17 Jun 2019
مرسى مش راجع …. !!!
————————–
إمسك نفسك بس وفكر شوية قبل ما تدخل تزايد علينا دينياً ووطنياً … فلست أكثر منّا إيماناً ولست اكثر منّا وطنية … بلاش نغمة الصعبانيات والكربلائيات ، واللهم لا شماتة … وكل الديباجات المحفوظة دى …. الموت قدر … و كل حيٍّ هيموت !!
محمد مرسى مات موتة عظيمة مشرفة … مات وهو بيتحاكم فى قضية تخابر على دولته … مات و هو متهم فى قضية تجسس ضد بلده اللى إتولد وإتربى فيها و أكل من خيرها ، وفى الأخر راح يدى ولائه بإختياره لجماعة تنظيمية مجرمة ، ولتنظيم دولى ساهم فى تدمير دول وتشويه دين بأكمله ، ولدولة ترعى الإرهاب وساهمت فى دمار معظم دول المنطقة … ولدولة تصنع الإرهاب وتصدره
محمد مرسى مات وهو شايل على صدره لقب مافيش حد شاله قبل منه !!
لقب … “اول جــاســــوس مــدنـى مــنـتـخـــب” 😉
أى حد عايز يزايد ، ويتشحتف ، والدمعة تفر من عينيه … أى حد عايز يرتدى ثوب الواعظ المؤمن المتحفظ التقى .. ياريت بس يفتكر شهداء الإتحادية … يفتكر مؤامرة فتح السجون فى مصر .. يفتكر دم المصريين اللى سال فى كل مكان على إيديين جماعة الإرهاب اللى هو بــ يمثلها .. واللى قال عليهم اهلى وعشيرتى .. يفتكر كل المجرمين والإرهابيين اللى أفرج عنهم من السجون علشان يعيثوا فى الأرض فساداً … يفتكر شهداء الشرطة والجيش … يفتكر كل طفل إتيتم .. وكل زوجة إترملت .. وكل أم ثكلى فقدت إبنها فى عمر الزهور .. وكل أب بكى بحرقة على فلذة كبده اللى إستشهد علشان إحنا كلنا نعيش
أى حد إخوانى .. أو مركوب إخوانياً .. أو مش إخوان بس بيحترمهم ، يفكر يزايد عليك ويقولك حرام عليك .. لا شماتة فى الموت .. فكره بكلام عصام العريان ايقونة الجماعة لما قال “مبارك مش هــ يخرج من السجن إلا على قبره” .. فكره برقص الجماعة وتهليلهم لموت القذافى .. فكرهم بسجودهم شكر لله على منصة رابعة لما جاتلهم شائعة وفاة بشار الأسد … فكرهم بكل بنت إنتهك عرضها وتم التحرش بيها لما طلع شيوخهم فى الفضائيات يقولوا “وهى إييه اللى وداها هناك” …. فكرهم ونكد عليه .. و المواقف كتير ماتعدش .. بس إحنا بننسى .. وأى حد من المتلونين أو من اللى بوصلتهم فاسدة يقولك بلاش شماتة .. قول له ياريت بس تفتكر كلامك ده يوم وفاة السيسى او أى حد مصرى وطنى مخلص شريف … علشان كلامك ساعتها هــ يتغير تماما !
إحنا عمرنا ما هــ نتعاطف ابدا مع اللى خان واللى قتل واللى ساعد اللى قتل واللى خطط لدمار البلد وهدم الجيش ومؤسسات الدولة .. وطالب بالحفاظ على أرواح الخاطفين والمخطوفين علشان طبعا كان عارف إن الخاطفين دوول من جماعته !!
قبل ما تتعاطف مع محمد مرسى ، ياريت بس تتعاطف مع اللى إستشهدوا لحماية الوطن ده .. إفتكر شهداء الشرطة والجيش وكل المدنيين اللى إستشهدوا بسبب جماعة الشر دى وإدعى لهم بالرحمة … لأن دمائهم دى هى اللى حفظت الوطن بعد فضل الله علينا من الدمار
الحسنة الوحيدة اللى عملها محمد مرسى (و ده من رحمة ربنا ببلدنا ، ونصرته ليها) .. هو إن اللى حصل ده ، وفر على مصر قرار تنفيذ حكم الإعدام .. واللى كدة كدة كان هــ يتنفذ بعد إنتهاء كامل إجراءات التقاضى وتأكيد الأحكام فى كل القضايا المنسوبة إليه !
وتطبيقا للمبدأ القائل ان “الفئران لا تستطيع مقاومة الجبن” … فــ اللى حصل ده .. هــ يكشف الأقنعة عن ناس كتيرة أوى .. وعن شخصيات كنتم بتثقوا فيها أوى .. وعن صفحات كتيرة أوى .. كنتم بــ تتابعوها على مواقع التواصل منها صفحات الشّعر والكوميكس والطبخ والأغانى … كلها صفحات خرفانية بإمتياز .. مش بتظهر غير فى أوقات محددة .. و بــ تبان على حقيقتها .. ومع ذلك لسة بــ تتابعوها وتشيروا منها !! … و ده طبعا غير الخلايا النائمة الموجودة على الصفحات الوطنية … ده وقتهم 🙂 🙂
سيبكم من اى ولولة ، و محن ، و كربلائيات … لأن صناعة المظلومية والمحن السياسى والكربلائية الدينية هى صناعة إخواية بإمتياز … وأى حد يعيش فى الدور عليكم ، إعرفوا على طول إنه يا إما إخوان … يا إما راضع منهم نفس فكرهم المريض !
الخلاصة .. وعلشان نجيب من الأخر
مرسى مش راجع ..
مرسى مات …
وعليه من الله ما يستحق ……
و مصر هى الباقية رغم انف أعدائها ……
ملحوظة:
علشان بس اصدقائنا اللى إتلخبطوا بسبب مقالاتنا الأخيرة عن السرقة الأليكترونية … لازم نوضح شئ مهم جدا للجميع … إن الشير من على الصفحة مش ممنوع .. بل بالعكس ده مطلوب جداً .. وياريت كل اصدقائنا تشير المقالات ، طالما شير مباشر من الصفحة .. لكن إحنا كلامنا كله عن الحرامية اللى بتسرق المقالات وتحطها على صفحتها وتنسبها لنفسها …
شيرّوا زى مانتم عايزين .. هــ نكون شاكرين لكم جداً … وبنطلب من كل الأصدقاء (فضلاً وليس أمراً) ، إن أى حد يلاقى مقال لنا موجود على صفحة تانية أو حتى اكونت شخصى ، ويلاقيه مش شيير ، أو مافيهوش إشارة لصفحتنا كمصدر ، إنه يبعتلنا لينك المقال المسروق ، علشان ندخل نشيله من عنده ، زى ما شيلنا مقالنا عن قانون الجنسية المصرية الجديد من على صفحة الحرامى اللى كان سارقه 😉 🙂
تحياتنا للجميع