07 Apr 2019
رجل الأمن .. نقطة ومن اول السطر
———————————-
النهاردة فى الفجر استشهد الرائد ماجد عبد الرازق معاون مباحث قسم النزهة وهو بيقوم بدوره في تأمين المنطقة .. بعد ما اشتبه في عربية سوداء ، راكنة على جنب .. ولما قرب منها نزل اتنين فرغوا فيه الرصاص واصيب احد افراد التأمين …
البطل رحمة الله عليه .. إستشهد وترك خلفه إبنته الرضيعة عمرها 28 يوم …. 🙁
رجل الأمن سواء كان شرطة أو جيش ، هو فى النهاية إنسان .. له بيت وأسرة ، وعنده مشاكل شخصية ، وتحديات إجتماعية .. لكن أصعب تحدى بيواجهه رجال الأمن ، هو التحدى النفسى والضغط العصبى وإحساسهم إن ابسط حاجة بيراهنوا عليها و كل واحد فيهم نازل من بيته الصبح ، هى “حياته” اللى ممكن جداً يخسرها فى لحظة .. وما يترتب عليها من أم ثكلى ، وزوجة مترملة ، وأبناء أيتام .. زى الواقعة دى ، و زى ما شوفنا نماذج كتيرة على مدار السنين اللى فاتت !!
الفيديو ده .. زى ما ورد على لسان بطل العمل .. بيوصف بالضبط إحساس ضابط الأمن الشريف اللى بيواجه الخطر ليل ونهار .. فى الوقت اللى فيه ناس مش حاسّين باللى هو بيواجهه من مخاطر .. ومش كدة وبس .. لكن كمان بيتهاجم ، وبيتشتم ليل ونهار على الفيسبوك والسوشيال ميديا .. ويمكن كمان جوة بيته … فى الوقت اللى هو مافيش قدامه غير أنه يكمل فى سكته ، ويحط روحه على كفه علشان البلد دى تفضل واقفة على رجليها
– هو كل عيل قاعد تحت البطانية ، كتب كلمتين على الفيسبوك يبقى عنده وجهة نظر !!؟؟
– الضباط مرميين فى الشارع ليل نهار .. وكل يوم بيموت منهم شوية
– إنتو بس بتتكلموا علشان مش فاهمين حاجة
– مش فاهمين يعنى إييه تقف طول الليل فى عز الظلمة مستنى رصاصة تجيلك .. وبرضوا بتروح شغلك تانى يوم وسايبها على الله !!
– مش فاهمين يعنى إييه بتفتش عربية مستنى تنفجر فيك فى أى ثانية ومايلحقوش حتى يلموا جتتك !!
– مش فاهمين يعنى إييه صاحبك ودفعتك يموت قدامك ، وبينك وبين الموت خطوة واحدة !!
– مش فاهمين يعنى إييه يطلع عين أهلك علشان تمسك مجرم وييجى واحد بتليفون يطلعه برة !! .. أو محامى بتلاتة صاغ يطلعلك ثغرة فى القانون ويبوظلك كل اللى انت عملته !!
– مش فاهمين يعنى إييه الدنيا كلها واقفة قدامك علشان تتطلعك وحش !!
– بس على فكرة .. الناس برضوا كلامها صح .. بس مش فى الحياة اللى إحنا عايشينها !!!!!
الفيديو ده إهداء لروح كل شهيد ضحى بنفسه علشان بلده تعيش !