مصر الأمر الواقع الذى فرض نفسه على الجميع

10 Feb 2019

مصر الأمر الواقع الذى فرض نفسه على الجميع !!

————————————————-

لما بدأت إرهاصات و دعاوى ترشح الرئيس عبد الفتاح السيسى لرئاسة مصر ، كان كل المصريين المؤيدين لفكرة ترشحه للرئاسة ، بــ يدعموه لهدف واحد فقط … هو الوقوف فى وجه الإرهاب وفى وجه المؤامرات اللتى تحاك من اجل تدمير الدولة المصرية ، والحفاظ على مصر من السقوط فى حرب أهلية مدمرة تأكل الأخضر واليابس … و دى كانت بالفعل أقصى طموحات المصريين المخلصين الوطنيين المحبين لبلدهم ، فى ظل ظروف سياسية وإقتصادية صعبة ، و فى خضمّ ضغوط إقليمية ودولية غير مسبوقة ، تفوق حجم وقدرات دول كبرى وليس دولة بحجم وقدرات مصر ..

ولكن مصر أثبتت إنها أقوى وأكبر من أى دولة فى العالم .. وأثبت الشعب المصرى ، إنه الشعب الذى يستطيع أن يقهر المستحيل بالفعل …. وبدأت حملات التشنيع والهجوم على المرشح والرئيس المصرى الجديد .. والكلام المستمر طول الوقت عن إنه مالوش برنامج ، وماعندوش رؤية …. وتحمّل الرئيس المصرى كل هذا الهجوم فى صمت . من أول كوميكسات اللمبة الموفرة لغيرها من السف والتريقة على كل شئ وأى شئ .. ووقف المؤيدين للدولة موقف شجاع أمام كل هذه الحملات .. وعينهم فقط إستقرار الدولة وبقائها والحفاظ عليها من السقوط.

لكن .. لو الرئيس السيسى مع بداية ترشحه ، كان أعلن البرنامج الإنتخابى بتاعه ورؤيته لمصر بعد 5 سنوات فقط .. كان ممكن المؤيدين للدولة بشكل عام ، وله هو كشخص بشكل خاص ، يستنكروا اللى بيتقال ، ويعتبروه إما مبالغات ، أو أحلام غير قابلة للتحقيق والتصديق .. لأن اللى حققته مصر ، لم يكن من الممكن تصديقه ، حتى بالنسبة لأشد المتفائلين تفاؤلاً.

من 5 سنوات ماكانش ممكن أى حد يتخيل إن الدولة المصرية الواقعة تحت حصار سياسى من كل دول العالم تقريباً ، و اللى تم تعليق عضويتها فى الإتحاد الإفريقى ومعظم المؤسسات الدولية .. هــ ييجى يوم و تتسلم رئاسة الإتحاد الأفريقى ، وقبلها العضوية الغير دائمة فى مجلس الأمن ، ورئاسة لجنة مكافحة الإرهاب فى الأمم المتحدة ، وهــ يخطب رئيسها فى مجلس الأمن والجمعية العامة كبرى المؤسسات الدولية خطابات قوية قاصفة بتطرح رؤية مصر للملفات الدولية .. وكمان بتنفذ الرؤية دى.

لو من 5 سنين ، كان حد قال إن مصر هــ تعالج مليون ونصف شخص من فايروس سى .. وهتعمل خطة لإعلان الدولة خالية من الفيروس اللعين ده فى 2020 كنا هــ نتهمه بالجنون.

لو من 5 سنين ، كان حد قال إن مصر هــ تقضى على قوائم الإنتظار للعمليات الجراحية ، و هــ تعمل حملة 100 مليون صحة كأكبر عملية مسح طبى فى التاريخ البشرى للكشف عن فايروس سى والكشف عن وعلاج الأمراض السارية .. وبعدها حملة نور حياة .. بتمويل من صندوق تحيا مصر لفحص 2 مليون مواطن و 5 مليون طالب و اجراء 200 الف عملية مياة بيضاء و 15 الف عملية مياة زرقاء و 254 الف تدخل جراحى و 3 الاف عملية قرنية و 18 الف تدخل بالحقن و تسليم مليون نظارة طبية لتلاميذ المدارس … كنا قولنا عليه مجنون.

لو من 5 سنين ، كان حد قال إن مصر هــ تبنى عاصمة إدارية ومعاها 11 مدينة جديدة فى طول مصر وعرضها ، ماكانش ممكن حد يصدق.

لو من 5 سنين ، كان حد قال إن مصر هــ تحقق الإكتفاء الذاتى من الغاز وهــ تبقى مركز إقليمى ودولى لتسييل الغاز وتصدير الطاقة ماكانش ممكن حد يصدق.

لو من 5 سنين ، كان حد قال إن مصر هــ تعمل أكبر مشروع تطوير عشوائيات فى العالم ، و هــ تنقل سكان العشوائيات لمدن عمرانية جديدة على أحدث مستوى ، وشقق مفروشة ومدارس جديدة ، ماكانش ممكن حد يصدق.

لو من 5 سنين ، كان حد قال إن مصر هــ تحقق نسبة نمو إقتصادى 5.5% .. و هــ تبقى الوجهة الأولى للإستثمارات فى أفريقيا ، وخامس أكبر وجهة إستثمارية فى العالم ، وإن مؤسسات التصنيف الإئتمانى ، هترفع تصنيف مصر للمستوى الإيجابى ، وإن الإحتياطى النقدى هــ يرتفع إلى قرابة 44 مليار دولار ، وهــ نسدد ديون خارجية وخدمات دين بحوالى 30 مليار دولار فى خلال سنتين ، وهــ نشارك فى قمة الدول الــ 20 كضيف مدعو من دولة الصين على شرف القمة ، وكمان فى قمة البريكس ، وإحتمالية إن مصر تنضم للبريكس كعضو مراقب .. ماكانش ممكن حد يصدق.

لو من 5 سنين ، كان حد قال إن مصر هــ تفرض رؤيتها الساسية الشاملة على منطقة الشرق الأوسط .. و هــ تفرد أجنحتها الساسية والعسكرية على البحر الأحمر والمتوسط ، وتتمدد سياسياً وثقافياً وإقتصادياً فى معظم القارة الأفريقية ، وتضخ إستثمارات فى الدول الأفريقية ، ويتم إيقاف بناء سد النهضة ، ويتم تدشين طريق برى (القاهرة – كيب تاون) ، وتكون مصر هى مركز تجمع إقتصادى سنوى لمجموعة دول الكوميسا الأفريقية … ماكانش حد ممكن يصدق

لو من 5 سنين ، كان حد قال إن مصر هــ يبقى فيها مناطق صناعية روسية وصينية .. وهــ تحقق اسرع معدلات إنجاز لمشروعات البنية التحتية على مستوى العالم ، فــ تنشئ مزارع سمكية ، وتعمل محطات كهرباء على أحدث تكنولوجيا عصرية ، ومحطات مياه ، ومحطات تحلية ، ومحطات معالجة ، وشبكات طرق وكبارى وأنفاق ، وبناء 250 مستشفى ومستوصف ، وتحديث أسطول عربات ترام إسكندرية ، وسكك حديد مصر ، ومترو الأنفاق ، وبناء أكبر متحف أثار فى العالم ، وإنشاء 7 مطارات جديدة ، وتطوير الموانئ المصرية .. ماكانش ممكن حد يصدق

لو من 5 سنين ، كان حد قال إن مصر هــ تحدّث قوتها العسكرية ، وهيبقى عندها حاملتى طائرات ، وأسطولين بحريين شمالى وجنوبى ، وتطوير وتحديث قوتها الجوية الضاربة ، وتنويع مصادر السلاح للجيش المصرى ، وقيام الجيش المصرى بعمل مناورات مشتركة قوية ومتكررة مع كثير من دول العالم زى روسيا و فرنسا وإيطاليا واليونان وقبرص والسعودية والبحرين والكويت ، وعودة مناورات النجم الساطع مع أميريكا ، وإنشاء قاعدة محمد نجيب ، أكبر قاعدة عسكرية قومية فى الشرق الأوسط … ماكانش ممكن حد يصدق

كل اللى بنقوله ده فقط للتذكرة … بمناسبة إن مصر تسلمت رئاسة الإتحاد الإفريقى لأول مرة من 2002 ، وبإجماع 54 دولة أفريقية

كل اللى بنقوله ده على سبيل المثال لا الحصر .. لأن بالفعل فيه أكثر من كدة بكثير !!

كل اللى بنقوله ده علشان ماحدش ينسى !!

كل اللى بنقوله ده علشان نعرف كنا فين وبقينا فين !!

كل اللى بنقوله ده علشان بس الناس اللى بتقول إننا دلوقتى بقينا أسوء … لأن لو هو ده السيئ .. يبقى مرحبا بالأسوء ثم الأكثر سوءً .. ومرحباً بالإقتصاد المنهار ، والإنقلاب الذى يترنح 😉🙂

لمتابعة تعليقاتكم