19 Jul 2019
البطولة ماخلصتش غير وإحنا كسبانين !!
—————————————-
كلنا كعشاق للكرة زعلانين أكيد إن كأس البطولة مش لمصر … أو على أقل تقدير إن مصر مش طرف فى النهائى … لكن لو ركزت شوية كدة هتلاقى إننا كسبنا البطولة بالفعل !! .. إتفرج على الفيديو ده .. وشوف الإشادة اللى من الجميع .. وانت تعرف إحنا كسبنا إييه 🙂
إحنا كسبنا التحدى .. وكسبنا التنظيم .. وكسبنا سمعة عالمية فى القدرة على التنظيم والتأمين لبطولات وأحداث رياضية كبرى … وكسبنا الطفرة الغير مسبوقة اللى حصلت فى البنية التحتية الرياضية فى مصر … وكسبنا حالة الرواج التجارى والإقتصادى اللى حصلت نتيجة تواجد وفود رسمية ومواطنين وسائحين من 24 دولة فى وقت واحد فى مصر … وكسبنا إن إتحاد الكرة المصرى الفاشل والجهاز الفنى الأفشل ، تمت الإطاحة بيهم .. وكسبنا إن العالم يشوف رئيس بلدك و هو واقف بيسلم كأس وميداليات فى بطولة قارية بتنظمها مصر فى وسط كل التحديات الراهنة .. فى الوقت اللى كان فيه ناس نفسهم يشوفوا عندك تفجيرات وإعتصامات ومتاريس فى الشوارع وحرب أهلية وناس بتجرى وراء ناس والأمن بيطارد كل ده .. تلك الدوامة التى انجانا منها الله 🙂 …
والأهم من كل ده .. إننا كسبنا إعادة شحن للروح الوطنية وتفاعل الناس مع منتخب بلدهم … كسبنا إننا شوفنا بعنينا الأجيال الجديدة إزاى بتحب بلدها وبتبكى بالدموع بحرقة علشان ماتش كورة خسرناه … كسبنا شكل أعلام مصر اللى كانت بترفرف فى كل حتة فى بلدنا .. كسبنا جماهير داخل الإستاد .و وراهم الشعب المصرى مع الجماهير دى و هم بيرددوا النشيد الوطنى المصرى … 100 مليون مصرى كانوا بيغنوا بلادى بلادى لكى حبى وفؤادى فى لحظة واحدة .. (ماعدى كام الف كدة مالناش دعوة بيهم) …..
و الأهم و الأهم و الأهم .. إننا شوفنا الحسرة والغيظ فى عيون كل اللى كانوا يتمنوا عكس كل المكتوب ده … كان لازم تاخدوا بالكوا من الحملة المسعورة اللى كانت ومازالت موجودة على السوشيال ميديا من قبل بدأ البطولة … والتصرفات القذرة اللى كانت بتعملها قناة “BIN SPORT” أثناء البطولة وبالذات فى ماتشات المنتخب المصرى علشان باللغة الدارجة كدة “يفطسوا البطولة” .. كل ده لييه … علشان هو ده اخرهم .. ومن اجل تعظيم مكاسبهم اللى هم مش شايفينها غير من منظور واحد فقط … إفشالك يعنى نجاح بالنسبة لهم … و ده فى حد ذاته قمة الفشل .. و اللى عايزين يختموها بحالة من التسخين والشحن السلبى أملا فى تكرار احداث أم دورمان مرة اخرى … لكن بعيد عن شنباتهم 🙂
صدقونى … إحنا كسبنا حاجات كتيرة أوى … مكاسبنا ونجاحاتنا فى البطولة دى تتجاوز بكتير إخفاقاتنا .. و ده مش مجرد كلام بــ نعزى به نفسنا … لكنها حقيقة عارفينها وحاسين بيها .. لكن عاطفيا وكرويا .. مش قادرين نشوف غير كاس البطولة … واللى شايف كدة معاه حق طبعا … وإحنا معاه … لكن خلينا كلنا نركز على فرحة مصر .. ونتعلم من أخطائنا .. ونتجاوزها .. وبإذن الله يبقى حفل ختام رائع ونهائى جميل وتسليم جوائز منظم
ملحوظة:
أعلن الاتحاد الأفريقي لكرة القدم “كاف” اختيار مصر لاستضافة حفل توزيع جوائز وتكريم احسن لاعب فى أفريقيا لعام 2019 واللي هــ يقام في يناير المقبل، بحضور كوكبة من نجوم أفريقيا سواء الحاليين أو السابقين .. و لو إنتم فاكرين .. ده نفس الحفل اللى فاز فيه صلاح اخر مرة بجائزة احسن لاعب …. والحدث الهام ده بــ يقوم الإتحاد الأفريقى بتنظيمه سنوياً .. والمرة دى فازت مصر بالتنظيم و هــ يكون فى الغردقة بإذن الله … شوفوا بقى خبر زى ده قهر وعكنن على ناس قد إييه !! 🙂 🙂 .. إستعدوا بقى لفعاليات إفشال الحدث ده من دلوقتى على السوشيال ميديا والإعلام المعادى .. ويارب ناخد بالنا بقى المرة دى …. .
وبالمرة كمان للى مايعرفش .. فــ مصر هــ تستضيف في شهر نوفمبر المقبل، نهائيات بطولة أمم أفريقيا تحت 23 سنة والمؤهلة إلى دورة الألعاب الأوليمبية طوكيو 2020، والتي تقام خلال الفترة من 8 وحتى 22 نوفمبر المقبل … شوفتوا بقى إحنا كسبانين قد إييه 🙂
إرفع راسك .. وإعرف قيمتك وقيمة مصر .. وإفخر ببلدك .. علشان تقدر تفهم ، اللى بيحصل معاك ، و حواليك.