التاريخ حدوتة إسمها مصر

16 Jun 2014

التاريخ حدوتة إسمها مصر

————————-

من لم يقرأ التاريخ فلن يعرف أبداً حكاية مصر … الحكاية المتجددة اللى دايما نهايتها معروفة وهى إنتصار مصر .. وبنفس السيناريوهات ، ويمكن بنفس الأحداث مع إختلاف الشخوص والتواريخ والحقب الزمنية !!!! … وزى ما قلنا قبل كدة ، وزى ما مصر عوّدت العالم كله عبر التاريخ ، إن الدنيا لازم تضلّم قوى ، علشان بعدها تنوّر قوى ..

مافيش جديد فى اللى حصل فى 2013 ومن يوم ما كان فى دولة إسمها مصر ..

هى دى مصر …

هى دة مصر اللى لازم تفخروا بيها يا مصريين

عايزين نقول كمان … طب نقول كمان

مصر منهارة وتم إحتلالها من الهكسوس بعد ما سيطروا على الشام .. تقوم تبتدى المقاومة المصرية فى عهد سقنن رع  ومن بعده إبنه كامس لغاية لما ييجى الملك أحمس وهو عمره 19 سنة ، وينهى الغزو تماماً ويطرد الهكسوس من الدلتا ومن مصر كلها وتستعيد مصر كامل سيادتها على أراضيها .. لأ ومش كدة وبس .. ده كمان حاصر الهكسوس وسيطر على الشام وأنهى دولة الهكسوس تماماً .. ثم وضع الأسس لعصر الدولة الفرعونية الحديثة، واللي بموجبها وصلت الدولة المصرية لــ ذروتها !!! …. حد سمع عن الهكسوس بعدها فى التاريخ !!؟؟

طب نقول كمان … 🙂

 الحملات الصليبية تجتاح المناطق العربية والشام … وهى كانت حملات إحتلال ترفع شعار الدين لكسب التعاطف والتأييد للغزو .. والمنطقة العربية ضعيفة و منهارة .. ومع تقدم الجيوش الصليبية ، أصبح الأمر يهدد الشام ومصر ، … فــ يطلع صلاح الدين الأيوبى ويفتح باب التطوع في مصر لمحاربة الصليبيين ويرسل مراسلات إلى الشام و الموصل والجزيرة العربية .. (الجزيرة العربية .. هه) .. يطلب منهم دعم الجيش المصرى .. ويخرج صلاح الدين ويواجه الجيوش الغازية فى عدة معارك إنتهت بمعركة حطين الفاصلة ويحرر المدن اللى تم إحتلالها .. وكمان يحرر القدس وتندحر الجيوش الصليبية …. حد بعدها سمع عن الحملات الصليبية تانى إلا فى أخبار متناثرة هنا وهناك فى كتب التاريخ !!؟؟

نقول كمان.. طب نقول كمان .. 🙂

جيوش المغول تجتاح العالم ، وتسقط الخلافة العباسية بعد إحتلال بغداد وتحوّل نهر الفرات إلى نهر من الدماء من كثرة القتلى .. وبعدين يقرروا إنهم يدخلوا مصر !! .. ونفس السيناريو بــ يتكرر .. المنطقة كلها منهارة ، ومصر ممزقة داخلياً وفيها صراع على الحكم بين المماليك .. و بــ يحكم دولة المماليك في الوقت ده المنصور نور الدين علي بن المعز أيبك وهو صبي صغير عنده 15 سنة !!

قووووم إيييه … ييجى قطز ويستولى على الحكم ويقنع المماليك والشعب بالتوحد لقتال الخطر المغولى ضد مصر والعالم الإسلامى (تقولوش حملة تمرد !! ) ….

ويأسس قطز الجيش المصرى بسرعة .. ويواجه المغول ويهزمهم فى موقعة “عين جالوت”  وهى واحدة من أهم المعارك الفاصلة في تاريخ مصر و العالم الإسلامي .. واللى أدت نتائجها لإنحسار نفوذ المغول في بلاد الشام وخروجهم من المنطقة نهائياً وإيقاف المد المغولي المكتسح الذي أسقط الخلافة العباسية ، ثم ظهور دولة المماليك فى مصر كأكبر قوة إقليمية فى المنطقة … وبيقول المؤرخون إن المعركة دى ونتائجها كانت بداية النهاية للإمبراطورية المغولية اللى لم يهزموا في معركة قط قبلها … حد سمع عن المغول بعدها فى كتب التاريخ

نقول كمان !!؟؟ .. نقول كمان … 🙂

محمد على يتسلم دولة ممزقة داخليا ومنهارة بفعل حكم المماليك بعد ما ضعفت دولتهم … وخاض محمد علي في بداية فترة حكمه حربًا داخلية ضد المماليك والإنجليز إلى أن خضعت له مصر كاملة ، وبعدين خاض حروب بالوكالة عن الدولة العليا في جزيرة العرب ضد الوهابيين وضد الثوار اليونانيين الثائرين على الحكم العثماني في المورة، وكمان وسّع دولته جنوبًا بضمه للسودان … وبعد كدة تحول لمهاجمة الدولة العثمانية وحارب جيوشها في الشام والأناضول، وكاد أن يسقط الدولة العثمانية، لولا تعارض ذلك مع مصالح الدول الغربية التي أوقفت محمد علي وأرغمته على التنازل عن معظم الأراضي اللي ضمها !!! .. وفى خلال فترة حكم محمد علي، استطاع أنه ينهض بمصر عسكريًا وتعليميًا وصناعيًا وزراعيًا وتجاريًا بعد الكبوة والظلمة اللى كانت فيها ، لغاية ما أصبحت مصر دولة ذات ثقل في تلك الفترة … !!

وكل ده بقى .. وإحنا ماجبناش سيرة حرب أكتوبر 1973 ، لأنها مش محتاجة قوالة …

وأخيراً …

يبقى لما التاريخ يعيد نفسه ، .. والدنيا تضلّم قوى  ، والإخوان يوصلوا للحكم فى مصر .. والمنطقة العربية كلها تبقى فى خطر .. ويتم تدمير العراق وسوريا وليبيا ، وتتقسم السودان واليمن ، والحروب اللى دايرة كل يوم فى لبنان ، والجزيرة العربية تبقى فى خطر ، .. فــ يكون من الطبيعى إن مصر تنتفض فى 30 يونيو على إيدين أولادها الأوفياء الشرفاء .. والعالم كله يقف قصادها علشان ماتقومش تانى … وتقاوح وتقوم غصب عن الكل (فى الداخل والخارج) .. وتبتدى الدنيا تنور تانى ، والميزان المقلوب يبتدى يتعدل فى المنطقة (سوريا وليبيا والعراق ) بعد وقفة مصر القوية .. ومساندة دول الخليج زى ما كان بيحصل كل مرة … لأن التاريخ بيعيد نفسه .. طب مش ده يبيّن لنا إن دايما مصر هى اللى بتبقى عليها العين

لكن اللى بيقرأ تاريخ مايخافش على مصر أبداً .. لأن مصر ممكن تمرض شوية ، لكنها مش ممكن تموت

مش باقول لكم إن التاريخ حدوتة إسمها مصر  =D

لمتابعة تعليقاتكم