08 Jan 2019
مصر والتنظيم .. من منظور مختلف .. !!
—————————————
رسميا مصر تفوز بتنظيم نهائيات كأس أمم أفريقيا 2019 متفوقة في تصويت اللجنة التنفيذية للاتحاد الأفريقي على جنوب أفريقيا .. وكانت نهائيات 2019 ستقام في الكاميرون، ولكن تأخر دولة الكاميرون في إنجاز المنشآت الرياضية المتفق عليها في ملف الترشح دفع بالاتحاد، في نوفمبر الماضى ، إلى سحب التنظيم منها .. وتم عمل التصويت اليوم وإنتزعت مصر حق تنظيم البطولة من أمام جنوب أفريقيا بعد منافسة شرسة 😊😊
ده كان ملخص اللى تم نشره فى معظم المواقع الإخبارية والريضية حول الموضوع … و ده طبعا شئ يفرح إن مصر تفوز بتنظيم بطولة قارية للعبة الأولى و المفضلة لمعظم المصريين .. وكمان للمرة الخامسة فى تاريخها .. وهى الدولة الوحيدة اللى أخدت حق التنظيم للعدد ده من المرات على مدى تاريخ البطولة … كل ده حلو وجميل .. وشئ يفرح بجد .. لكن الخبر ده له معانى تانية مختلفة بالنسبة لنا من منظور مختلف.
طب إزاى !!؟؟ .. أقولك إزاى ….
أولا .. مصر نظمت البطولة الأفريقية فى 2006 .. وفازت بيها .. وكمان فازت ببطولة 2008 .. وبعدها 2010 .. و كون إن مصر تفوز بتنظيم بطولة أمم 2019 .. ده معناه ، نقطة و من أول السطر 😉
ثانياً .. تنظيم مصر لبطولة رياضية قارية ، وخصوصا لو كانت بطولة كرة قدم ، ده أكيد له مردود إقتصادى إيجابى .. و هــ يعمل حركة إنتعاشة إقتصادية ، وحالة من الرواج السياحى والتجارى وتدفقات نقدية مباشرة و غير مباشرة فى خزينة الدولة وفى جيوب المواطنين .. و ده شئ بديهى بيحصل كنتيجة لتنظيم أى بطولة رياضية فى أى دولة ، وإلا ماكاتش الدول تتسابق على تنظيم مثل هذه البطولات.
ثالثا .. التصويت فى صالح مصر لتنظيم البطولة هو ختم الجودة وشهادة تقة دولية من الإتحاد الإفريقى والإتحاد الدولى ، بــ مدى جاهزية المنشأت المصرية لإستضافة حدث زى ده قبل الفعاليات بــ 6 شهور فقط … و ده معناه إن مصر برغم كل الأحداث اللى مرت بيها ، لسة كبيرة وعفية وقادرة ، وعندها إمكانيات تنظيمية ممكن ماتكونش موجودة عند دول تانية.
رابعاً .. فوز مصر بتنظيم البطولة هو إعتراف أممى ، بإن الأوضاع الداخلية فى مصر مستقرة ، والأمن مستتب ، ومافيش أى مشاكل داخلية تحول دون تنظيم مصر للبطولة.
خامساً .. إقدام مصر على تقديم ملفها لتنظيم البطولة فى حد ذاته هو إعلان تحدى من الدولة المصرية ورسالة للعالم بنقول فيها إن مصر قادرة على تأمين الحدث الرياضى الكبير وتأمين كل أفواج الدول المشاركة وألالاف من الزائرين من مختلف الجنسيات اللى هــ يزوروا مصر لحضور الفعاليات .. ناهينا عن قدرتنا على تأمين الدولة بالكامل من كافة المخاطر والتهديدات
الحدث ده صحيح حدث رياضى .. لكنه من وجهة نظرنا هو حدث سياسى بالمقام الأول و بــ يبعت رسائل كتيرة على محاور متعددة لأطراف دولية وإقليمية و … و خرفانية كمان 😊
و شوف الصدف و شوف حكمة ربنا يا مؤمن ، لما مجموعة قنوات بي ان سبورت تطلع بعد عدة ساعات فقط من فوز مصر بتنظيم البطولة ، وتعلن قطع البث عن مصر علشان الشركة المصرية للقنوات الفضائية CNE ما جددتش معاهم العقد ، برغم إنهم عارفين كويس أوى إن فيه بينهم وبين الشركة المصرية قضية وحكم محكمة بتغريم بى إن سبورت 400 مليون جنيه بسب الإحتكار من سنة 2016 ، واللى إستأنفت على الحكم , وعرضت التصالح مع جهازي حماية المنافسة والمستهلك .. والقضاء المصرى رفض الإستئناف فى 2018 و ألزمها بشوية شروط كدة بما يتماشى مع قانون حماية المستهلك المصرى ومنع المنافسة الإحتكارية.
دلوقتى العقد إنتهى فى ديسمبر 2018 .. والجزيرة إكتشفت فجأة النهاردة _وبالصدفة البحتة_ إنها لازم توقف البث .. وبتقول للمصريين مشوها “موبايلات بقى” بصوت محمد هنيدى فى “جائنا البيان التالى” .. أه والله بجد .. ده اللى كتبوه فعلا على موقعهم الرسمى .. قالوا اللى عايز ممكن يتابع على الهواتف الذكية 😊 😊 …. وطالما عملوا كدة .. يبقى لازم يحصل حاجة من إتنين .. يا إما الجزيرة ترضخ لأحكام القضاء المصرى .. أو يكون من حق مصر إنها تلجأ للإتحاد الدولى للحصول على حقوق بث فعاليات البطولة بسبب إمتناع الجزيرة صاحبة حقوق البث عن تقديم الخدمة للمشاهدين المصريين.
مش باقول لكم الحدث ده مش رياضى بس .. لكنه سياسى .. و شوية حاجات تانية كدة فوق بعضيها 😉🙃
ماتستعجلوش ..
كل اللى مصر كانت بتبنيه فى الــ 5 سنوات اللى فاتوا ، هــ تبدأ تظهر بشايره تباعاً .. واحدة وراء الثانية
وبإذن الله مصر جاية 😊 😊