15 May 2019
التصعيد فى الشرق الأوسط !!
——————————
هو إحنا مش إتفقنا من زمان إننا نحضر الفشار ونقعد نتفرج ونستمتع باللى بيحصل حوالينا .. !؟ .. وإنه إذا كانت مصر فى القلب من كل الأحداث بحكم موقعها الإقليميى والدولى سواء سياسياً أو إقتصادياً .. فــ إحنا كمصريين لازم نبقى واثقين إننا بجد قاعدين فى الرووف بنتفرج !!؟؟ … طيب قلقنا لييه بقى من حالة الهياج والتصعيد اللى إحنا شايفينها دى !!؟؟
شوفوا حضراتكم … اللى بيحصل فى منطقة الخليج .. وحالة التصعيد الكبيرة ، اللى لو نظرتم لأساسها ، هــ تلاقوها غير مبرة تماماً .. كل ده بــ يطلق عليه فى أبجديات العلاقات الدولية مايسمى بــ “سياسة حافة الهاوية” … يعنى إييه سياسة حافة الهاوية !؟ … يعنى دفع الأمور والأحداث لحالة من الفوران وصولا إلى الحافة ، اللى لو تطورت الأمور بعدها ، تخلى الدنيا تولع … لكن الأمور عمرها ما بتوصل للمرحلة دى .. لييه !!؟ .. لأن مش هو ده الهدف … وخصوصاً فى الزمن أو طبيعة المرحلة اللى بــ يمر بيها العالم دلوقتى .. لأن أى حرب حقيقية ومعلنة .. هــ تدخل فيها أطراف كتيرة .. مع تشابك المصالح السياسية والإقتصادية بين كل دول العالم … ولو الدنيا ولعت فجأة .. مافيش حد هــ يبقى كسبان .. و أول الخاسرين هــ يكونوا هم من أشعلوها
مثال على سياسة حافة الهاوية .. كانت فى سوريا مع بدأ التدخل الروسى .. وتلويح كل الأطراف بالحرب .. وإعلان روسيا إنها جاهزة لحرب عالمية ثالثة فى مواجهة أميريكا .. و رد أوباما وقتها بزيادة التصعيد ، وإرسال الأسطول السادس الأميريكى للبحر المتوسط .. وبدأ العالم كل يترقب .. والصحف العالمية تكتب .. وكل المصادر تغذى حالة الإستعداء والإستعداد للحرب الكبرى .. وفجأة .. فسسسسسسسسس … وكل ده نزل على مافيش .. وقعدوا مع بعض ، وتبادلوا الكروت اللى فى إيديهم و كل طرف إستخدم الكروت دى فيما يتماشى مع مصالحه
مثال أخر على سياسة حافة الهاوية .. كانت حالة التصعيد ضد بيونج يانج .. وتهديد كوريا الشمالية بإستخدام الصواريخ النووية ضد أميريكا .. وتهديد ترامب بإن لو ده حصل ، أميريكا هــ تولع فى كوريا الشمالية بالكامل .. و فضل التريند يتصاعد .. والعالم كله فى حالة ترقب .. وكل المواقع الإخبارية والخبراء بــ يتكلموا عن نتائج الحرب وتداعياتها .. وفجأة … فسسسسسسسسسس …. و “ترامب” قعد مع “كيم جونج أون” .. وضحكوا .. وكل واحد باس التانى من بقه .. وخلص الموضوع …
طب إييه الهدف من سياسة حافة الهاوية دى !؟ … الأسباب كتيرة … فرض إرادات .. تفعيل كروت ضغط .. إثبات وجود .. تشغيل شركات سلاح علشان السبوبة تشتغل .. إبتزاز إقتصادى لبعض الدول .. إبتزاز سياسى لدول أو لتنظيمات أو حتى جماعات .. إعادة إنتشار للقوات فى المحيط الإقليمى أو الدولى … رسائل ساسية للداخل والخارج .. ألخ ألخ ألخ
طب نرجع تانى لقصة الخليج وأميريكا وإيران .. هــ نلاقى إن كل اللى بيحصل ده هو سياسة حافة الهاوية .. و
لازم نبقى فاهمين إن العلاقة بين أميريكا وإيران .. زى العلاقة كدة بين إسرائيل وحماس … وأهمية حماس بالنسبة لإسرائيل مهما كانت حالة العداء المعلنة .. هى نفس أهمية إيران بالنسبة للولايات المتحدة الأميريكية ، مهما كانت حالة العداء والتراشق المعلن اللى قد يصل إلى حد التحدى السافر .. لكنه بعد كدة بــ ينزل على مافيش ….. ماهو أصل مش معقولة يعنى الحرس الثورى الإيرانى المصنف كتنظيم إرهابى ، قاعد فى قطر كتف بكتف جنب “قاعدة العديد” أكبر قاعدة أميريكية فى الشرق الأوسط .. وتقوللى أميريكا هــ تدخل فى حرب مع إيران .. زى بالضبط لما أردوغان يطلع يعمل فيها إنه بــ يلطش فى أميريكا .. و هو دولته أصلا منقوصة السيادة على إيدين قاعدة إنجرليك اللى فيها أكبر قوات أميريكية فى المنطقة بعد قاعدة العديد القطرية ..
ياعم قول يا باسط … الناس دى بس عمالة ترفّس ، وبتحاول توجد لنفسها موطئ قدم قبل ما دورهم ينتهى .. وبعد ما نشوف ونسمع ونعرف تفاصيل صفقة القرن اللى مصر معصلجة فيها ومأخرة ظهورها للنور من شهر مارس اللى فات لحد بعد رمضان .. (و ده هــ يبقى له حديث قادم بإذن الله)
و أهو ترامب طلع وقال بعضمة لسانه إن كل ما يتم بثه من أخبار عن نية أميريكا حشد 120 ألف جندى فى الخليج ، كلام مش مظبوط وعارى تماما عن الصحة .. وطلعت إيران وقالت إنها تستبعد حدوث أى مواجهة مع الولايات المتحدة الأميريكية .. و واحدة واحدة الموضوع هــ يهدى .. وهــ يبقى ذكريات .. وحتى لو الموضوع تطور .. فــ سيتطور فى إطار ضربة عسكرية محدودة حفظا لماء الوجه .. و … وفقط … نفس سيناريو إسرائيل/حماس بالضبط .. و دمتم
إرفع راسك .. وإعرف قيمتك وقيمة مصر .. وإفخر ببلدك .. علشان تقدر تفهم ، اللى بيحصل معاك ، و حواليك.