07 Jan 2019
المقابلة .. !!
————–
حالة من السعادة و البهجة سيطرت علينا باللأمس وإحنا بــ نتابع إفتتاح مسجد الفتاح العليم و كتدرائية ميلاد المسيح فى العاصمة الإدارية الجديدة ، اللى تابع فعالياتها عن كثب كل القنوات المحلية والعديد من القنوات العالمية .. وتابع الفعاليات أكثر كل من ينتمى لفصيل “الجز على الأسنان بقوة” .. لأن مصر ماشية فى طريق هدم كل أكاذيبهم الفنكوشية وكمان بــ تقفل عليهم كل الأبواب اللى يمكن النفاذ منها لقلب الوطن الكبير مصر من اجل هدمه من الداخل … يعنى فعلا الموضوع يستاهل ويستحق إننا كمصريين نشعر بــ قمة البهجة والسعادة وإحنا بــ نشاهد بلدنا كل يوم بتخطى لقدام 😊😊
لكن كان الأكثر بهجة هو اللى حاصل النهاردة بعد إذاعة الفيديو الفظيع الشنيع المريع ، و هو حوار الرئيس السيسى على قناة CBS الأميريكية ، واللى الرئاسة والسفارة المصرية وبعض منظمات القمع من كواكب المريخ ، و زحل .. طالبت القناة على مدار 3 شهور بعدم إذاعته .. والرئاسة المصرية داخلة فى حيص بيص .. والسيسى ركبه بتخبط فى بعضها بسبب الكلام الخطير والمخجل اللى إتقال فى المقابلة .. والقناة على نغمة واحدة ماخوش يا بابا ماخدوش يا بابا .. ده لازم يتذاع .. لازم يتذاع .. وطبعا الرئيس ياعينى اللى كان طول المقابلة عرقان ومش قادر يرد ولا عارف يعمل شئ مع المحاور العبقرى اللى أدار الحوار .. بعد ما قدر هذا المحاور ينتزع الإعترافات من الرئيس السيسى ويحرجه ويثبت إن إسرائيل بتدخل بالطيران بتاعها تضرب فى قلب سيناء وإن مصر دولة قمعية وإن السيسى وزير الدفاع اللى خان الرئيس الشرعى محمد مرسى وإنقلب على الشرعية .. ألخ ألخ ألخ …. وأكثر من ده كان إجمالى اللى إتقال قبل إذاعة الحوار !! 😏
و طبعا الأبواق المعادية إستثمرت الموضوع ده لمصلحتها .. وخلقت حالة من البلبلة ولعبت على مشاعر التشكيك فى قلوب الناس كالعادة وللمرة المليار .. وللأسف بــ نلاقى برضوا ناس بتسقط فى الفخ .. وخصوصاً إن المقابلة متسجلة من شهر سبتمبر الماضى .. و توقيت الحديث عنها وبعدين إذاعتها جاى فى فترة أعياد الميلاد وإفتتاح الصروح المصرية الدينية فى العاصمة الإدارية الجديدة ، و ده أكيد ماكانش مجرد صدفة ! 🤔
وأخيراً …. تم بث الحوار .. والحقيقة إننا ماشوفناش أى شئ من اللى إتقال وتم الترويج له .. لكن الواقع كان عكس كدة تماما … الرئيس كان رابط الجاش ، حاضر الذهن .. إجاباته محددة وفى الصميم ، ردوده مباشرة قاصفة للجبهة .. و أحيانا ساخرة من اللى بيتقال .. يعنى كل الهرى اللى شغال بقاله اسبوع طلع عكسه هو الصحيح !! 😉🙃
الرئيس أجاب بشكل مباشر عن التنسيق الأمنى مع إسرائيل وبدل ما كان بــ يتقال إن إسرائيل بتضرب فى سيناء ، طلع إن الطيران المصرى هو اللى بيعدى الحدود الإسرائيلية فى أثناء المناورة الجوية للإلتفاف والعودة ، وكان لازم يتم إعلام الجانب الإسرائيلى لتحييد الدفاعات الجوية الإسرائيلية علشان ماتتعاملش مع الإختراق ده … وأى حد عنده الحد الأدنى من المعلومات العامة هيعرف إن ده شئ طبيعى .. و لو الطيران المصرى بيضرب على الحدود الجنوبية كان لازم يتم التنسيق مع السودان .. وكذالك على الحدود الغربية ….. وبعدين بصراحة مش قادر افهم .. يعنى هل من المنطقى إن مصر اللى بتضرب الإرهابيين فى العمق الليبى ، هــ تروح تطلب من إسرائيل إنها تضرب الإرهابيين جوة سيناء .. لأ ، وتلاقى البعض مصدق ده !!!!! 😅
كمان الرد الجامع المانع لما المحاور «سكوت بيلي» بــ يقول للرئيس ، إزاى إنت بتاخد مليار دولار معونة عسكرية من أميريكا و مش قاردر تقضى على الإرهاب فى سيناء ، فكانت الإجابة كصفعة على وجهه “و إزاى أميريكا ماقدرتش تقضى على الإرهاب في أفغانستان بعد 17 سنة أنفقت فيها تريليون دولار !؟” 😄
الموضوع ماقتصرش على كدة وبس .. لكن الرئيس السيسى إنتقل من مرحلة الإجابة المسالمة لمرحلة الهجوم على السؤال .. وخصوصا لما المحاور «سكوت بيلي» بدأ يستخدم سلاح الغرب الأثير بتاع حقوق الإنسان ومنظمة هيومان رايتس ، والمعارضة السلمية الكيوت ، و الــ 60 ألف معتقل سياسي .. فبدأ الرئيس السيسى يقول له إحنا ماعندناش معتقلين سياسيين .. وأنا ماعرفش منظمة هيومان رايتس بتجيب الكلام ده منين ، و ياريت لو عندهم ادلة على الكلام ده يقولوها .. و مش كدة وبس .. لكن بدأ كمان ساخراً وبمنتهى الأدب يهاجم شخص المحاور «سكوت بيلي» وخصوصا فى الرد على جزئية فض إعتصام رابعة .. فقال له .. “وإنت لييه واخد كلام منظمة هيومان رايتس أمر مسلم بيه .. فين الدليل على الكلام ده .. هل تتابع عن كثب الوضع في مصر؟ من أين تحصل على معلوماتك ؟ كان هناك آلاف المسلحين في الاعتصام لأكثر من 40 يومًا، وقد حاولنا بكل الوسائل السلمية تفريقهم لكنهم رفضوا” 😞
ده كان ملخص مختصر لبعض الإجابات اللى الرئيس المصرى تصبب عرقاً فيها وركبه خبطت فى بعضها وماعرفش يرد عليها … و هى دى كانت نهاية فرقة “حسبوا للمعنى الحرفى للعهر الإخوانى” فى الترويج لأكاذيب على مدار أسبوع ، وفى اللأخر الكذبة إنفجرت فى وجوههم و فى وجوه كل اللى صدقهم .. والحقيقة إحنا عندنا سؤال .. “بالنسبة للى كانوا بيقولوا إن الشرطة المصرية هى حاولت تفجر الكنيسة و مات الضابط و هوة بيحط المتفجرات علشان يغطو على حوار السيسى الفضيحة فى قناة امريكية ، ياترى موقفكم إييه دلوقتى بعد ما الحوار طلع عكس اللى كنتم بتقولوه وتروجوا له !؟” 😊
الحوار كان خرفانى من الطراز الأول .. ورائحة الضانى ، و الأموال القطرية تفوح من كل جزء فيه .. وخصوصا بعد ما قام المحاور ، وأيضا معدين اللقاء بإضافة بعض التحابيش وإستخدام لقطات وفيديوهات مجتزئة تم بثها مراراً وتكراراً على مدار السنين الماضية من خلال شقيقتهم التوأم قناة الجزيرة .. و مش كدة وبس .. لكن كمان إستضافوا بعض كوادر الإخوان للحديث عما يحدث فى مصر .. شوفو الحيادية مقطعة بعضها إزاى .. لأ و كمان القناة نفسها كانت بتحاول تجمّل صورة الإخوان فى التقارير اللى كانت بــ تتخلل اللقاء ، وقالوا نفس الكلام اللى كان بــ يقوله شمامين الكلة عندنا هنا فى مصر لما تتهم الإخوان بالإرهاب فــ تلاقى الواحد منهم ياخد نفس عميق و يقولك “معقولة دول إرهابيين .. دول فيهم مهندسين ودكاترة ومدرسين .. إزاى تقولوا عليهم كدة” … و ده نفس الكلام اللى إتقال فى التقارير اللى تخللت اللقاء بالحرف الواحد. 😅😅
فى النهاية .. الحوار من وجة نظرنا كان رائع فى تفاصيله و فى المجمل .. و الرئيس السيسى نجح إنه يحرج المحاور «سكوت بيلي» فى أكثر من جزئية فى اللقاء .. و مش بس كدة .. لكن الزخم اللى حصل على مشاهدة الحلقة جعل المشاهد الأميريكى يهتم برؤية الحوار .. و ده اللى هــ يخلّى ورقة الإخوان هــ تكون جزء من اللعب على المكشوف فى الإنتخابات الأميريكية القادمة … والأهم من كدة هو نجاح مصر فى إيصال رسالة للمجتمع الأميريكى مضمونها إن الإخوان هو فصيل شرير غريب عن المجتمع المصري ، واقف طول الوقت ضد التنمية اللى بتحصل فى مصر .. و المكان القانوني لهذا الفصيل فى مصر هو السجن .. أو ياخدوهم عندهم هناك لو حبّوا .. أهو يلعبوا ديموقراطية سوا مع بعض 😉🙃
وبالمناسبة .. تم إقالة الرئيس الإخبارى لشبكة CBS بدعوى عدم المهنية .. وإدعاء القناة كذباً أن السفير المصرى لدى الولايات المتحدة طلب عدم نشر المقابلة … !! مع ملاحظة إن اللقاء المفروض يستغرق ساعة كاملة ، قامت القناة بإذاعة 14 دقيقة بس منه …. معظمهم لت و عجن مع اخوان عايشين في امريكا … ياااااه .. ده واضح إن القمع المصرى إييده طايلة أوى 🙂 🙂
و إذا كان الجزء اللى تم عرضه من المقابلة ، واللى بيقولوا فيه إن المحاور «سكوت بيلي» أحرج فيه الرئيس المصرى بشدة ، طلع بالشكل ده ، ووضح فيه إن الرئيس السيسى هو اللى فرمهم .. أومّال الجزء العادى اللى ما إتذاعش حصل فيييييه إييييه !!!؟؟ 😅 😅 😅
كلمة أخيرة نحب نقولها لــ دوكهمة …. ((تعيشوا وتاخدوا غيرها)) .. 😄😄