27 Apr 2019
مصر ومبادرة الحزام والطريق .. !!
————————————
ياريت واحدة واحدة كدة الله يكرمكوا .. وتبدأوا تجهزوا برّاد شاى بقى ، مش كباية شاى علشان الكلام اللى هــ نقوله بداية من النهاردة وعلى مدار الفترة القادمة ، محتاج شوية تركيز ، وربط الخيوط ببعضها .. لأنها مربوطة ببعضها بشكل كبير .. من أول اللى بيحصل حوالينا فى المنطقة وعلى حدودنا .. للى بيحصل فى الإقتصاد التركى .. لإرهاصات صفقة القرن .. للإستفتاء على التعديلات الدستورية فى مصر .. لإتفاقية الحزام والطريق .. لإتفاقية البريكس .. لأحداث سيرىلانكا .. لتوافق الرؤى بين مصر و باقى الرباعى العربى فى مواجهة ممولى الإرهاب .. لتحركات مصر وأدائها على مستوى القارة الأفريقية .. ألخ ألخ ألخ .. فــ ركزوا معانا الله يرضى عليكم كدة .. وساعدونا فى تشبيك الأمور ببعضها لأن الأحداث الجارية والقادمة هــ تكون فعلا أحداث مفصلية
فى البداية … الفيديو ده بيوضح إييه هى مبادرة الحزام والطريق اللى الرئيس السيسى بــ يشارك فى فعالياتها الدولية المنعقدة فى الصين ضمن أكبر تجمع إقتصادى دولى وأكبر منصة للتعاون الإقليمى ويشير إسم المبادة الى جزئين .. الجزء الأول وهو الحزام البرى الممتد من الصين إلى أوروبا …. والجزء الثانى هو الطريق ، وهو المعروف بــ طريق الحرير البحرى وهى ممرات الشحن الممتدة من المدن الساحلية الصينية إلى مدينة البندقية الإيطالية … و المبادرة دى خطة طموحة لتغطية ثلث إجمالى الناتج المحلى فى العالم
الكلام ده كنا إتكلمنا عليه من سنين مع بداية طرح فكرة حفر قناة السويس الجديدة .. التفريعة اللى مالهاش عائد إقتصادى .. وإتكلمنا عليها مع تعالى الصيحات والبكاء والعويل إن قناة السويس هــ تقفل وحركة التجارة بتتحول لطريق رأس الرجاء الصالح .. وإتكلمنا عنها مع الحديث عن محور التنمية المعروف بإسم محور الفنكوش سابقاً .. وفى كل مرة كنا بــ نفند الكلام المغلوط وبــ نوضح الحقائق والأكاذيب اللى كان بــ يتم بثها للتشويش على ما تقوم به مصر من تحرك فعلى على الأرض … واصدقائنا اللى متابعيننا من زمان فاكرين كلامنا ده !
ركزوا فى الصورة اللى وضعناها فى بداية الفيديو .. صورة رئيسك وهو واقف بيلقى كلمة أمام أكبر تجمع إقتصادى عالمى … الصورة دى تمثل مصر دلوقتى .. تمثلك إنت كمصرى .. تمثل عمل دؤوب تم على مدار السنين اللى فاتوا ، علشان نوصل النهاردة إننا نكون جزء أصيل من منصة للتعاون الدولى الإقتصادى ، هــ تخدم أكثر من 60% من سكان العالم .. و ده أبلغ رد على بتوع “مالوش برنامج” 🙂
تخيل كدة إن مصر كانت من 5 سنوات فقط مجرد دولة فاشلة على شفا الإفلاس ، تعانى من إنهيار إقتصادى ، ومن إرهاب بيضرب فى كل جنبات الدولة .. والنهاردة إنت عندك إستقرار أقتصادى ومعدل نمو من ضمن الأعلى عالمياُ .. وكمان واقف أمام العالم على منصة إقتصادية بتلقى كلمة .. لأ و مش كدة وبس .. ده كمان الرئيس السيسى بيتكلم من مركز قوة ، و بــ يضح محددات ومعايير سواء للصين أو لكل الدول المشاركة فى المبادرة عن ماهية الشراكة الإقتصادية و الإستثمار اللى يتوافق مع رؤية مصر 2030 .. زى الإرتقاء بالبنية التحتية فى مجالات النقل والطاقة وتكنولوجيا المعلومات ومشروعات ربط المرافق اللى بتتفق مع أولويات مصر التنموية … يعنى المبادرة مش علشان يحصل غزو صينى .. أو أى دولة كانت بإستثمارت إستهلاكية ، ولا علشان رجل أعمال سببوجى ييجى يبنيلك مصنع شباشب بلاستيك وفوانيس رمضان وأقلام رصاص .. لأ .. دى مصر بتضع شروط ومحددات لطبيعة الإستثمار المطلوب فى مصر .. إنطلاقاُ من أهمية مصر الإستراتيجية ووضعيتها الهامة كجز أصيل من مبادرة الحزام والطريق
بعد كل ماتم إنجازه فى مصر فى مجالات البنية التحتية من طرق وموانى ومطارات وشبكات مياه وصرف ، وكمان فى الطاقة من غاز وكهرباء ، وعملية الإصلاح الهيكلى للإقتصاد المصرى ، وتسهيل اجراءات الإستثمار . أضف إلى ذلك وضعية مصر الإقليمية والدولية ، وتصدرها لرئاسة الإتحاد الأفريقى ، والتحركات الديبلوماسية الواعية مع كل الأطراف شرقا وغرباُ .. وكمان إستقرار داخلى أثبته الإستفتاء الأخير على التعديلات الدستورية .. تدخل الأن مصر في نطاق الدول الأهم إقتصادياً في العالم كله.
الكلام ده هو اللى خلى دولة زى الصين .. العملاق الإقتصادى الحالى .. والأكبر فيما هو قادم .. إنها تقوم بضخ إستثمارات جبارة فى مصر فى العين السخنة ومحور التنمية والعاصمة الإدارية ، وأماكن وقطاعات كتيرة فى طول مصر وعرضها .. و ده هــ ياثر إيجابيا على النمو الإقتصادى فى مصر .. وعلى حركة الرواج التجارى ، و تقليل نسب البطالة اللى نزلت بالفعل من 13.4% إلى 8.9% .. بالإضافة إلى إنه هــ يساعد على رفع مستويات الدخل .. مع تنامى الحركة التجارية ، والصناعية ، و عودة السياحة لمعدلاتها الطبيعية … ألخ ألخ ألخ
و برضوا مش معنى كدة إننا هــ نقلب على سويسرا فجأة .. لأننا مازلنا عندنا التحدى الأكبر وهو ضرورة رفع معدلات الإنتاج لمجابهة الزيادة السكانية المضطردة علشان الإنتاج يغطى إحتياجاتنا ويزيد فــ نبدأ نشعر بتحسن .. لأن مافيش دولة ولا مستثمر هــ ييجى يديك فلوس فى إيدك ويسبك ويمشى .. لكن لازم يكون فيه مقابل للفلوس دى .. وعائد ربحى مجزى للمستثمر .. وبالتالى لك أنت كمواطن !
طب هل المعسكر المضاد هــ يقف يتفرج كدة وهو ساكت !!؟؟ .. سواء على الصين أو روسيا أو عليك .. من غير ما يتحرك !!؟ .. طبعا لأ .. زى ما قولنا قبل كدة إن المعركة صفرية .. والمبادرة دى معناهها إن المواجهة الإقتصادية الشاملة هــ تبدأ .. ولازم يكون لها ردود أفعال .. وطبعا مش محتاجين نقول إن أحداث سيريلانكا والجزائر والسودان والتداعيات فى الملف الإيرانى وإنسحاب واشنطن من معاهدة الصواريخ النووية متوسطة المدى المبرمة مع روسيا والصين … كل ده ليس عنها ببعيد.
إعرف قيمتك وقيمة بلدك .. علشان تقدر تفهم ، اللى بيحصل معاك ، و حواليك.
وللحديث بقية ….