20 Jul 2019
مسك الختام ..
و أدينا النهاردة عملنا اللي قالوا عنه مستحيل .. !!
و أدينا النهاردة نجحنا ونجاحنا له مليون دليل .. !!
=============================
مصر ماتعرفش المستحيل ..
و رغم كل العقبات والتحديات .. مصر تقدر .. مصر تستطيع 🙂🙂
مصر نظمت بطولة أفريقيا بشكل فاق كل التوقعات … و زى ما كان حفل الإفتتاح هو حفل أسطورى … كمان جاء حفل الختام الذى كان يترقبه الملايين حول العالم .. ليضع التاج على رأس ملايين المصريين .. تاج الفخر والعزة والإفتخار ببلدنا
حتى أعداء مصر لم يستطيعوا أن يزايدوا على مصر … بل ولم يقدروا على شيئ غير الإشادة بما قامت به مصر من إعجاز …. و ده اللى ظهر حتى فى تقارير تلك القناة العميلة التى نقلت الحدث وأيضا فى كلام حثالات فريق عمل القناة .. اللى ماقدروش ينكروا أو حتى يقللوا من اللى عملته مصر .. برغم كل اللى عملوه وقالوه عن مصر و عن الملاعب وعن البطولة خلال شهر الفاعليات والمباريات .. لدرجة إنهم كانوا بــ ينتقدوا حتى درجات الحرارة .. على أساس إن قطر اللى هــ تنظم كأس العالم 2022 دى موجودة فى الإسكيمو … لكن فى النهاية لا يصح إلا الصحيح .. وماقدروش ينكروا اللى قامت به مصر
و بالمناسبة كان قرار صائب جدا اننا نسجل الحفل كاملا على القناة المصرية من خلال تايم سبورت علشان يبقى للاجيال القادمة … وبدون تقطيعات للصورة بشكل غير مبرر .. وخلفيات سوداء وكأن قناة الحقيرة الرياضية كانت بتتعمد إنها تعكنن على الناس و تبوظ التوثيق التاريخي للبطولة ، بأنها تبوظ اغنية الختام ..
أغنية الختام اللى كتب كلماتها الشاعر أمير طعيمة وقام بتلحينها الرائع هشام جمال .. وغنتها بمنتهى الروعة الفنانة دنيا سمير غانم .. كان أغنية فعلا فى منتهى الروعة ..
الأغنية ماكانتش صدفة .. لكنها كانت رسالة موجهة .. وعن قصد وسابق نية .. موجهة لكل اللى راهنوا على فشل مصر .. موجهة لكل اللى تأمروا على مصر .. موجهة لكل اللى شاركوا فى محاولة إسقاط مصر من اول 2011 .. رسالة بتقول لهم .. كنتم فاكرين إننا مش هــ تقوم لينا قومة تانى .. لكننا أهو واقفين .. وبنبهر العالم .. والبطولة دى شاهد على فشلكم فى إسقاط مصر … لأ وشوفوا سخرية القدر .. إن البطولة كلها .. وحفل الإفتتاح .. وأغنية الختام يتم بثهم من قناة الحقيرة … تلك القناة الصهيونية اللى تبث من على أرض قطرية .. القناة والدولة التى تم إستخدامهم كأدة لإسقاط كل الدول العربية ومحاولة إسقاط مصر … وييجى النهاردة الرد فى حدث وأغنية .. من قلب أداة المؤامرة نفسها 😉😁
إسمعوا كدة الأغنية .. وإفخروا ببلدكم مصر 🙂
=================================
من كام سنة .. عدي علينا اصعب وقت في عمرنا
احلامنا مالت للغروب علي ارضنا… إنت وأنا
إنت وأنا
قالوا خلاص مش هاتقوم لنا قومه تاني .. واننا
هانحصل اللي ضاعوا و راحوا قبلنا
لكن علي مين …
المصري مابيعرفش يعني ايه فشل
لو حط حلمه قصاد عينه .. اعتبره حصل
و اديك انت شوفت بقينا فين …
.
و أدينا النهاردة عملنا اللي قالوا عنه مستحيل
و أدينا النهاردة نجحنا .. ونجاحنا له مليون دليل
و أدينا النهاردة بنبني حلم لبكرة ولجيل بعد جيل
.
مصر التاريخ وحضارة يحكوا الناس عليها للابد
احنا في قلب افريقيا .. وليهم سند ..
دول اهلنا…دول اهلنا …
و دى أرضنا .. مفتوحة ليكم كل وقت و كل حين ..
و في كل مرة تدخلوها سالمين ..
إنتم هنا فى قلبنا .. فى قلبنا
.
مش بالكلام ..أرض الأمان .. دا معنى مش ممكن يضيع
دى حقيقة ملموسة و واضحة للجميع
و الكل شاهد والا اييه ….
مش بالكلام .. باللي احنا عملناه ولسه هانعمله
و مادام بدأنا طريقنا يبقي نكمله .. و لحد آخر خطوة فيه
.
و أدينا النهاردة عملنا اللي قالوا عنه مستحيل
و أدينا النهاردة نجحنا .. ونجاحنا له مليون دليل
و أدينا النهاردة بنبني حلم لبكرة ولجيل بعد جيل
===========================
إرفع راسك .. وإعرف قيمتك وقيمة مصر .. وإفخر ببلدك .. علشان تقدر تفهم ، اللى بيحصل معاك ، و حواليك.