19 Apr 2019
الإستفتاء على التعديلات الدستورية فى كلمتين !!
———————————————–
طبعا كلنا عارفين إن الإستفتاء على التعديلات الدستورية بدأ النهاردة بالنسبة لأبناء مصر العاملين بالخارج ، و هــ يستمر لمدة 3 ايام .. و هــ يبدأ بكرة بإذن الله بالنسبة للمصرين فى الداخل … و طبعا مافيش حد من المهتمين بالشأن المصرى داخلياً أو خارجياً ، سواء كانت قناة فضائية أو موقع إخبارى ، أو صفحة فيسبوكية ، أو حساب على تويتر ، أو خبير إستراتيجى من إياهم ، إلا وكلهم أدلوا بدلوهم فى الموضوع …… وكلهم بيشرحوا المواد الدستورية المعدلة أو المضافة ، من منطلق التوجه اللى كل واحد فيهم منتمى له ….
وللأسف الشديد إن فيه بعض الناس أصبحت متشوشرة .. لأن معظم اللى قولنا عليهم ، بيشرحوا مواد الدستور من منطلق قانونى ، وتأثيرها القانونى والتشريعى على الحالة السياسية فى مصر .. وإحنا كشعب أو خلينا نقول كثير مننا مش بيفهموا فى القانون أوى … يعنى ناس بتقول إن المواد دى ماحصلتش ، و هــ تنقل مصر إلى خارج المجرة الكونية .. وناس بــ تشيطن التعديلات ، و بــ تصور الموضوع على إنه كارثة تشريعية ، هــ تودى مصر فى داهية ، و هــ ترجعنا للخلف بتاع تريليون سنة ضوئية !
طب أنا كمواطن فهمى على قدى .. وماليش فى القانون .. و فى نفس الوقت بحب بلدى وخايف عليها ومش عايز أضيّع المكتسبات اللى حققناها لحد دلوقتى ، ولسة اللى جاى كمان أفضل بكثير بإذن الله .. أعمل إييه !!؟؟ .. أخد قرارى إزاى !؟ … بسيطة خالص .. إحنا مش هــ نقول بص حواليك فى دول العالم بلا إستثناء ، وشوف الدساتير إتعدلت كام مرة فى أعتى الدول الديموقراطية فى الكام سنة اللى فاتوا .. ولا هــ نقول لك ، بص لكبرى ديموقراطيات العالم وكثير من الدول المتقدمة وشوف الحكام بتوعها بقالهم كام سنة بيحكموا ، و لسة فاضل لهم كام سنة .. مع إن الكلام ده مهم جداً إنك تعرفه علشان تعرف حجم الكذب والتدليس اللى بــ يتم ممارسته على المصريين ….. لكن إحنا هــ نقولكم حاجة تانية خالص …. من الأخر كدة .. خلّوا بوصلتكم مع مصر … يعنى شوف اللى بيكره مصر وأعدائها عايزين إييه ، و إييه اللى بــ يستميتوا عليه ، وإعمل عكسه تماما وإنت مطمئن 🙂
الشئ المضحك .. إن كل اللى كان بيهاجم الدستور ، وبيقول عليه دستور العسكر ، وبــ يرسخ للديكتاتورية … وكلهم قاطعوا التصويت على الدستور المرة اللى فاتت ، وقالوا لا دستور تحت حكم العسكر .. هم هم نفس الناس بذات نفس الوشوش اللى بتدافع عن الدستور النهاردة بــ إستماتة ، وبتقول لا للتعديلات الدستورية ، والدستور خط أحمر ..، .. و ده لييه !!؟؟ .. لأن الناس دى عمرها ما كانت مع مصر .. هم مجرد حالة مرضية يرثى لها … أو فريق من الزومبى فاقدى الأهلية والوطنية .. لدرجة إنهم بيرفضوا ويقبلوا نفس الشئ لمجرد إنهم يبقوا كتلة معطلة ، مش بتحركهم غير المكيافيلية السياسية فى اجلى صورها بغض النظر عن المصلحة الوطنية !! .. ناس مابتعملش حاجة غير إنها تبقى ضد مصلحة مصر .. وفى نفس الوقت تلاقيهم على طول رافعين شعارات حب مصر !
يعنى من الأخر … شوف الإخوان ، و الكولّجية ، ونشطاء الغبرة ، وقطر ، وتركيا ، وقنوات الجزيرة ، و الــ بي بي سي ، والــ سي إن إن ، ومونت كارلو ، و دوتشى فيلله ، والصفحات والحسابات المشمومة على الفيسبوك وتويتر اللى بــ تفوح منها رائحة الضانى ، وحمدين صباحى ، وخالد على ، وعصام حجى ، ومعتز مطر ، ومحمد ناصر ، وعمرو واكد ، وخالد ابو النجا وليليان داوود ووائل غنيم ، وأيمن نور …، وغيرهم من الباقة المشكلة دى من الممولين ، وهادمى الأوطان … شوف كل دوول تاريخهم إييه ، ومواقفهم السابقة إييه ، وإييه اللى هم عايزينه النهاردة وبيدعوا إلييه وتوجهم إييه ، وانت تقدر تاخد قرارك بمنتهى السهولة … يعنى فى كلمة ورد غطاها … شوف الناس دى عايزين إييه وانت تعرف على طول إن مصلحة مصر هى عكس كدة
… و التاريخ القريب هو اللى بيقول كدة !!
و بعد اللى إحنا قولناه ده ، هــ تلاقى بقى ناس عاديين طالعين يقولوا .. يعنى خلاص طالما إحنا ضد التعديلات الدستورية ، هــ تصنفونا من أعداء الوطن …. لأ يا فندم .. مش إحنا اللى صنفناك … إنت اللى صنفت نفسك كدة ، يوم ما قررت إنك تبقى فى نفس الخندق مع النماذج والأسماء والكيانات اللى إحنا ذكرناها !!!!!
لإنك لما تبقى فى نفس الصف مع الناس دى ، فــ الموضع هنا ما بقاش وجهة نظر ! 🙂
حقك الدستورى والقانونى مليون فى المائة إنك تصوت بمنتهى الحرية ، وتقول “نعم” أو “لأ” .. من غير أى إملاءات .. و ده صحيح .. بس وانت بتحط صوتك فى الصندوق بمقتضى الحرية اللى كفلها لك السدتور والقانون ، إفتكر إن صوتك أمانة ، وإنك لازم تكون عارف كويس صوتك ده هــ يصب فى مصلحة مين .. مصلحة مصر ، وإلا مصلحة أعداء مصر
المشهد النهاردة كان مبهج فى السفارات المصرية ، وفيه صناديق إمتلأت عن اخرها .. يعنى المصريين حاسيين بالمسئولية .. بغض النظر مين هــ يقول نعم و مين هــ يقول لأ …
وإحنا هنا هــ نقول #نعم_للتعديلات_الدستورية
إعرف قيمتك وقيمة بلدك .. علشان تقدر تفهم ، اللى بيحصل معاك ، و حواليك.