18 Jun 2019
كُهن السّيد مُحنْ … والحقيقة بلا رتوش !!
—————————————–
ياترى إزاااااااىّ الحاااااال النهاردة !!!؟؟؟ … أخبار متابعة صفحات وأكونتات السوشيال ميديا من إمبارح للنهاردة إييييييه !!!؟؟ …. جالكم كلامنا !؟ 🙂 … شئ ممتع مش كدة !!؟؟ … مش قولنا لحضراتكم إن “الفئران لا تستطيع مقاومة الجبن” … وإن ناس كتييييير وصفحات كتييييير وأكونتات كتييييير هتتكشف على حقيقتها بعد اللى حصل !! 🙃
السوشيال ميديا لعبة إخوانية بإمتياز .. و الصفحات اللى كلنا متابعينها ، واللى ظاهرها أنشطة متعدد ومختلفة ومالهاش دعوة بالسياسة خالص … للأسف الشديد معظمها بــ يدار عن طريق الذباب الأليكترونى الإخوانى …. وكلهم بيخدموا على بعض، … لكن بيظهروا فى أوقات محددة علشان تكتشف قد إييه انت كنت مخدوع ، وكنت بتساهم فى نشرهم وتوسيع قاعدتهم الجماهيرية من غير ماتاخد بالك ..
يعنى معظم صفحات الكوميكسات إخوانية ، من أول عائلة صفحات “الكومنت ال… مش عارف إييه” .. لحد الضفدع كيرمت اللى متابعها 7 مليون شخص .. وكوميكساتها منتشرة بشكل كبير بيننا … و هى كلها كوميكسات السم فى العسل ، وبتشتغل على تكدير السلم المجتمعى عن طريق نشر الإحباطات فى شكل تريقة وكوميكسات .. وكمان بوستات التلقيح اللى الكل بيستعملها علشان يلقح بيها على حد معين أو حتى مجموعة ناس أو صحاب أو قرايب .. الخ الخ … كل دى حاجات مدروسة .. ولها هدف خبيث .. وياما حذرنا منها …. إمبارح بقى هتلاقى على الصفحة دى مناحة على مرسى .. و وعظ وتشكيك حتى فى 30 يونيو فى شكل كوميكسات متتالية … ويحسسك إن مصر كلها بتبكى على محمد مرسى !!
فى مقالنا إمبارح ، إحنا ماعملناش أى توجيه لأى حد عن أى صفحات بعينها .. لكن عملنا تنويه فقط .. و سيبنا حضراتكم تكتشفوا بنفسكم .. وإنتم اللى بعتوا وقلتم اللى شفتوه بنفسكم 🙂… وقيس على كدة بقى كتير من صفحات الطبيخ ، والشعر ، وأخبار الكورة ، و محبى فلان وفلان من المشاهير .. وصفحات مستعارة بأسماء فنانين … وصفحات أطباء مش عارف إييه ، وإئتلاف رجال إييه .. و الجالية المصرية مش عارف فين وفين .. ومعظم صفحات نوستالجيا الذكريات اللى طول الوقت بتترحم على اسفلت الزمن الجميل اللى طبعا كان من قبل 1952 ….. ده حتى يا مؤمن صفحات الرقص طلعت بتاعتهم ، وصفحة منهم إتفضحت إمبارح وبعد ما كتبوا نعى ورثاء عن المرحوم .. و شالوه بعد فضيحتهم
المهم إن الإقبال على الــ “Un Follow” على الصفحات دى كان تاريخى يافندم … وكثير من الصفحات الوطنية طهرت نفسها من الخلايا النايمة المعششة فى أركان الصفحة …. وإحنا كمان عملنا شوية بلوك حلوين أوى ياحسن (بصوت عادل إمام فى مرجان احمد مرجان) 🙂🙂
و طبعا أكيد مش لازم ننسى المناضلين الكبار من نخبة مصر اللى هم أساساً سبب نكبة مصر ، وبعض المشاهير من الفنانين والصحفيين اللى طلعوا يتباكوا على أول جاسوس مدنى منتخب …. والمصريين دخلوا على حساباتهم الشخصية وقاموا بالواجب وسمعوهم اللى كان لازم يسمعوه بالفعل .
نيجى بقى للشق الثانى ، و هم أصحابنا أعضاء جمعية عاطف المتعاطف ، اللى كلهم فجأة إرتدوا ثوب الواعظين .. وكلهم ما شاء الله جناحاتهم البيضا كانت بترفرف فى كل حتة ، … وتسمع بقى ديباجات .. “انا مش إخوان بس أنا إنسان” … نفس طقطوقة “أنا مش إخوان بس باحترمهم” … مع إختلاف الإستعمال حسب الزمان والمكان ….. أيوة يافندم … إحنا مصدقينك إنك مش إخوان … بس إنت بتقول وتعمل نفس اللى هم عايزينك تقوله وتعمله … وإنت زى مانت مش إخوان … هم مش عايزينك غير إنك تبقى كدة !! .. إمّعة … و بوصلتك الوطنية بايظة … مالكش أى موقف واضح … و بــ يخدرك بشوية حقن مسكنات دينية ..
و طبعا ناهينا عن المزايدات الدينية … وناس بتردد كلام مش فاهمين معناه ولا عارفين مصدره .. ولا فاهمين هل هو صحيح وإلا لأ … زى اللى داخل يقول لنا إن الرسول قال فى الحديث الشريف “اذكروا محاسن موتاكم” … ياسلام … وجبتها منين دى بقى يافندم !!؟؟؟ … ده مش حديث اصلا .. ولا ورد عن رسول الله صلى الله عليه وسلم
عايز تعرف تعرف الحديث اللى صح عن الرسول
عن أنس رَضِيَ اللَّهُ عَنهُ قال: مروا بجنازة فأثنوا عليها خيراً فقال النبي ﷺ: (وجبت) ثم مروا بأخرى فأثنوا عليها شراً فقال النبي ﷺ: (وجبت) فقال عمر بن الخطاب رَضِيَ اللَّهُ عَنهُ: ما وجبت قال: (هذا أثنيتم عليه خيراً فوجبت له الجنة، وهذا أثنيتم عليه شراً فوجبت له النار؛ أنتم شهداء اللَّه في الأرض)
الرسول محمد صلى الله عليه وسلم ، ماعملش بقى زى النحانيح وقال للصحابة بلاش يا كماحة تتكلموا وحش على الكيوت اللى مات .. علشان ماتجوزش عليه إلا الرحمة … بالعكس .. ده قال لهم هو فى النار علشان بتقولوا عليه كدة
الرسول وقف أمام قتلى المشركين في بدر وناداهم بالاسم وقال لهم هل وجدتم ما وعدكم ربكم حقاً … هتقوللى لأ دول مشركين .. هــ اقول أوكى …. طب ماهو الرسول قال لسيدنا على بن ابى طالب إن اشقى الأخرين هو اللى هيقتلك .. والحديث معروف .. واللى قتل سيدنا على بن ابى طالب بعد كدة كان مسلم … فــ بالمنطق المغلوط بتاع البعض فى موضوع ماتجوزش عليه إلا الرحمة … يبقى اللى قتلوا سيدنا عثمان لازم نترحم عليهم علشان ماتجوزش عليهم إلا الرحمة .. واللى قتل سيدنا على بن ابى طالب لازم نترحم عليه علشان ماتجوزش عليهم إلا الرحمة … والدواعش اللى قتلوا وحرقوا وإغتصبوا وشردوا الملايين من البشر … ماتجوزش عليهم إلا الرحمة .. وحبارة ماتجوزش عليه الا الرحمة … والإخوانية اللى شرّبت الضباط مية نار وهم عطشانين ماتجوزش عليها إلا الرحمة … الخ ألخ الخ
من الأخر … لما مجرم أو إرهابى يقتل إبن حضرتك لا قدر الله .. أو يقتل أى حد عزيز عليك .. وبعدين يتمسك ويتعدم .. إبقى ماتنساش تترحم على القاتل وتقول لا تجوز عليه إلا الرحمة … هتقوللى مرسى ما قتلش حد .. هاقول لك برضوا وماله … ماهو اصل مرسى ده ماكانش عضو فى حضانة زينهم … ده كان عضو مكتب الإرشاد فى جماعة إرهابية .. يعنى داخل مع الجماعة الإرهابية إنتظام .. مش إنتساب حضرتك !!!!!
والناس اللى بتقول لا شماتة فى الموت … فــ كلامنا فى مقال إمبارح ماكانش فيه أى شماتة … لكن كمان ماينفعش ناخد القضايا المصيرية فى حياتنا بمياعة … لأن التذكير بالتاريخ لا يعنى الشماته … الا اذا كان المطلوب هو ان تُمحى جرائم مرسى وجماعته من الذاكرة.
احنا بنحارب فكر عفن …. و فجر في الخصومة و تأللى على الله …. كان من نتيجته كلمته المشهوره “دونها الرقاب” .. واللى قالها كل شيوخهم ومفتيين الدم عندهم … و اللى انتجت 5000 شهيد و 20 ألف مصاب … و 25 الف اسرة فقدت عائلها او فقدت قدرتها على الكسب … اقتصاد إتدمر .. و ملايين الناس بيوتها اتخربت … عشرات الكنائس تم تفجيرها بمن فيها … و 320 شهيد تم ذبحهم في ربع ساعة بدم بارد في صلاة الجمعة في العريش .. و مع كل شهيد كنا نرى الشماتة و التوعد …، و يقولولك إن الشماتة دى سنّه نبوية و فرض على كل مسلم عشان يصح دينه !!! 😞🙄
شوفنا جهاد النكاح و استباحة الاعراض و الاموال … و غيرها من الظلم البيّن للانسانية … و كان كل لقب لشهيد او متوفي مصرى يطلقون عليه المجحوم و الكلب و الفطيس …. و اخرتها .. نلاقى ناس بتقول أصل مايجوزش عليهم إلا الرحمة ….
يا سادة …. إحنا مع البلد ضد اعدائها .. وبوصلتنا واضحة وصريحة .. وأى حد أضمر شر للبلد دى أو فكر أو خطط لتدميرها أو رفع السلاح على ابنائهما من الجيش والشرطة والشعب .. أو شارك فى كدة حتى ولو كان بالتضامن فقط .. إحنا ضده … و دماء كل شهيد مصرى سالت علشان البلد دى تقدر تعيش وتكمل .. هــ تفضل بيننا وبينه …..
مات الكلام …
ملحوظة:
كل الصفحات اللى أخدت مننا مقال إمبارح ، إحنا شيلناه من عندهم … لأن ماينفعش يتاخد من عندنا كلام ويتنشر بإسمهم … فــ ياريت .. (رجاءً وليس أمراً) .. أى صفحة عايزة تاخد مننا مقال وتساهم فى نشره يبقى ، شير مباشر من عندنا .. أو يكون فيه إشارة واضحة فى بداية المقال إن مصدره من صفحة كلام فى الصميم مع لينك المقال الأصلى .. أعتقد إن ده أبسط حق من حقوقنا ….
و شكر خاص وتحية لكل أصدقائنا الجدعان … أصدقاء صفحة كلام فى الصميم 🙂
تحياتنا للجميع