فضفضة .. بعد ليلة بكى فيها المصريين

07 Jul 2019

فضفضة .. بعد ليلة بكى فيها المصريين !!
—————————————–

حزن شديد .. بل وشعور بالمرارة وخيبة الأمل إنتاب المصريين بعد ليلة حزينة خرج فيها المنتخب المصرى الأول من الأدوار المبكرة فى بطولة امم افريقيا 2019 !! 😢

وبالرغم من إن الصورة من البداية كانت مش مبشرة سواء من الناحية الفنية ، أو البدنية ، أو الجهاز الفنى ، أو إختيارات اللاعبين … وكان الخروج هو النتيجة الحتمية والمتوقعة .. لكننا كذبنا نفسنا .. و دعمنا المنتخب ووقفنا وراه .. وخصوصاً وإحنا شايفين بعنيننا إن الدولة لم تبخل بشئ من أجل إنجاح الحدث … وهو مازال حدث ناجح بكل المقاييس … لكن للأسف … كل شئ ممكن يضيع فى لحظة .. لما يكون فيه ناس مش على القدر الكافى من تحمل المسئولية .. والإدراك التام لأهمية موقعهم ووضعهم … وتفهمهم إن التقاعس والإهمال الصادر منهم مش بــ يأثر عليهم فقط أو على منظومة .. لكن بــ يأثر على دولة بحالها ! 😞

صورة تظافر المصريين مع بداية بطولة امم افريقيا ورفعهم اعلام مصر وهتاف الجميع تحيا مصر وغناء الشباب والبنات والأطفال للنشيد الوطنى “بلادى بلادى” .. والأجواء الإحتفالية اللى شهدتها كل شوارع مصر بعد حفل الأفتتاح الأسطورى اللى شافه 1.5 مليار شخص فى جميع انحاء العالم .. الصورة دى كان فيه دول وتنظيمات وأجهزة دولية بتدفع ملايين بل مليارات علشان تفسدها و ماتشوفش الصورة دى ابداً

و فى المقابل .. صورة كسرة نفس المصريين .. والأطفال والبراعم المصرية اللى كانت بتبكى بدموع الحزن من القلب قبل ماتكون من العيون .. كان فيه برضوا دول وتنظيمات وأجهزة دولية على إستعداد إنها تدفع ملايين بل مليارات علشان تشوف الصورة دى … وتستمتع بيها وتشمت فى مصر والمصريين … وللأسف … كان فيه ناس مننا سواء كان أعضاء مجلس إدارة إتحاد الكورة أو لاعبين .. أو حتى مواطنين عاديين … تبرعوا منهم لنفسهم كدة علشان يرسموا الصورة دى بالنيابة عن كل اللى كان نفسه يشوفها .. ومن غير ما يغرموهم مليم واحد .. ولا هم نفسهم يقبضوا مليم من اعداء مصر

هو لييه اعضاء إتحاد الكرة مش قادرين يدركوا إن كرة القدم مش مجرد لعبة رياضية .. لكنها أداة من أدوات الشحن المعنوى ورفع لمستويات الإنتماء للشعوب !!؟؟ .. ليه مش قادرين يفهموا إن تقصيرهم فى وظيفتهم وسوء إختياراتهم سواء كان عن سوء نية وسبق إصرار وفساد مالى واخلاقى .. أو حتى عن غير قصد … إنهم كدة بيرتكبوا جريمة فى حق بلدهم وحق مواطنيهم !!؟؟ 🤬

لييه اللاعب اللى بيلعب بإسم بلده ، بيلعب وهو مش مستوعب إن أمال شعب بحاله بكافة فئاته العمرية متعلقة بإجادته التامة فى موقعه وإحترامه لذاته وإنه قدوة حقيقية لكل الشباب .. وإن الجمهور ماشى وراه و بــ يهتف له وعنده إستعداد يرفعه على الأعناق ويقف معاه لأخر المطاف ، لمجرد إنه سجل هدف أو أدى بشكل رجولى فى الملعب !!

لييه فيه ناس مش مقدّرين حجم التضحيات والمجهود المفروش بالدم .. اللى بذله الجنود المجهولين علشان نقدر إحنا كلنا نعيش ونسعد وننبسط

لييه المواطن اللى بــ ينشر شائعات ، أو بــ يبث إحباطات وسخرية، عن منتخب كرة قدم بلاده .. مش قادر يستوعب إنه باللى بيعمله ده .. هو بــ يهدم الروح المعنوية ويكسر الظهير الجماهيرى لمجموعة من الاعبين ، من المفروض إنهم مالهمش هدف غير إسعاد سيادة المواطن ده … !! … طب إنت بقى بتعمل كدة لييه !!؟؟ .. وسايب نفسك اداة فى إيدين الأخرين لييه علشان يستخدموك فى تدمير معنويات فريقك !؟

و هنا ييجى دور السؤال الأثير اللى فى كل مناسبة تلاقى السيد الأستاذ العبقرى طالع يساله … طب ولما إتحاد الكرة فاسد .. سايبينهم لييه !!؟؟ .. مايشيلوهم .. والحقيقة إن إتحاد الكرة المصرى مش مؤسسة حكومية .. يعنى الدولة لا تملك عليهم سلطة التعيين والإقالة … ولو حصل مجرد شبهة تدخل للدولة فى أى شئ يخص إتحاد الكورة .. هــ تلاقى نفسك لابس فى حيطة سد مع الفيفا … و هــ يقوموا بإجراءات عقابية ضدد مصر بوقف النشاط الرياضى لمدة يقررها الإتحاد الدولى نفسه والتى لا تقل عن سنتين .. و ده حصل قبل كدة فى دولة الكويت … وتم وقف النشاط الرياضى فيها لمدة سنتين.

لو ده بقى حصل فى مصر .. شوف التداعيات السلبية اللى ممكن تترتب على حاجة زى كدة سواء على مستوى النشاط الرياضى أو الإجتماعى من كم البيوت اللى هتتقفل نتيجة توقف النشاط .. أو حتى على المستوى السياسى ، وحالة الهجوم اللى هــ يشنها الإعلام الرياضى والسياسى العالمى على مصر ، وإستغلال الحدث اسوء إستغلال فى تشويه مصر وسمعتها ….

وعموما الحمد لله .. أعضاء إتحاد الكرة اخيرا طلع عندهم دم وقدموا إستقالاتهم .. ووفروا علينا الحرج .. وفيه انباء عن بدأ الجهات السيادية التحقيق فى وقائع فساد .. وإن كان الخبر ده لسة لم يتم تأكيده … لكن السؤال الأهم اللى بيطرح نفسه .. هل منظومة الكرة فى مصر ومجالس إدارات الأندية وتمثيلهم فى الجمعية العمومية المنوط بيها إنتخاب أعضاء الإتحاد المصرى … ممكن تفرز لنا مجلس إدارة يقدر ينهض بالكرة المصرية ويحقق طموحات 100 مليون مصرى !!؟؟؟ .. ده السؤال اللى إحنا منتظرين إجابته …. ! 🤔

و بغض النظر عن كل ده .. وحزننا جميعا كمصريين على خروج منتخبنا بهذه الصورة .. لكن لازم نبقى فاهمين إن تصدى مصر لتنظيم البطولة الأفريقية ، ماكانش الهدف الأساسى منه ، هو فوز المنتخب بالبطولة .. وإن كان ده شئ كنا كلنا نتمناه .. فى لعبة شعبية هى اللعبة الأولى فى مصر ، وهى الشئ اللى بيفرح المصريين بالفعل وسط كل المصاعب والضغوط اللى بنعانى منها … لكن الهدف الرئيسى كان رسالة للعالم كله إننا نستطيع ..

أيوة … مصر تستطيع

– لما المصريين ارادوا يتحدوا العالم وياخدوا حق تنفيذ بطولة قارية فبل بدايتها بــ خمسة شهور بس … عملوها

– لما العالم كله راهن على فشل مصر فى التنظيم .. وراهن المصريين على النجاح فى ظل نظام جديد ومبتكر .. عملوها

– لما أعداء مصر راهنوا على تواضع الصورة اللى هتظهر بيها مصر أمام العالم .. وراهن المصريين إنها هــ تكون صورة مبهرة .. عملوها

– لما العالم تخوّف من التحديات الأمنية .. وراهن المصريين على قدرتهم على التأمين .. عملوها

– لما راهن اعداء مصر على سوء سلوكيات المدرجات .. وراهن المصريين على الظهور بمظهر حضارى مشرف .. عملوها .. و مش كدة وبس .. لكن كمان أجبروا جماهير الفرق الأخرى إنها تقلد الجمهور المصرى

أيوة مصر تستطيع .. والمصريين يقدروا …
لو كل واحد فينا أدى اللى عليه فى موقعه و راعى ضميره … وفهم وتفهم اهمية اللى بيعمله ، وإزاى ممكن ده ينعكس على بلده بالكامل سلبا أو إيجاباً .. ساعتها هــ نكون فى قمة الأمم

و بلغة الكورة اللى بيعشقها المصريين .. هارد لك
هارد لك يا مصريين …
و ماتزعلوش …
بالعكس .. قدّر الله و ما شاء فعل .. و الحمد لله إن ده حصل .. فى الوقت اللى أبنائنا وبناتنا من الشباب والأطفال اللى بيهتفوا فيه بإسم بلدهم .. وكلهم على قلب شخص واحد .. شافوا بعنيهم … إنك علشان توصل للقمة ، لازم تجيد فى موقعك .. لازم تشقى وتتعب علشان توصل … الفهلوة ممكن تخليك تكسب جولة أو إتنين .. لكن عمرها ما تخليك تكسب على طول أو توصل للقمة !

و ختاماً ..
صحيح منتخب مصر خسر وخرج من البطولة
صحيح الجهاز الفنى المتواضع أثبت عجزه وضعفه
صحيح إتحاد الكرة الفاشل .. فشل فى تحقيق اللى المفروض إنهم منوط بيهم تحقيقه
لكن مــصــر والـمــصـــريــيــن فــازوا ..
و بــإمـتــيــاز كــمـــان …
ويمكن الى حصل ده يكون بداية لثورة تصحيح فى المنظومة الرياضية فى مصر

إرفع راسك .. وإعرف قيمتك وقيمة مصر .. وإفخر ببلدك .. علشان تقدر تفهم ، اللى بيحصل معاك ، و حواليك.

لمتابعة تعليقاتكم