24 Apr 2019
بيان الإخوان بيقولك شكراً .. !!
——————————-
اللى إحنا قلناه وحذرنا منه …
المكتب العام لجماعة الإخوان يقدم تحية إعزاز وتقدير لكل اللى قالوا “لأ” للتعديلات الدستورية …
بتقولوا مين !!!!؟؟؟ ….
أيوة … الإخوان المجرمين …
و ده لينك البيان من على الموقع الرسمى بتاعهم
هو ده اللى إحنا إتكلمنا فيه مع بداية اول يوم من الإستفتاء على التعديلات الدستورية … و قولنا بلاش تحط نفسك فى خانة واحدة مع أعداء البلد … وللأسف فيه ناس زعلت ، وإتهمتنا بالمبالغة ، وبعدم الموضوعية ، وبقلب الحقائق … و طبعا التطبيل للدولة …. لكن ده مازعلناش .. بالعكس .. إحنا شايفين طريقنا كويس ومكملين .. وشايفين الهدف السمى اللى بتسعى له البلد .. مهما كانت الأخطاء أو التجاوزات أو الخطايا .. سميها زى ما تسميها .. لأن المدينة الفاضلة مش موجودة غير فى عقول الحالمين فقط …. حتى فى زمن الرسالات والأنبياء والخلفاء الراشدين كان فيه خطايا وأخطاء .. ماكانتش أبدا مدينة فاضلة … المهم بس غنك تشوف الصورة كويس ..
و هــ نقولها تانى .. إحنا ماصنقّناش حد … إنت اللى صنفت نفسك بنفسك … إنت اللى حطيت نفسك فى نفس الخانة مع اعداء وطنك .. أيّا كانت وجهة نظرك أو منظورك الشخصى وتقييمك للصح والخطأ .. فى النهاية إنت وقفت صف واحد مع الإخوان اللى قالوا طز فى مصر … اللى قالوا إن الوطن حفنة من التراب العفن … إنت اللى وقفت صف واحد مع النشطاء والكولجية اللى حرقوا مصر وأسقطوا مؤسسات الدولة ومازالوا بيحاولوا .. إنت اللى وقفت فى نفس الخندق اللى فيه قطر ، وتركيا ، وقنوات الجزيرة ، و الــ بي بي سي ، والــ سي إن إن ، ومونت كارلو ، و دوتشى فيلله ، والصفحات والحسابات المشمومة على الفيسبوك وتويتر اللى بــ تفوح منها رائحة الضانى …، وقفت مع حمدين صباحى ، وخالد على ، وعصام حجى ، ومعتز مطر ، ومحمد ناصر ، وعمرو واكد ، وخالد ابو النجا وليليان داوود ووائل غنيم ، وأيمن نور …، وغيرهم وغيرهم من الباقة المشكلة دى من الممولين ، وهادمى الأوطان ، اللى مايهمهمش إلا مصلحتهم وبس حتى ولو كانت على حساب بلدنا مصر …
حقك الدستورى والقانونى مليون فى المائة إنك تصوت بمنتهى الحرية ، وتقول ده عاجبنى و ده مش عاجبنى .. و من غير أى إملاءات من أى حد .. بس كان لازم وإنت بتستخدم حقك ده .. إنك تبقى فاهم ، إن مصلحتك ومصلحة بلدك ، مش ممكن تتفق بأى شكل من الأشكال مع مصلحة أعدائك وأعداء بلدك …
المكتب العام لجماعة الإخوان بــ يقدملك تحية إعزاز وتقدير … علشان تبقى وسام على صدرك تفتخر بيه ….. وعلشان تفتكرهم بالخير …. بس على فكرة … إدعاء المثالية وإرتداء ثوب الحيادية عمرها ما هــ تخلى أعدائك يقولوا عليك شاطر وكيوت .. و ياسلااااااام .. شوف الناس دى كويسين قد إييه .. أبداً … إنت هــ تفضل فى نظرهم مطبلاتى ومن عبيد البيادة ومؤيد لحكم العسكر و… و ألخ .. ألخ .. الخ .. من الصفات اللى بيوصفوا بيها كل مؤيدى الدولة.
هدفنا من الكلام ده مش إننا نتهم أو نخوّن … لكننا بنلفت النظر علشان إحنا أصلنا بننسى بسرعة …. و مش مطلوب من أى حد إنه يدخل يعلق و يبرر موقفه ، ويفند الأسباب اللى بنى عليها تصويته بــ لأ أو حتى مقاطعته أو إبطال صوته …. لأن الإستفتاء خلص خلاص ونتيجته طلعت .. وبعد العيد مش بــ يتفتل كحك …. لكن الهدف بس إننا نلفت النظر … عارف لييه !!؟؟ …. لأن مصلحة الوطن عمرها ماكانت وجهة نظر …. وإذا ماكنتش قادر تقف مع بلدك … فــ على الأقل ماتبقاش الخنجر اللى فى ظهرها.
شكرا لكل من وقف مع بلده …
شكرا لكل شخص مقدر لمسئولياته تجاه وطنه …
شكرا لكل واحد قادر يشوف الصورة صح …
وكل إستحقاق إنتخابى وحضراتكم طيبين .. ومصر دايما بخير وأمن وامان