كلام فى السياسة…  شجع مصر

22 Jun 2019

كلام فى السياسة…  شجع مصر
——————————–

مبروووك .. مبروووك … مبروووك …. لمصر
مبروك لمصر على نجاح حفل إفتتاح بطولة أمم أفريقيا 2019 … حفل أسطورى مبهر ، يليق بإسم مصر وسمعتها القارية والعالمية … ونجاح مصر فى تنظيم البطولة فى الوقت الضيق ده ، و ظهور مصر بالصورة المشرفة دى يدل على إن مصر عضيمة بأبنائها … وتقدر فعلا تحقق المستحيل ! …

أيوة …..
مصر نجحت فى إخراج حفل إفتتاح بشكل مبهر وأسطورى وغير مسبوق فى تاريخ كل بطولات أمم أفريقيا ..
مصر نجحت فى تنظيم بطولة والتجهيز لها فى أقل من 6 شهور ..
مصر بتنظم أكبر بطولة فى تاريخ بطولات الأمم الأفريقية بــ 24 فريق لأول مرة ..
مصر بتقدم ملاعب وإستادات على أعلى مستوى من الخدمة والتقنية التكنولوجية ..
مصر بتستخدم تقنية ونظام شراء التذاكر الجديد لأول مرة فى تاريخ مصر وتاريخ البطولة…
رئيس الإتحاد الأفريقى قال إن مصر أبهرت العالم فى 20 دقيقة …
مصر بتنظم بطولة قارية فى وسط تحديات أمنية لا مثل لها تمر بها مصر والمنطقة كلها …
مصر فعلا تقدر تصنع المستحيل 🇪🇬🙂💚

لكن بعيداً عن الحديث عن الإبهار والإعجاز والكورة وكل الكلام ده … فيه كلام فى السياسة لازم نقوله:

لازم تعرف إن فيه ناس وجماعات وتنظيمات وأجهزة أمنية و حتى دول بأكملها .. كان يهمهم إنك ماتنظمش بطولة كبيرة زى دى ، وتظهر أمام العالم بمثل هذه الصورة المشرفة والقدرة على التنظيم والتأمين !!

لازم تعرف إن فيه ناس وجماعات وتنظيمات وأجهزة أمنية و حتى دول بأكملها .. ماكانتش عايز تشوف ترابط المصريين وتأزرهم حول فريقهم وبلدهم .. وفخرهم باللى بيتعمل ، ودعمهم لكل حد بيعمل على نجاح الحدث .. لأن ده شئ بيرفع الروح المعنوية ويلهب الشعور الوطنى ، ويعّلى درجة الحماس والولاء للوطن

لازم تعرف إن فيه ناس وجماعات وتنظيمات وأجهزة أمنية و حتى دول بأكملها .. ماكانتش عايزة تشوف علم مصر وهو مرسوم على وجوه و جباه المصريين من مختلف الأعمار .. رجال ونساء وشباب وأطفال … الصورة دى والتابلوه الطبيعى اللى رسمه المصريين إمبارح بمختلف طوائفهم وبكل أعمارهم بيضرب فى قلب المؤامرة ، و بــ يهد شغل وجهد إتعمل على مدار سنين لتدمير الحس الوطنى عند المصريين

لازم تعرف إن فيه ناس وجماعات وتنظيمات وأجهزة أمنية و حتى دول بأكملها … كان يهمهم إنهم مايشوفوش تجمعات المصريين بالأعداد دى كلها فى الشوارع والكافيهات والنوادى ومراكز الشباب والميادين العامة .. لأن ده بيهدم ببساطة خالص فكرة الدولة البوليسية ، والقمع ، وطقطوقة “إفتحولنا الميادين وإنتوا تشوفوا جحافل المصريين اللى هتنزل تهتف وتسقط النظام” … علشان بس تعرفوا إن اللى بيقولوا كدة ، هم مجرد شوية شراذم ، أو قطيع من الزومبى اللى مصدق نفسه و مش موجود غير على السوشيال ميديا فى العالم الإفتراضى وبس

لازم تعرف إن فيه ناس وجماعات وتنظيمات وأجهزة أمنية و حتى دول بأكملها .. كانوا بيتقطعوا إمبارح من فرط الحزن .. و هم شايفين أجيال الشباب والأطفال الصغيرين اللى بيهتفوا من قلبهم “تحيا مصر” .. زى بالضبط ماكانوا بيتقطعوا و هم شايفين الإقبال المبهر على مشاهدة فيام الممر .. لدرجة إن حفلات السنيما تحولت لحفلات فى حب مصر …… وعجبنى جدا إمبارح فى أحد اللقاءات الجماهيرية اللى كانت بتنقل من الشوارع فرحة المصريين فى إحدى المدن ، واللقاءات مع الأسر والشباب ، لما سألوا طفل صغير مع أسرته لا يتجاوز 10 سنوات ، إييه رأيك فى حفل أفتتاح البطولة النهاردة و فى ماتش مصر .. فقال بتلقائية شديدة “أنا فرحان أوى .. وتحيا مصر تحيا مصر تحيا مصر” … أو بلغة الناس التانيين اللى انتوم عارفينهم “تحيا مصر 3 مرات” 😉🙂 … صدقونى .. مشهد زى ده بيقتلهم .. فهو أمر لو تعلمون عظيم 🙂

لازم تعرف إن فيه ناس وجماعات وتنظيمات وأجهزة أمنية و حتى دول بأكملها … ماكانش عاجبهم إن كل المصريين … “المصريييييين اللى بجد” متضامنين مع بلدهم .. ولم يتم تسجيل مشهد واحد ، هتف فيه أى تجمع من كل من كانوا فى الشوارع والنوادى والميادين ضد النظام أو ضد مصر ، أو حتى ضد رئيس مصر

لازم تعرف إن فيه ناس وجماعات وتنظيمات وأجهزة أمنية و حتى دول بأكملها … من اللى طالما ساهموا فى تغذية عقدة الدونية عند المصريين .. و قاموا بتنمية الشعور ده عن طريق جماعات وأشخاص بعينهم .. ماكانوش عايزين يشوفوا مظهر المصريين المتحضر ، وهم بينظفوا مدرجات إستاد القاهرة ، بعد نهاية المبارة إمبارح ، زى مواطنين الدول الأخرى اللى بيصورهوه ويشاوروا لك عليهم طول الوقت ، علشان يحسسك إنك أقل منهم !

لازم تعرف إن فيه ناس وجماعات وتنظيمات وأجهزة أمنية و حتى دول بأكملها … ماكانوش عايزين يشوفوا فرص العمل اللى إتوجدت بسبب تنظيم مصر للبطولة .. ولا عايزين يحصل حالة الرواج الإقتصادى والتجارى اللى نتجت عن تنظيم البطولة فى مصر .. واللى ظهرت فى حالة البيع والشراء والأكل والشرب والحملات الإعلانية .. ألخ ألخ ألخ .. لأنهم يهمهم بشكل كبير إستمرار الضغوط االإقتصادية و السياسية على مصر والمصريين … لأنهم مايهمهمش المصريين زى ما بيحاولوا يوهمونا .. لكن يهمهم مصلحتهم فقط فى خراب البلاد وتشريد العباد !!

لازم تعرف إن فيه ناس وجماعات وتنظيمات وأجهزة أمنية و حتى دول بأكملها … كانوا ومازالوا بيراهنوا على فشلنا … لأن هو ده هدفهم اللى هم قايمين نايمين بيه ، و عايشين علشانه !! 😏

لو تشوفوا تعليقات كل الاجانب و خصوصا الافارقة عن مدى انبهارهم بالتنظيم و حفل الافتتاح ، هتعرفوا إن الدعاية و الصورة الذهنية الايجابية إزاى انطبعت عند اجيال كاملة …. و هــ تعرفوا قيمة اللى حصل ده إييه:

مئات الآلاف من التعليقات كلها بــ يلخصها :-
– برافوا مصر .
– شكرا مصر …. ابهرتينا.
– لا احد في افريقيا يستطيع ان يقدم هذا المستوى العالمى غير مصر.
– فخورين بافريقيا … شكرا مصر.
– ابنتى الصغيره مبهورة و مش مصدقة مستوى الحفل و تسالنى … هي مصر معانا في افريقيا !!؟؟
– ننحنى لمصر لتقديم افريقيا للعالم بهذا المستوى …. شكراً مصر.
– لا احد يستطيع تقديم افريقيا للعالم بهذا المستوى غير مصر …. شكراً مصر.
– تصوروا …. كل هذا المستوى العالمى تم الترتيب له في 4 شهور فقط …. شكراً مصر.
– لم ارى في حياتى حفل افتتاح افضل من هذا … لا في كاس عالم و لا بطوله اوروبيه …. انها افريقيا … فخور انى افريقي …. شكراً مصر.
– فخور انى افريقي …. لم يحدث من قبل ان قدمنا احد للعالم بمثل هذا المستوى الراقي …. شكراً مصر.
– مصر اثبتت المقولة …. مصر مهد الحضارة من ٣٥٠٠ سنه قبل الميلاد …. شكراً مصر
و غيرها من الاف التعليقات …. ممكن تتابعوها بنفسكم على تويتر على الهاش تاج #AFCON2019

بالنسبة لينا إحنا … اللى كنا عايزينه يحصل خلاص حصل … والرصاصة خلاص طلعت من المسدس وإنضربت فى قلب كل حاقد ، كاره ، يضمر الشر لمصر .. ومش فاضل غير إن منتخبنا يتم تتويجه بحمل كأس البطولة .. ولو إن حتى لو ده ماحصلش .. مايهمناش .. لأن الهدف من إقامة البطولة فى مصر وخروجها بالشكل المبهر ده .. والتأثير الإيجابى فى المحيط الإقليمى والأفريقى والعالمى .. خلاص حصل … وفوز منتخبنا بالبطولة ، مش هــ يكون أكثر من ثمرة الفراولة اللى هــ نزوّق بيها التورتة … لأن بجد التورتة تحفة 🙂

و فى النهاية …. كل التمنيات لمنتخب مصر فى مشواره فى البطولة وصولا للمباراة النهائية والتتويج بالكأس …. شدوا حيلكم يا رجالة … وكل التحية والتقدير للشعب المصرى .. الشعب الرائع الواعى الوفى المحب لبلده مصر .. واللى لولاه لما كانت مصر … و مصر مش هتبقى قد الدنيا غير بإيديين المصريين

المصريين اللى بجد ..

تحيا مصر .. تحيا مصر .. تحيا مصر … مليون مرة 😉🙂

إرفع راسك .. وإعرف قيمتك وقيمة مصر .. وإفخر ببلدك .. علشان تقدر تفهم ، اللى بيحصل معاك ، و حواليك.

لمتابعة تعليقاتكم