27 Mar 20419
للخيانة عنوان .. !!!
——————–
فى نفس الوقت اللى بــ يتم إستباحة قطعة من الأراضى السورية وهى هضبة الجولان ، لصالح الكيان الصهيونى الغاصب … الإستباحة اللى تمت بجرة قلم علشان تقلب الصفحة على كل الشعارات والمزايدات الحنجورية .. وتفضح أكذوبة نشطاء الغبرة وأصحاب دعاوى الثورة السورية اللى أوصلت سوريا لهذا الوضع من الضعف والوهن اللى بيتم فيها تقسيم وبيع أراضيها فهمى نظمى رسمى ، بدون أى رد فعل من جانب سوريا …. 🙄
فى نفس الوقت اللى الرئيس الأميريكى بيوقع على ضم الجولان السورية لإسرائيل .. “عطاء من لا يملك لمن لا يستحق” … بــ نلاقى بعض السفهاء من اللى بــ يسموا نفسهم نشطاء سياسيين .. و تحت نفس الدعاوى الباطلة بتاعة الحرية والديموقراطية .. نفس الشعارات الحنجورية .. نفس قول الحق اللى بــ يراد به باطل … بــ نلاقى السفهاء دوول بــ يلجأوا لنفس الجهة اللى باعت الجولان ، وضحت بالقدس .. قال إييه علشان يدعموا الشعب المصرى ويقفوا مع مصلحة المصريين ضد النظام الغاصب المغتصب لحرية المصريين .. وكأنهم بيتكلموا عن سلطة إحتلال !!! … والنبى يا شيخ بجد !!؟؟ … إنتم فعلا مصدقين الهري اللى إنتم بتقولوه !؟ .. وإلا فاكرين إن أى مصرى سوى ، وبوصلته الوطنية شغالة صح ، ممكن يصدق الهبل ده !!؟؟ 🤔
إحنا مش هــ نستخدم البذاءات المنتشرة من عينة المثليين والمخنثين ، ولا المصطلحات المجعلصة من عينة الدياثة السياسية والفكرية .. و كمان نربأ بكل أصدقائنا إن حد فيهم ينشر أو يردد الكلام ده برغم واقعيته 😎 … لكننا هــ نجيبها على بلاطة .. من غير أى تزويق …. الناس دى خونة … أيوة … خونة برخصة كمان … ومافيش أى لفظ تانى ممكن يوصفهم .. لأنه مهما كانت المبررات أو وجهة النظر .. فــ الاستقواء بالخارج خيانة …. والخيانة مافيهاش وجهة نظر
إنت بتستعبط إنت وهو وهى … إنتم بــ تشتكوا للكونجرس اللى برشط على الجولان لصالح إسرائيل ، وضحى بالقدس بقرار أحادى فى مواجهة العالم كله ، و دمر سوريا والعراق بالتعاون مع حلفائه وكان السبب فى قتل وإغتصاب وتشريد ملايين الرجال والأطفال والنساء .. وخلق ودعم تنظيمات القاعدة وداعش أقذر وأبشع كيانات إرهابية فى العالم واللى خرجوا من رحم الإخوان المجرمين اللى هم رافضين لحد دلوقتى يقولوا عليه تنظيم إرهابى … ورايحين تطلبوا منه التدخل لمصلحة مصر والشعب المصرى !!!! …. ده إييه الصفاقة دى … و ده يتوصف بإييه غير إنه خيانة … 😞
وبعد كل ده .. لازال اللى إسمه عمرو واكد والمدعو خالد أبو النجا وشركاهم ، بــ يمتلكوا القدر الأكبر من القذارة والقدرة على تبرير اللى عملوه على صفحاتهم والأكونتات الرسمية بتاعتهم على تويتر .. بإن ده شئ عادى وطبيعى .. وكل اللوبيهات فى العالم بتعمل كدة .. لوبيهات إييه يا كابتن !؟؟ .. هو مصطلح اللوبى ده بيطلق على مين غير اللوبى اليهودى !!؟؟ ….. المهم إن ده هو نفسه اللى عمله خالد على وممدوح حمزة لما قابلوا فرانسوا هولاند الرئيس الفرنسى السابق أثناء زيارته لمصر ، وطالبوه بوقف صفقات التسليح الفرنسية لمصر ، والضغط على الدولة المصرية لوقف قمع الحريات .. لدرجة إن الراجل إستغرب وقال لهم ، لما الدولة فيها قمع … أومّال انتوا وصلتوا لحد عندى إزاى وبتطلبوا منى اللى بتطلبوه ده !!؟؟
للأسف … هو ده نتاج المخاض والقيئ السياسى اللى خرج علينا بعد 25 خساير .. وكل ثورات الخراب العربى … واللى أفرزت لنا .. أو خلينا نقول بشكل أوضح إنها كشفت لنا مجموعة من الخونة اللى تستروا تحت ظل منظمات المجتمع المدنى ، و خلف شعارات دعم الحريات .. و حولوا خيانة الأوطان لوجهة نظر ، وأقنعوا بعض المعاتيه والمغيبين فكريا بوجهة نظرهم دى ، لدرجة إن فيه ناس بتأيدهم ، وبتطلب منهم الإستمرار والمضى قدماً فى اللى هم بيعملوه … و مش واخدين بالهم .. إن التأييد اللى من النوع ده دايما بيكون من نصيب أو من فعل الأغبياء المضحوك عليهم …. لكن الأموال ، والمكافئات ، وأرصدة البنوك ، والسفر ، والفسح ، وقضاء أوقات ممتعة فى الفنادق فى كل حتة فى العالم ، بتكون من نصيب التانيين اللى هم بيأيدوهم بغبائهم على حساب بقاء أوطانهم.
بقالنا 8 سنوات بجد بــ نبحث بين كل الأيقونات اللى تصدروا المشهد فى 2011 وما بعدها ، عن إسم واحد …. إسم واحد فقط … من بين كل هذه الرموز والأيقونات … إسم واحد بس ماطلعش شمال !! … وللأسف مالقيناش حتى مجرد اسم أو شخص واحد فيهم عدل .. بجد شئ مخجل فعلا إن كل متصدرى المشهد تحت دعاوى الثورة “المجيدة” زى ما بيقولوا ، سواء فى مصر أو فى الدول الأخرى اللى أصابتها لعنة مؤامرة الخراب العربى ، ماطلعش فيهم حد من غير أجندة خارجية أو مصلحة شخصية !
توكل كرمان اليمنية اللى بتهاجم مصر طول الوقت ، وبتهاجم رئيس مصر أناء الليل وأطراف النهار ، طلعت بمنتهى الصفاقة من سنتين من مقر إقامتها فى تركيا ، وقالت إنها فخورة بنجاح الثورة اليمنية … قالت كدة بعد ما بلدها وقعت وخربت ، و ملايين اليمنيين إتشردوا … وهى عايشة منعمة برة اليمن ، وحصلت على الجنسية التركية ، والنهاردة كل اللى مشيوا وراها وصدقوها ، بيلعنوها .. و هى مش فارق معاها لأنها خلاص أدت مهمتها بنجاح ….. ونفس الكلام ينطبق على نشطاء الغبرة وأيقونات الثورة فى سوريا .. اللى ساهموا فى خرابها ، وتشريد شعبها بإسم الثورة السورية .. والنهاردة كلهم برة سوريا وسايبينها تخرب … والجولان تضيع … وكمان لسة عندهم القدر من الصفاقة اللى يهاجموا بيها مصر ويقولوا “الجولان بتضيع ، طب هى فين مسافة السكة !!؟؟”
شوية الأيقونات ونشطاء الغبرة وخونة الأوطان اللى عندنا من عينة خالد أبو النجا وعمرو واكد وخالد على وممدوح حمزة ووائل غنيم وغيرهم وغيرهم أسماء كثيرة يضيق المقال بحصرهم ، ومن خلفهم جماعة الإخوان بكامل اعضائها … كل دول هدفهم الوحيد هو إيصال مصر لنموذج الدولة الفاشلة اللى إحنا شايفينه حوالينا .. واللى إحنا إتكلمنا عليه قبل كدة ونشرنا فيديو تفصيلى عن مصطلح الدولة الفاشلة :- حروب الجيل الرابع وإقامة الدولة الفاشلة:
هم شايفين إن الثورة فى تونس وسوريا وليبيا واليمن نجحت .. لكن فى مصر الثورة فشلت .. ومازالوا بــ يسعوا لإنجاح ثورتهم فى مصر زى ما نجحت من وجهة نظرهم فى الدول الأخرى …. وإحنا بنقول لهم جملة واحدة فقط ….
“عشـم إبــلـيـس فى جــنـة الرحــمــن .. يا خــونـة الأوطــان”
و ربنا يحفظ مصرنا الحبيبة من كل شر