا يحفظ بلادنا من كل شر